నిరుద్యోగులకు శుభవార్త.. ఉద్యోగ నోటిఫికేషన్ విడుదల

గత కొంత కాలంలో తెలంగాణలో ఉద్యోగ నోటిఫికేషన్లు విడుదల చేయడం లేదని నిరుద్యోగులు ధర్నాలు, నిరసన కార్యక్రమాలు చేపట్టారు. ఖాళీగా ఉన్న పోస్టులకు నోటిఫికేషన్ విడుదల చేయాలని డిమాండ్ చేస్తూ వస్తున్నారు. అయితే వారందరికీ తెలంగాణ ప్రభుత్వం శుభవార్త చెప్పింది. పోలీస్ రిక్రూట్‌మెంట్ బోర్డు నుంచి ఓ నోటిఫికేషన్ విడుదల చేశారు. ఇక నుంచి తెలంగాణలో నోటిఫికేషన్ల పరంపర కొనసాగే అవకాశం ఉందని విద్యా నిపుణులు చెబుతున్నారు. త్వరలోనే ఉద్యోగ క్యాలెండర్ కూడా విడుదల చేసే అవకాశాలు ఉన్నట్లు తెలుస్తోంది. ఈ క్యాలెండర్లో పేర్కొన్న విధంగానే తేదీల వారీగా నోటిఫికేషన్లు విడుదల చేసే అవకాశం ఉంది. ఇక ప్రస్తుతం విడుదల చేసిన ఈ నోటిఫికేషన్ వివరాలు ఇలా ఉన్నాయి.

తెలంగాణ పోలీస్ రిక్రూట్‌మెంట్ బోర్డు (TGPBR) అసిస్టెంట్ పబ్లిక్ ప్రాసిక్యూటర్ (APP) పోస్టుల భర్తీకి నోటిఫికేషన్ విడుదల చేసింది. ఈ నోటిఫికేషన్ ద్వారా మొత్తం 118 ఖాళీలను భర్తీ చేయనున్నారు. రాష్ట్రవ్యాప్తంగా ఇప్పటికే 285 APP పోస్టులు ఉన్నప్పటికీ, వాటిలో 120 మంది మాత్రమే ప్రస్తుతం విధుల్లో ఉన్నారు. ఈ నేపథ్యంలో.. తెలంగాణ ప్రభుత్వం కొత్త నియామకాలకు అనుమతి ఇవ్వడంతో డిపార్ట్‌మెంట్ ఆఫ్ ప్రాసిక్యూషన్ (DOP) ఈ నోటిఫికేషన్‌ను జారీ చేసింది. వీటిలో మల్టీ జోన్ 1లో 50 పోస్టులు ఖాళీగా ఉండగా.. మల్టీ జోన్‌ 2లో కూడా 68 పోస్టులు ఖాళీగా ఉన్నాయి.

అర్హతలు, ఎంపిక విధానం..

ఈ పోస్టులకు దరఖాస్తు చేసుకునే అభ్యర్థులు కొన్ని ముఖ్యమైన అర్హతలు కలిగి ఉండాలి. గుర్తింపు పొందిన విశ్వవిద్యాలయం నుంచి లా డిగ్రీ పూర్తి చేసి ఉండాలి. జనరల్ డిగ్రీ చేసిన వారు ఈ పోస్టులకు దరఖాస్తు చేసుకునేందుకు అర్హత లేదు. లా డిగ్రీతో పాటు.. రాష్ట్రంలోని క్రిమినల్ కోర్టుల్లో కనీసం మూడేళ్లు న్యాయవాదిగా పనిచేసిన అనుభవం తప్పనిసరిగా ఉండాలని నోటిఫికేషన్లో పేర్కొన్నారు.

ఇక దరఖాస్తు చేసే అభ్యర్థుల యొక్క వయస్సు జూలై 2025 నాటికి 34 ఏళ్లు మించకూడదు. ఎస్సీ, ఎస్టీ, ఓబీసీ, దివ్యాంగ అభ్యర్థులకు ప్రభుత్వ నిబంధనల ప్రకారం వయస్సులో సడలింపులు ఉంటాయి. ఈ పోస్టులకు ఎంపిక కావడానికి బోర్డు రాత పరీక్షను నిర్వహిస్తుంది. ఈ పరీక్షలో ఆబ్జెక్టివ్ విధానంలో పేపర్-1, డిస్క్రిప్టివ్ విధానంలో పేపర్-2 ఉంటాయి.ఈ పరీక్షలో మెరిట్ మార్కులు సాధించిన వారు ఉద్యోగం పొందే అవకాశం ఉంటుంది. ఈ పోస్టులకు ఎంపికైన అభ్యర్థులకు నెలకు రూ.నెలకు రూ. 54,220 నుంచి రూ. 1,33,630 వరకు జీతం అందుతుంది.

దరఖాస్తు చేసుకునే అభ్యర్థులు పూర్తి వివరాల కోసం అధికారిక వెబ్‌సైట్ https://www.tgprb.in/ను సందర్శించి, సూచనలను అనుసరించి ఆన్‌లైన్‌లో దరఖాస్తు చేసుకోవాలి. ఈ నియామకాలతో ప్రాసిక్యూషన్ విభాగంలో సిబ్బంది కొరత తీరి, కేసుల పరిష్కారం వేగవంతం అవుతుందని ప్రభుత్వం భావిస్తోంది.