అరుదైన ఘనత సాధించిన భద్రాద్రి దేవస్థానం

భద్రాచలం భద్రాద్రి శ్రీసీతారామచంద్ర స్వామి ఆలయం దక్షిణాది అయోధ్యగా ప్రసిద్ధి గాంచింది. ప్రతి ఏటా ఇక్కడ శ్రీరామనవమి వేడుకలు ఎంతో అంగరంగ వైభవంగా నిర్వహిస్తారు. ప్రభుత్వం తరఫున భద్రాద్రి రామయ్యకు పట్టు వస్త్రాలు సమర్పిస్తారు. నిత్యం వందలాది మంది భక్తులు రాములవారి దర్శనానికి తరలి వస్తారు. ఇదిలా ఉండగా తాజాగా భద్రాద్రి ఆలయం అరుదైన ఘనత సాధించింది. దక్షిణాది అయోధ్యగా వాసికెక్కిని భద్రాద్రి ఆలయానికి ఐఎస్ఓ (ఇంటర్నేషనల్ ఆర్గనైజేషన్ స్టాండర్టైజేషన్) గుర్తింపు లభించింది. ఆ వివరాలు..

భద్రాచలంలో కొలువైన శ్రీసీతారామచంద్ర స్వామి ఆలయం మరో అరుదైన ఘనత సాధించింది. భద్రాద్రి ఆలయానికి ఐఎస్‌వో గుర్తింపు లభించడం విశేషం. దీనికి సంబంధించి ఐఎస్‌వో 9001:2015, 22000:2018 సర్టిఫికెట్లను రాష్ట్ర దేవాదాయ శాఖ మంత్రి కొండా సురేఖ.. దేవస్థానం ఈవో ఎల్‌ రమాదేవికి మంగవారం అందజేశారు. హైదరాబాద్‌లో ఆమెకి ఈ సర్టిఫికెట్లు అందజేశారు మంత్రి కొండా సురేఖ. ‌ఈ రెండు ఐఎస్ఓ సర్టిఫికెట్లు.. ఆహార భద్రత, ప్రసాదాల తయారీ, నిర్వాహణ స్థాయిల్లో మెరుగైన ప్రమాణాలు పాటించినందుకు గాను అందించినట్లు తెలిపారు.

సర్టిఫికెట్ల జారీకి సంబంధించి గత నెల అనగా జులై 29న ఐఎస్‌వో బృందం భద్రాద్రి ఆలయాన్ని సందర్శించి గుడిలోని పలు విభాగాలను పరిశీలించింది. భద్రాద్రి ఆలయానికి ఐఎస్‌వో గుర్తింపు లభించడంతో దేవస్థానం అధికారులు, వైదిక పరిపాలన సిబ్బంది సంతోషం వ్యక్తం చేస్తున్నారు. భద్రాద్రి ఆలయానికి ఇప్పటికే ఎఫ్‌ఎస్‌ఎస్‌ఎఐ గుర్తింపు కూడా లభించింది. ఇదే కాక కొన్ని రోజుల క్రితమే భద్రాద్రి ఆలయంలోని స్వామి వారి చిత్రాలకు సంబంధించి కాపీరైట్‌ హక్కులను సాధించిన సంగతి తెలిసిందే. ఇప్పుడు ఐఎస్ఓ సర్టిఫికెట్ రావడంపై భద్రాద్రి భక్తులు హర్షం వ్యక్తం చేస్తున్నారు.

ఐఎస్ఓ గుర్తింపు అంటే.. ఒక సంస్థ అంతర్జాతీయ ప్రమాణాలకు అనుగుణంగా దాని సేవలు, ఉత్పత్తులు, నిర్వహణ వ్యవస్థలను కలిగి ఉందని నిర్ధారించే ఒక గుర్తింపు. ఐఎస్ఓ సర్టిఫికెట్ లభించడం అంటే ఆ సంస్థ నాణ్యత, భద్రత సమర్థతకు నిదర్శనంగా భావిస్తారు. ఐఎస్ఓ అనేది ప్రపంచవ్యాప్తంగా మెరుగైన ప్రమాణాలను అభివృద్ధి చేసే ఒక స్వతంత్ర, ప్రభుత్వేతర అంతర్జాతీయ సంస్థ. ఈ గుర్తింపు లభించిన సంస్థలపై వినియోగదారులకు నమ్మకం ఉంటుంది. అలానే ఇవి అంతర్జాతీయ ప్రమాణాలకు అనుగుణంగా ఉన్నాయనే భరోసాని కలిగిస్తాయి.