కోదండరామ్, అమీర్ అలీఖాన్ ఎమ్మెల్సీల నియామకం రద్దు..సుప్రీం కోర్టు సంచలన తీర్పు

తెలంగాణలో గవర్నర్ కోటా ఎమ్మెల్సీల నియామకంపై సుప్రీంకోర్టు సంచలన తీర్పును ఇచ్చింది. తెలంగాణ జనసమితి అధ్యక్షుడు కోదండరాం , సీనియర్ జర్నలిస్ట్ అమీర్ అలీఖాన్ నియామకాలను నిలిపివేస్తూ సర్వోన్నత న్యాయస్థానం ఆదేశాలు జారీ చేసింది. ఈ తీర్పుతో ఈ ఇద్దరు నేతల ఎమ్మెల్సీ పదవులు తాత్కాలికంగా రద్దయ్యాయి. ఈ నియామకాలపై భారత రాష్ట్ర సమితి (బీఆర్ఎస్) నేతలు దాసోజు శ్రవణ్, సత్యనారాయణ దాఖలు చేసిన పిటిషన్లను సుప్రీంకోర్టు విచారించింది.

కోర్టు తీర్పు ప్రకారం.. గతంలో ఇచ్చిన మధ్యంతర ఆదేశాలు ఉన్నప్పటికీ.. కోదండరాం, అమీర్ అలీఖాన్‌లు ప్రమాణ స్వీకారం చేయడం సరికాదని ధర్మాసనం అభిప్రాయపడింది. ప్రభుత్వం లేదా గవర్నర్ తీసుకునే ఏ చర్య అయినా, సుప్రీంకోర్టు ఇచ్చే తుది తీర్పుకు లోబడి ఉంటుందని ధర్మాసనం తేల్చి చెప్పింది. ఈ కేసులో తదుపరి విచారణను సెప్టెంబర్ 17వ తేదీకి వాయిదా వేసింది. ఈ విషయంలో సుప్రీంకోర్టు జస్టిస్ బి.వి. నాగరత్న, జస్టిస్ ఆగస్టిన్ జార్జి మసిహ్ ధర్మాసనం ఈ తీర్పును వెలువరించింది.

శాసనమండలి అనేది రాష్ట్ర శాసన వ్యవస్థలో ఒక ముఖ్యమైన భాగం. గవర్నర్ కోటా కింద ఎమ్మెల్సీలను నియమించడం వెనుక రాజ్యాంగపరమైన ఉద్దేశ్యం ఉంది. కళలు, సాహిత్యం, శాస్త్రాలు, సామాజిక సేవ వంటి రంగాల్లో విశేష కృషి చేసిన వారిని ఈ పదవుల ద్వారా గౌరవించి, వారి అనుభవాన్ని శాసన నిర్మాణానికి ఉపయోగించుకోవడం దీని లక్ష్యం. అయితే.. తరచుగా రాజకీయ పార్టీలు తమ నాయకులను లేదా మద్దతుదారులను ఈ కోటాలో నియమించడంపై వివాదాలు తలెత్తుతుంటాయి. ఈ విషయంలో గతంలో గవర్నర్‌కు, ప్రభుత్వానికి మధ్య ఘర్షణ కూడా ఏర్పడింది. ప్రస్తుత ప్రభుత్వం నామినేట్ చేసిన కోదండరాం, అమీర్ అలీఖాన్ నియామకాలపై వివాదం కొనసాగుతోంది.

తెలంగాణ జనసమితి అధినేతగా కోదండరాంకు ఉన్న రాజకీయ అనుబంధం కారణంగా.. ఆయన నియామకంపై తొలినుంచి సందేహాలు వ్యక్తమయ్యాయి. గతంలో ఇదే కారణంతో బీఆర్ఎస్ ప్రభుత్వం సిఫార్సు చేసిన పేర్లను అప్పటి గవర్నర్ తిరస్కరించారు. ఇప్పుడు అదే అంశాన్ని ప్రస్తావిస్తూ దాసోజు శ్రవణ్ సుప్రీంకోర్టును ఆశ్రయించారు. ఈ తీర్పు తెలంగాణ రాజకీయాలపై తీవ్ర ప్రభావాన్ని చూపే అవకాశం ఉంది.