హైదరాబాద్ వాసులకు మరోసారి డేంజర్ బెల్స్

గత కొన్ని రోజులుగా హైదరాబాద్‌లో వర్షాలు కురుస్తున్నాయి. సోమవారం నాడు కూడా భారీ వర్షం కురిసింది. దీనితో ప్రజలు చాలా ఇబ్బందులు పడ్డారు. వాతావరణ శాఖ మరో రెండు గంటల పాటు వర్షం కురుస్తుందని హెచ్చరించింది. జీహెచ్‌ఎంసీ అధికారులు, ట్రాఫిక్ పోలీసులు ప్రజలను అప్రమత్తం చేశారు. వనస్థలిపురం, ఎల్బీనగర్, అల్వాల్, మల్కాజ్‌గిరి ప్రాంతాల్లో కుండపోతగా వాన పడింది. రాజేంద్రనగర్, అత్తాపూర్, మెహదీపట్నం, మియాపూర్, చందానగర్, లింగంపల్లి వంటి ప్రాంతాల్లో కూడా వర్షం దంచికొట్టింది. ఈ ప్రాంత వాసులు జాగ్రత్తగా ఉండాలని అధికారులు హెచ్చరించారు. ఈ వర్షాల వల్ల హైదరాబాద్ నగరంలో జనజీవనం స్తంభించింది. లోతట్టు ప్రాంతాలు నీటితో నిండిపోయాయి.

వర్షాలు మరో రెండు గంటలపాటు కురుస్తాయని వాతావరణ శాఖ హెచ్చరించింది. దీనితో ప్రజలు మరింత ఆందోళన చెందుతున్నారు. భారీ వర్షాల నేపథ్యంలో జీహెచ్‌ఎంసీ అధికారులు అప్రమత్తమయ్యారు. వరద పరిస్థితులను ఎదుర్కోవడానికి అత్యవసర బృందాలు రంగంలోకి దిగాయి. రోడ్లపై నిలిచిన నీటిని తొలగించేందుకు కొత్తగా ఏర్పాటు చేసిన హైడ్రా బృందాలు కూడా పనిచేస్తున్నాయి. లోతట్టు ప్రాంతాల ప్రజలు జాగ్రత్తగా ఉండాలని అధికారులు సూచించారు. అవసరమైతే తప్ప రాత్రి 9 గంటల వరకు ఇళ్ల నుంచి బయటకు రావద్దని అధికారులు చెప్పారు.

హైదరాబాద్ ట్రాఫిక్ పోలీసులు కూడా ప్రజలను హెచ్చరించారు. వర్షం కారణంగా ప్రధాన కూడళ్లలో ట్రాఫిక్ నిలిచిపోయింది. దీనివల్ల ప్రయాణికులు చాలా ఇబ్బందులు పడుతున్నారు. ట్రాఫిక్ రద్దీ ఎక్కువగా ఉన్న ప్రాంతాలను తప్పించి, ప్రత్యామ్నాయ మార్గాల్లో వెళ్లాలని ట్రాఫిక్ పోలీసులు సూచించారు. రోడ్లపై నిలిచిన నీరు, తెరుచుకున్న మ్యాన్‌హోల్స్ కారణంగా వాహనదారులు జాగ్రత్తగా ఉండాలని హెచ్చరించారు. ముఖ్యంగా ద్విచక్ర వాహనదారులు మరింత జాగ్రత్తగా ఉండాలని సూచించారు. వాహనదారులు నెమ్మదిగా, జాగ్రత్తగా ప్రయాణించాలని పోలీసులు తెలిపారు. రోడ్డు పక్కన ఉన్న చెట్లు, విద్యుత్ స్తంభాలకు దూరంగా ఉండాలని అధికారులు విజ్ఞప్తి చేశారు. అంతే కాకుండా.. తెలంగాణ రాష్ట్ర వ్యాప్తంగా కూడా వచ్చే నాలుగు రోజులు భారీ నుంచి అతి భారీ వర్షాలు కురిసే అవకాశం ఉందని వాతావరణ శాఖ అధికారులు హెచ్చరిస్తున్నారు. పశ్చిమ మధ్య బంగాళాఖాతంలో ఏర్పడిన అల్పపీడం కారణంగా ఆగస్టు 13వ తేదీ నుంచి రాష్ట్ర వ్యాప్తంగా కూడా వర్షాల తీవ్రత అధికంగా ఉండే అవకాశం ఉందని వాతావరణ శాఖ అధికారులు తెలిపారు.