ములుగు జిల్లా అభివృద్ధికి అటవీశాఖ అనుమతులు

తెలంగాణ కేబినెట్ సమావేశాల్లో మంత్రి సీతక్క చేసిన సుదీర్ఘ పోరాటం ఫలించింది. ఆమె నియోజకవర్గమైన ములుగు జిల్లా అభివృద్ధికి అటవీశాఖ గ్రీన్‌సిగ్నల్ ఇచ్చింది. మంత్రిగా బాధ్యతలు చేపట్టిన నాటి నుంచి ములుగు అభివృద్ధికి గట్టిగా కృషి చేస్తున్న సీతక్క.. కేబినెట్ సమావేశంలో తన ప్రతిపాదనలను బలంగా వినిపించారు. అటవీశాఖ పచ్చజెండా ఊపడంతో, ములుగు జిల్లా సమగ్ర అభివృద్ధికి సీతక్క నాయకత్వంలో బలమైన పునాదులు పడ్డాయి. ఇది గిరిజన ప్రాంతాల అభివృద్ధికి ముఖ్యమైన మైలురాయిగా భావించవచ్చు.

ములుగుకు వైద్యం, రోడ్లు, పర్యాటకం..

ములుగు జిల్లా ప్రజల చిరకాల కోరికలు నెరవేరుస్తున్నట్లు మంత్రి సీతక్క సంతోషం వ్యక్తం చేశారు. ముఖ్యంగా.. జిల్లా పరిధిలోని కంతనపల్లి, కొండపర్తి, కొడిశెల, ఐలాపురం, పాకాల, దుబ్బగూడెం వరకు కొత్త రోడ్ల నిర్మాణానికి అనుమతులు లభించాయి. ఈ రోడ్లు గిరిజన ప్రాంతాలకు రవాణా సౌకర్యాన్ని మెరుగుపరిచి, వారి దైనందిన జీవితాన్ని సులభతరం చేస్తాయి.

ఆరోగ్య రంగంలోనూ ములుగుకు శుభవార్త అందింది. పాకాల కొత్తగూడెంలో 30 పడకల ఆసుపత్రి నిర్మాణానికి క్లియరెన్స్ వచ్చింది. ఈ ఆసుపత్రి నిర్మాణంతో ఎంతో మంది గిరిజన ప్రజలకు నాణ్యమైన వైద్య సేవలు అందుబాటులోకి వస్తాయి. మారుమూల ప్రాంతాల్లో కూడా వైద్యం అందుబాటులో లేక ఇబ్బందులు పడుతున్న ప్రజలకు ఇది పెద్ద ఊరట. పర్యాటక రంగాన్ని ప్రోత్సహించే దిశగా, తాడ్వాయి, ఏటూరు నాగారం ప్రాంతాల్లో ఎకో టూరిజం అభివృద్ధికి ప్రత్యేక సఫారీ వాహనాలను మంజూరు చేసినట్లు సీతక్క తెలిపారు. ఇది స్థానికంగా ఉపాధి అవకాశాలను పెంచడంతో పాటు.. ములుగు జిల్లాను ఒక ప్రముఖ పర్యాటక కేంద్రంగా తీర్చిదిద్దడానికి దోహదపడుతుంది.

మంత్రి సీతక్క హర్షం..

తెలంగాణ వైల్డ్‌లైఫ్ బోర్డు నిర్ణయంపై మంత్రి సీతక్క హర్షం వ్యక్తం చేశారు. తనకు మద్దతు తెలిపిన అటవీ, పర్యావరణ శాఖ మంత్రి కొండా సురేఖకు... అలాగే వైల్డ్‌లైఫ్ బోర్డు సభ్యులకు కృతజ్ఞతలు తెలిపారు. మంత్రిగా తన బాధ్యతలను సమర్థవంతంగా నిర్వర్తిస్తూనే.. తన నియోజకవర్గం అభివృద్ధికి నిరంతరం పాటుపడతానని ఆమె స్పష్టం చేశారు.

ఈ సందర్భంగా.. ప్రతిపక్షాల విమర్శలపైనా ఆమె ఘాటుగా స్పందించారు. బీఆర్ఎస్, బీజేపీ నాయకులు కావాలనే కాంగ్రెస్ ప్రభుత్వంపై బురద చల్లే ప్రయత్నం చేస్తున్నారని విమర్శించారు. ఎవరు ఎన్ని ప్రయత్నాలు చేసినా కాంగ్రెస్ ప్రభుత్వాన్ని ప్రజల మనసుల్లో నుంచి తుడిచిపెట్టలేరని సీతక్క ధీమా వ్యక్తం చేశారు. ఇదిలా ఉండగా.. ములుగు జిల్లాను సమ్మక్క సారలమ్మ జిల్లాగా మార్చాలని తెలంగాణ ప్రభుత్వం నిర్ణయించిన విషయం తెలిసిందే. దీనిపై గెజిట్ నోటిఫికేషన్ కూడా విడుదల చేశారు.