పెరిగిన వరద.. తెరుచుకున్న మూసీ ప్రాజెక్ట్ గేట్లు

తెలంగాణ రాష్ట్ర వ్యాప్తంగా ఎడతెరిపి లేకుండా కురుస్తున్న భారీ వర్షాలతో నదులు, వాగులు, వంకలు పొంగిపొర్లుతున్నాయి. రాష్ట్రంలోని పలు జిల్లాల్లో విస్తారంగా వర్షపాతం నమోదవుతుండగా.. మరికొన్ని ప్రాంతాల్లో ఓ మోస్తరు వర్షాలు కురుస్తున్నాయి. గత రెండు మూడు రోజులుగా రాజధాని హైదరాబాద్‌లో కూడా భారీ వర్షాలు కురుస్తుండటంతో.. నగరం నడిబొడ్డున ఉన్న మూసీ నదికి భారీగా వరద నీరు వచ్చి చేరుతోంది. దీంతో నల్గొండ జిల్లా కేతేపల్లి వద్ద ఉన్న మూసీ ప్రాజెక్ట్‌కు అసాధారణ స్థాయిలో వరద ప్రవాహం వస్తోంది. ఫలితంగా.. ప్రాజెక్టు భద్రతను దృష్టిలో ఉంచుకొని అధికారులు శుక్రవారం ఉదయం ప్రాజెక్టు గేట్లను ఎత్తి, దిగువకు నీటిని విడుదల చేశారు.

మూసీ ప్రాజెక్టు వివరాలు..

మూసీ ప్రాజెక్టులో ప్రస్తుతం 3, 8 గేట్లు ఎత్తి నీటిని దిగువకు వదులుతున్నారు. ప్రాజెక్టులోకి ఇన్‌ఫ్లో (నీటి ప్రవాహం), అవుట్‌ఫ్లో (బయటకు విడుదల అవుతున్న నీరు) రెండూ 1,653.11 క్యూసెక్కులుగా నమోదవుతున్నాయి. ప్రాజెక్టు ప్రస్తుత నీటిమట్టం 643.45 అడుగులుగా ఉంది. మూసీ ప్రాజెక్టు పూర్తి నీటి నిల్వ సామర్థ్యం 4.46 టీఎంసీలు కాగా, ప్రస్తుతం 4.07 టీఎంసీల నీటి నిల్వ ఉంది. ప్రాజెక్టు దాదాపు నిండుకుండలా మారడంతో, దిగువకు నీటి విడుదల అనివార్యమైంది. మూసీ నది పరీవాహక ప్రాంతాల్లోని ప్రజలు, ముఖ్యంగా నది పరిసర ప్రాంతాల్లో నివసించే వారు అప్రమత్తంగా ఉండాలని అధికారులు హెచ్చరికలు జారీ చేశారు. మరో మూడు నుంచి నాలుగు రోజుల వరకు తెలంగాణ రాష్ట్ర వ్యాప్తంగా కూడా భారీ వర్షాలు కురుస్తాయని వాతావరణ శాఖ పేర్కొంది.

భారీ వర్షాలు, వరదల నేపథ్యంలో ప్రజలు అప్రమత్తంగా ఉండాలని.. ముఖ్యంగా లోతట్టు ప్రాంతాల ప్రజలు సురక్షిత ప్రాంతాలకు వెళ్లాలని అధికారులు సూచిస్తున్నారు. పొంగి ప్రవహిస్తున్న వాగులు, వంకలు, కల్వర్టులను దాటే ప్రయత్నం చేయవద్దు. ప్రవాహ వేగం ఎక్కువగా ఉన్నప్పుడు ప్రమాదాలు జరిగే అవకాశం ఉంది. తెగిపడిన విద్యుత్ తీగలు, స్తంభాల పట్ల అప్రమత్తంగా ఉండాలి.

విద్యుత్ సరఫరాలో అంతరాయాలు ఏర్పడితే అధికారులకు సమాచారం ఇవ్వాలి. జలాశయాలు, చెరువుల వద్దకు వెళ్ళవద్దు. నీటిమట్టాలు పెరుగుతున్నందున ప్రమాదాలు జరిగటే అవకాశం ఉందని అధికారులు హెచ్చరికలు జారీ చేశారు. అత్యవసర పరిస్థితుల్లో 100 లేదా విపత్తు సహాయక నంబర్లకు కాల్ చేసి సహాయం కోరాలి.