హైదరాబాద్‌లో వాయిదా పడిన కొత్త రేషన్‌కార్డుల పంపిణీ

తెలంగాణవ్యాప్తంగా కొత్త రేషన్ కార్డుల పంపిణీ ప్రారంభం అయ్యింది. జులై 25 అనగా శుక్రవారం నుంచే రేషన్ కార్డుల పంపిణీ ప్రారంభించారు. ఆగస్టు 10 వరకు రేషన్‌కార్డుల పంపిణీ కొనసాగనుంది. జిల్లా ఇంఛార్జీ మంత్రి, ఎమ్మెల్యేల సమక్షంలో రేషన్‌కార్డుల పంపిణీ ప్రారంభించారు. ప్రస్తుతం రాష్ట్రవ్యాప్తంగా రేషన్‌కార్డుల పంపిణీ కొనసాగుతుంది. కానీ హైదరాబాద్‌లో మాత్రం రేషన్‌కార్డుల పంపిణీ వాయిదా పడింది. దీనిపై నగరవాసులు అసహనం వ్యక్తం చేస్తున్నారు. మరి ఎందుకు నగరంలో రేషన్‌కార్డుల పంపిణీ జరగలేదంటే..

హైదరాబాద్‌లో కొత్త రేషన్‌‌కార్డుల కోసం దరఖాస్తు చేసుకున్న ప్రజలకు ఎదురు చూపులు తప్పడం లేదు. నగరంలో కార్డుల పంపిణీ ప్రక్రియ మరింత ఆలస్యం కానుంది. వాస్తవానికి శుక్రవారం నాడే రాష్ట్రం మొత్తం కొత్త రేషన్‌ కార్డుల పంపిణీని ప్రారంభించాలి. ఈకార్యక్రమానికి సంబంధించి అధికారులు అన్ని ఏర్పాట్లు పూర్తి చేశారు. అలానే భాగ్యనగరంలో కూడా రేషన్ కార్డుల పంపిణీకి అన్ని ఏర్పాట్లు చేసినా కార్యక్రమం మాత్రం ప్రారంభం కాలేదు. కారణం హైదరాబాద్‌ ఇన్‌చార్జి మంత్రి పొన్నం ప్రభాకర్‌ అందుబాటులో లేకపోవడంతో నగరంలో కొత్త రేషన్‌కార్డుల పంపిణీ కార్యక్రమం వాయిదా పడింది. దీనిపై నగర వాసులు అసహనం వ్యక్తం చేస్తున్నారు.

హైదరాబాద్‌ జిల్లా మొత్తం మీద సుమారు 2,19,321 కుటుంబాలు కొత్త రేషన్‌కార్డుల కోసం అప్లై చేసుకున్నాయి. అయితే అధికారులు కేవలం 47,374 దరఖాస్తులపై మాత్రమే పూర్తి స్థాయిలో విచారణ నిర్వహించినట్లు తెలుస్తోంది. పౌర సరఫరాల శాఖ అధికారులు క్షేత్రస్థాయి విచారణ నిర్వహించినట్లు తెలుస్తోంది. ఇలా పరిశీలించిన వాటిల్లో కూడా 44,415 దరఖాస్తులు మాత్రమే అర్హత సాధించగా.. మిగిలిన 2,959 దరఖాస్తులను తిరస్కరించారు. ఇవి కాక మిగిలిన దరఖాస్తులు అన్ని పెండింగ్‌లో ఉన్నాయని అధికారులు తెలిపారు.

అయితే జిల్లాలో సిబ్బంది కొరత వల్ల రేషన్ కార్డుల విచారణ ప్రక్రియ వేగంగా సాగడం లేదని అధికారులు తెలిపారు. హైదరాబాద్‌లో ఇప్పటి వరకు 20 శాతం దరఖాస్తులను కూడా పూర్తి స్థాయిలో విచారించడం లేదని తెలిసింది. ఈ క్రమంలో పౌరసరఫరాల శాఖ పెండింగ్ దరఖాస్తుల విచారణను జీహెచ్ఎంసీకి అప్పగించినట్లు తెలుస్తోంది.

ఇదిలా ఉంటే.. ముఖ్యమంత్రి రేవంత్ రెడ్డి.. జులై 15న సూర్యాపేట జిల్లా తిరుమలగిరిలో కొత్త రేషన్‌కార్డుల పంపిణీని అధికారికంగా ప్రారంభించిన సంగతి తెలిసిందే. ఈ నేపథ్యంలో జులై 25 నుంచి ఆగస్టు 10 వరకు అసెంబ్లీ నియోజకవర్గాల వారీగా కొత్త రేషన్‌కార్డులను పంపిణీ కార్యక్రమం నిర్వహిస్తున్నారు.