జాక్ పాట్ కొట్టిన విద్యార్థి.. ఏకంగా రూ.46 లక్షల ప్యాకేజీతో ఉద్యోగం

ప్రస్తుత పోటీ ప్రపంచంలో మంచి జీతంతో ఉద్యోగం సంపాదించడం చాలా కష్టం. ముఖ్యంగా బయట మార్కెట్‌లో ఉద్యోగం కోసం ప్రయత్నించే నిరుద్యోగులు ఎదుర్కొంటున్న కష్టాలు వర్ణనాతీతం. ఒక్కో ఉద్యోగానికి వందల, వేల మంది పోటీ పడటం.. ఇంటర్వ్యూల మీద ఇంటర్వ్యూలు ఇవ్వడం, అనుభవం లేకపోవడంతో అవకాశాలు రాకపోవడం వంటి సమస్యలు చాలా మందిని నిరాశకు గురిచేస్తున్నాయి. కానీ.. దీనికి పూర్తి విరుద్ధంగా క్యాంపస్ ప్లేస్‌మెంట్‌లలో విద్యార్థులు అద్భుతమైన ప్యాకేజీలతో ఉద్యోగాలు సాధిస్తూ తమ కలను సాకారం చేసుకుంటున్నారు. అకాడమిక్ సంవత్సరంలో చదువుకుంటూనే అత్యధిక వార్షిక వేతనాలు పొందే వారి సంఖ్య ఇటీవల బాగా పెరిగింది. తాజాగా, హైదరాబాద్ కేంద్రీయ విశ్వవిద్యాలయం (UoH) క్యాంపస్ ప్లేస్‌మెంట్స్‌లో ఒక విద్యార్థి ఏకంగా రూ. 46 లక్షల వార్షిక వేతనంతో ఉద్యోగం సాధించి అందరి దృష్టిని ఆకర్షించారు. దీనికి సంబంధించి పూర్తి వివరాలు ఇలా ఉన్నాయి.

ఈ సంవత్సరం ప్లేస్‌మెంట్స్‌లో హైదరాబాద్ కేంద్రీయ విశ్వవిద్యాలయం (UoH) విద్యార్థులు అద్భుతాలు సృష్టించారు. గత ఏడాది అత్యధికంగా రూ. 17.89 లక్షల వార్షిక వేతనం లభించగా.. ఈసారి ఒక విద్యార్థి ఏకంగా రూ. 46 లక్షల వార్షిక వేతనంతో ఉద్యోగం సాధించి అందరినీ ఆశ్చర్యపరిచారు. ఇది గత సంవత్సరం కంటే రెట్టింపు కంటే ఎక్కువ.

  విశ్వవిద్యాలయం విడుదల చేసిన పత్రికా ప్రకటన ప్రకారం.. 2024-25 విద్యా సంవత్సరానికి గానూ మొత్తం 550 మంది విద్యార్థులు 180 సంస్థల్లో ఉద్యోగాలు పొందారు. అత్యధిక ప్యాకేజీని స్కూల్ ఆఫ్ కంప్యూటర్ అండ్ ఇన్ఫర్మేషన్ సైన్సెస్ నుంచి ఎంటెక్ (ఐటీ) పూర్తి చేసిన విద్యార్థి దక్కించుకున్నారు.

నియామకాలు చేపట్టిన ప్రముఖ సంస్థలు..

టాటా కన్సల్టెన్సీ సర్వీసెస్ (TCS), డెలాయిట్, ఒరాకిల్, టెరాడేటా, ఇంటెల్, లాయిడ్స్, సర్వీస్‌నౌ, మైక్రాన్, పెగాసిస్టమ్స్, ఎగ్జిమ్ బ్యాంక్, యాక్సెంచర్, నోవార్టిస్, జనరల్ ఎలక్ట్రిక్, ఐసీఐసీఐ బ్యాంక్, ఫెడరల్ బ్యాంక్, ఆర్‌ఎస్‌ఎం, జోయ్‌అలుక్కాస్, బ్లైజ్, మెట్రిక్4 అనలిటిక్స్, సింక్రోనీ ఫైనాన్షియల్, ఎస్&పీ గ్లోబల్, ప్రోగ్రెస్, డీపీఎస్, శంకర ఐ ఫౌండేషన్ వంటి ప్రముఖ కంపెనీలు ఈ క్యాంపస్ ప్లేస్‌మెంట్స్‌లో పాల్గొన్నాయి.

ఉద్యోగాలు పొందిన విద్యార్థులు ఐటీ, అనలిటిక్స్, ఫైనాన్స్, రీసెర్చ్, విద్య, కన్సల్టింగ్ రంగాల్లో తమ స్థానాలను సుస్థిరం చేసుకున్నారు. యూఓహెచ్ ప్లేస్‌మెంట్ గైడెన్స్ అడ్వైజరీ బ్యూరో (PGAB) ఛైర్మన్ ప్రొఫెసర్ చేతన్ శ్రీవాస్తవ, ప్లేస్‌మెంట్స్ సాధించిన విద్యార్థులను అభినందించారు. ‘ప్రస్తుతం ఉద్యోగ మార్కెట్‌లో సవాళ్లు ఉన్నప్పటికీ, మా విద్యార్థులు అద్భుతమైన ప్రదర్శన కనబరిచారు. ఉత్తమ అవకాశాలను అందిపుచ్చుకొని హైదరాబాద్ విశ్వవిద్యాలయం కీర్తిని మరింత పెంచారు. ఇది విశ్వవిద్యాలయానికి చాలా గర్వకారణం’ అని ఆయన పేర్కొన్నారు.

హైదరాబాద్ విశ్వవిద్యాలయం ప్లేస్‌మెంట్ అండ్ గ్రీవెన్స్ అడ్వైజరీ బోర్డు (PGAB) తమ ప్రతిభావంతులైన విద్యార్థులను నియమించుకోవడానికి ఆసక్తి ఉన్న కంపెనీలను ఆహ్వానిస్తోంది. యూఓహెచ్ విద్యార్థులను నియమించుకోవాలనుకునే సంస్థలు chairmanpgab@uohyd.ac.in / placementuoh@gmail.com కు ఈమెయిల్ చేయవచ్చు లేదా 9866109681 నంబర్‌కు కాల్ చేయవచ్చని ఆ ప్రకటనలో పేర్కొన్నారు.