తెలంగాణలో 2.5 కోట్ల మందికి,,,,,,ఆయుష్మాన్ భారత్ హెల్త్ కార్డులు

కేంద్ర ప్రభుత్వం ప్రవేశపెట్టిన ఆయుష్మాన్ భారత్ డిజిటల్ మిషన్ కింద డిజిటల్ హెల్త్ కార్డుల జారీలో తెలంగాణ రాష్ట్రం వేగంగా దూసుకుపోతోంది. ఇప్పటి వరకు రాష్ట్రంలో 2.50 కోట్ల మంది ఆయుష్మాన్ భారత్ హెల్త్ అకౌంట్(అభా) పొందారు. వీరిలో 68 లక్షల మంది తమ హెల్త్ రిపోర్టులను అభాతో అనుసంధానం చేసుకున్నారు. ఒక్క జులై నెలలోనే 2.36 లక్షల మంది తమ రికార్డులను డిజిటల్‌గా లింక్ చేసుకున్నారు.

 ఏంటి ఈ అభా అకౌంట్?

హెల్త్ రికార్డులను డిజిటలైజ్ చేసి రోగులకు మెరుగైన వైద్య సేవలు అందించడమే ఈ పథకం ముఖ్య ఉద్దేశ్యం. ప్రతి అభా కార్డుకు 14 అంకెల యూనిక్ ఐడీ కేటాయించబడుతుంది. ఈ ఐడీ సహాయంతో ఆరోగ్య సమస్యలు, ల్యాబ్ రిపోర్టులు, మందుల వివరాలు, గతంలో తీసుకున్న చికిత్సలు వంటి అన్ని మెడికల్ రికార్డులను ఒకే చోట నిక్షిప్తం చేయవచ్చు. రోగి ఏ ఆసుపత్రికి వెళ్లినా, డాక్టర్లు ఈ అకౌంట్ ద్వారా వారి హెల్త్ హిస్టరీని త్వరగా తెలుసుకొని సరైన చికిత్స అందించడం సులభమవుతుంది.

అభా అకౌంట్ ఎలా పొందాలి?

అభా అకౌంట్ పొందడం చాలా సులభం. రెండు మార్గాల ద్వారా దీన్ని పొందవచ్చు రాష్ట్రంలోని అన్ని ప్రభుత్వ ఆసుపత్రుల్లోని సిబ్బంది అభా ఐడీని జనరేట్ చేసి ఇస్తారు. దీనికోసం ఆధార్ నంబర్ లేదా డ్రైవింగ్ లైసెన్స్ వంటి గుర్తింపు కార్డు అవసరం. రోగులు స్వయంగా కూడా ఆయుష్మాన్ భారత్ డిజిటల్ మిషన్ అధికారిక వెబ్‌సైట్ abdm.gov.in లోకి వెళ్లి కార్డు పొందవచ్చు. ఈ వెబ్‌సైట్‌లో ఆధార్ లేదా డ్రైవింగ్ లైసెన్స్ వివరాలను నమోదు చేసి, సులభంగా అభా అకౌంట్ క్రియేట్ చేసుకోవచ్చు.

అభా కార్డుతో లాభాలు

అభా కార్డు ఉన్న రోగులకు ఓపీ రిజిస్ట్రేషన్ కోసం క్యూలో నిలబడాల్సిన అవసరం లేదు.

అభా యాప్‌ను మొబైల్‌లో డౌన్‌లోడ్ చేసుకొని, ఆసుపత్రిలోని క్యూఆర్ కోడ్‌ను స్కాన్ చేయడం ద్వారా టోకెన్ పొందవచ్చు. ఇంటి నుంచే టోకెన్ జనరేట్ చేసుకునే సౌలభ్యం కూడా ఉంది.

పేషెంట్ హెల్త్ హిస్టరీ మొత్తం అకౌంట్‌లో నిక్షిప్తమై ఉండటం వల్ల డాక్టర్లు సమస్యను త్వరగా అర్థం చేసుకొని చికిత్స అందించడం సులభమవుతుంది.

ఈ డిజిటల్ హెల్త్ మిషన్ ద్వారా దేశవ్యాప్తంగా ఆరోగ్య రికార్డులను ఏకీకృతం చేసి, భవిష్యత్తులో ప్రజలకు మరింత నాణ్యమైన వైద్య సేవలు అందించడమే కేంద్ర ప్రభుత్వం లక్ష్యంగా పెట్టుకుంది. ఈ కార్డుల జారీని తప్పనిసరి చేయాలని నేషనల్ మెడికల్ కమిషన్  కూడా మెడికల్ కాలేజీలు, ఆసుపత్రులకు ఆదేశాలు జారీ చేసింది.