కిడ్నాప్ చేసి మరీ..,,,17 ఏళ్ల మైనర్ బాలుడితో 26 ఏళ్ల వివాహిత

ఖమ్మం జిల్లా సత్తుపల్లి ప్రాంతానికి ఒక మహిళకు గతంలో వివాహం జరిగింది. భర్తతో వచ్చిన గొడవలు, విభేదాల కారణంగా విడాకులు తీసుకుని ఆమె వేరుగా నివసిస్తోంది. సత్తుపల్లిలోని ఒక ప్రైవేట్ ఆసుపత్రిలో నర్సుగా పని చేస్తున్న ఆమెకు.. ఇదే ప్రాంతానికి చెందిన 17 ఏళ్ల మైనర్ బాలుడితో పరిచయం ఏర్పడింది. ఈ పరిచయం క్రమంగా ప్రేమగా మారింది. బాలుడు మైనర్ అని తెలిసినా, ఆ మహిళ అతడిని తన మాయలో పడేసిందనే ఆరోపణలున్నాయి.

సుమారు ఆరు నెలల క్రితం ఆమె.. మైనర్ బాలుడిని కిడ్నాప్ చేసి తీసుకెళ్లింది. తమ కుమారుడు కనిపించకపోవడంతో బాలుడి తల్లిదండ్రులు సత్తుపల్లి పోలీస్ స్టేషన్‌లో కిడ్నాప్ కేసు పెట్టారు. పోలీసులు అప్పటి నుంచి విచారణ చేపట్టినా.. ఎలాంటి ఆచూకీ లభించలేదు. బాలుడిని తీసుకెళ్లిన సదరు మహిళ ఫోన్లు వాడకుండా, ఎలాంటి క్లూ దొరకకుండా జాగ్రత్తలు తీసుకుంది. పోలీసులు అన్ని కోణాల్లో దర్యాప్తు ప్రారంభించారు. ఈ క్రమంలో బాలుడి పుట్టినరోజు సందర్భంగా.. కేక్‌తో ఇద్దరూ కలిసి ఉన్న ఒక ఫోటో బయటపడింది. ఈ ఫోటో ఆధారంగా పోలీసులు రంగంలోకి దిగారు. వారిద్దరూ ఆంధ్రప్రదేశ్‌లోని ఒక ప్రాంతంలో ఉన్నట్లు కనుగొని, కేసును ఛేదించారు. ఆ మహిళ, మైనర్ బాలుడిని సత్తుపల్లికి తీసుకువచ్చారు.

బాలుడు మైనర్ కావడంతో పోలీసులు అతడికి కౌన్సిలింగ్ ఇచ్చి తల్లిదండ్రుల వద్దకు పంపారు. ఆ వివాహితపై పోక్సో కేసు నమోదు చేసి రిమాండ్‌కు తరలించారు. ఒక మహిళపై పోక్సో కేసు నమోదు కావడం సత్తుపల్లి ప్రాంతంలో.. రాష్ట్రవ్యాప్తంగా చర్చనీయాంశంగా మారింది. ఇలాంటి సంఘటనలు చాలా అరుదుగా జరుగుతున్నప్పటికీ.. చిన్నారుల భద్రత, సమాజ నైతిక విలువలపై తీవ్ర ప్రశ్నలను లేవనెత్తుతున్నాయి. నేటి సమాజంలో పిల్లలు కేవలం శారీరకంగానే కాకుండా, మానసికంగా కూడా సురక్షితంగా ఉన్నారా అనే సందేహాన్ని కలిగిస్తున్నాయి. తల్లిదండ్రులు తమ పిల్లలతో మరింత సమయం గడపడం, వారికి సరైన మార్గదర్శకత్వం ఇవ్వడం.. బయటి ప్రపంచంతో వ్యవహరించేటప్పుడు జాగ్రత్తలు నేర్పడం వంటివి చేయాల్సిన అవసరం ఎంతైనా ఉంది.

పోక్సో చట్టం లింగంతో సంబంధం లేకుండా పనిచేస్తుందని.. నేరం చేసిన వారెవరికైనా శిక్ష తప్పదని అధికారులు స్పష్టం చేశారు. ఈ చట్టం 18 సంవత్సరాల లోపు బాలురు, బాలికలను లైంగిక దాడుల నుంచి రక్షించేందుకు 2012లో రూపొందించబడింది. మైనర్ పిల్లలతో శారీరక సంబంధాలు, లైంగిక వేధింపులు చేసిన వారెవరికైనా ఈ చట్టం ప్రకారం కఠిన శిక్షలు విధించబడతాయి.