హైదరాబాద్‌లో చిరుత కలకలం.. భయాందోళనలో స్థానికులు

హైదరాబాద్‌లోని గోల్కొండ కోట ప్రాంతంలో చిరుతపులి సంచారం ప్రజలను తీవ్ర భయాందోళనకు గురిచేస్తోంది. ఇబ్రహీంబాగ్ మిలిటరీ ఏరియాలో ఒక చిరుతపులి రోడ్డు దాటుతున్న దృశ్యాలు సీసీటీవీ కెమెరాలలో రికార్డు కావడంతో స్థానికులు భయంతో వణికిపోతున్నారు. ఈ సంఘటనను పలువురు స్థానికులు గమనించి వెంటనే పోలీసులకు సమాచారం అందించారు. ప్రస్తుతం ఈ చిరుతపులి కోసం ఫారెస్ట్ అధికారులు పోలీసులతో కలిసి విస్తృతంగా గాలిస్తున్నారు. స్థానికులు అప్రమత్తంగా ఉండాలని అధికారులు సూచనలు జారీ చేశారు.

ఇటీవలే నార్సింగి మున్సిపాలిటీలోని మంచిరేవుల విలేజ్ వ్యాస్‌నగర్ క్యాంపస్‌లో చిరుత సంచారం కలకలం రేపిన విషయం తెలిసిందే. అప్పుడు అధికారులు సీసీ కెమెరాలు ఏర్పాటు చేసి మరీ చిరుత జాడను కనిపెట్టారు. ఆ ఘటన మరువకముందే ఇప్పుడు గోల్కొండ వద్ద మరో చిరుత సంచరించడం ప్రజల ఆందోళనను మరింత పెంచింది.

గత కొద్ది కాలంగా తెలంగాణ రాష్ట్రంలో.. ముఖ్యంగా హైదరాబాద్ పరిసర ప్రాంతాల్లో చిరుతలు, వన్యప్రాణులు జనావాసాల్లోకి తరచుగా వస్తూ ప్రజలను తీవ్ర ఆందోళనకు గురిచేస్తున్నాయి. గతంలో ఈ జంతువులు అడవులు, సురక్షిత ప్రాంతాలకే పరిమితం అయ్యేవి. అయితే.. ప్రస్తుతం అవి మానవ నివాస ప్రాంతాల్లోకి ప్రవేశించడం, కొన్నిసార్లు పెంపుడు జంతువులను వేటాడటం, ప్రజలను భయభ్రాంతులకు గురిచేయడం వంటివి జరుగుతున్నాయి.

అటవీ శాఖ అధికారులు చెబుతున్న దాని ప్రకారం.. ఈ పరిస్థితికి ప్రధాన కారణం మానవ ఆక్రమణలే. వన్యప్రాణులు తిరిగే సహజమైన అటవీ ప్రాంతాలను, వాటికి నివాసాలైన అడవులను నరికివేసి, నివాస ప్రాంతాలుగా, వాణిజ్య సముదాయాలుగా, పారిశ్రామిక ప్రాంతాలుగా మార్చుకోవడం వల్ల ఈ సమస్య తలెత్తుతోంది. జంతువులకు ఆహారం, ఆవాసం కొరవడటంతో అవి తమ మనుగడ కోసం జనావాసాల్లోకి ప్రవేశిస్తున్నాయి. ముఖ్యంగా.. అటవీ ప్రాంతాలకు ఆనుకొని ఉన్న అవుటర్‌ రింగ్ రోడ్డు (ORR) విస్తరణ, నివాస కాలనీల నిర్మాణం ఈ సంఘర్షణకు ఆజ్యం పోస్తున్నాయి.

భవిష్యత్ సవాళ్లు, పరిష్కారాలు..

ఈ పరిస్థితి మానవులు, జంతువుల మధ్య సంఘర్షణను పెంచుతోంది. ఒకవైపు ప్రజల భద్రతకు ముప్పు ఏర్పడుతుంటే.. మరోవైపు వన్యప్రాణుల మనుగడ ప్రశ్నార్థకంగా మారుతోంది. ఈ సమస్యను పరిష్కరించడానికి ప్రభుత్వం, అటవీ శాఖ తక్షణమే చర్యలు తీసుకోవాల్సిన అవసరం ఉంది.

మిగిలి ఉన్న అటవీ ప్రాంతాలను పటిష్టంగా సంరక్షించడం.. అడవుల్లో జంతువులకు తగినంత ఆహారం లభ్యమయ్యేలా చూడటం.. జనావాసాలకు, అటవీ ప్రాంతాలకు మధ్య కంచెలు లేదా రక్షణ గోడలు నిర్మించడం... ప్రజలకు వన్యప్రాణుల పట్ల అవగాహన కల్పించడం.. వన్యప్రాణులు జనావాసాల్లోకి వచ్చినప్పుడు అటవీ శాఖ, పోలీసులు వేగంగా స్పందించడం... ఈ రకమైన చర్యలు భవిష్యత్తులో ఇలాంటి సంఘటనలను నివారించడంలో సహాయపడతాయి. లేకపోతే.. మానవులు, జంతువుల మధ్య సంఘర్షణలు మరింత పెరిగి, తీవ్ర పరిణామాలకు దారితీసే అవకాశం ఉంది. అటవీ సంపదను కాపాడుకోవడం, వన్యప్రాణుల మనుగడను సురక్షితం చేయడం మనందరి బాధ్యత.