కృష్ణాష్టమి రోజున తన జీవిత లక్ష్యాన్ని రివీల్ చేసిన సీఎం రేవంత్

తెలంగాణను ప్రపంచస్థాయిలో అత్యంత అభివృద్ధి చెందిన రాష్ట్రంగా తీర్చిదిద్దడమే తన జీవిత లక్ష్యమని ముఖ్యమంత్రి ఎ. రేవంత్ రెడ్డి అన్నారు. ప్రజల సమస్యల పరిష్కారానికి తనకు వచ్చిన అవకాశాన్ని దైవ ఆశీర్వాదంగా భావిస్తానని ఆయన చెప్పారు. టీజీ జెన్కో ఆడిటోరియంలో హసిత బాష్పాలు అనే కావ్య సంపుటిని ఆవిష్కరించిన కార్యక్రమంలో ఆయన ఈ విషయాలను వెల్లడించారు. ఈ పుస్తకాన్ని రచించిన శ్రీరామ్ , కవి అందెశ్రీని అభినందించారు.

సేవే తన లక్ష్యం, ప్రజా సంక్షేమమే ప్రధానం..

ఒక సామాన్య రైతు కుటుంబం నుండి వచ్చిన తాను నాలుగు కోట్ల ప్రజల సంక్షేమం, అభివృద్ధి కోసం మాత్రమే పనిచేస్తానని సీఎం అన్నారు. శత్రుత్వం, ద్వేషాలకు తాను ప్రాధాన్యత ఇవ్వనని స్పష్టం చేశారు. కర్మ సిద్ధాంతాన్ని తాను బలంగా విశ్వసిస్తానని పేర్కొన్నారు. ఏ మంత్రి పదవి లేకుండానే, ఏ హోదాలోనూ పనిచేయకుండా నేరుగా ముఖ్యమంత్రి పదవిలోకి రావడం దైవ సంకల్పంగా భావిస్తున్నట్లు వివరించారు.

ఈ అధికారం ప్రజల కోసమేనని చెప్పారు. డాక్టర్ బీఆర్ అంబేద్కర్ చెప్పినట్లుగా అభివృద్ధి అంటే కేవలం అద్దాల మేడలు, రంగుల గోడలు మాత్రమే కాదని, పేదవాడి ఆత్మగౌరవం నిలబడటమే నిజమైన అభివృద్ధి అని అన్నారు. ఈ లక్ష్యంతోనే తొలి విడతగా నాలుగు లక్షల ఇందిరమ్మ ఇండ్ల నిర్మాణం చేపట్టామని, రాష్ట్రంలోని 3.10 కోట్ల మందికి సన్నబియ్యం అందిస్తున్నామని తెలిపారు. పదేళ్లుగా రేషన్ కార్డులు లేక ఇబ్బందులు పడుతున్న వారికి ఇప్పుడు వాటిని మంజూరు చేస్తున్నామని చెప్పారు.

తాను ప్రజల్లో ఒకడినని, ప్రజలకు సేవ చేయడమే తన బాధ్యతని సీఎం అన్నారు. గూడ అంజయ్య, దాశరథి కృష్ణమాచార్య, కాళోజీ నారాయణ రావు, అందెశ్రీ, గద్దర్, గోరటి వెంకన్న వంటి ఎందరో గొప్ప కవులు, కళాకారులు తెలంగాణ ఉద్యమానికి స్ఫూర్తినిచ్చారని గుర్తు చేసుకున్నారు.

నిజమైన ఉద్యమకారులు తమ గురించి తాము గొప్పగా చెప్పుకోరని, వారు ఏమీ ఆశించకుండానే ప్రజల కోసం పనిచేశారని ప్రశంసించారు. దేశానికి స్వాతంత్ర్యం వచ్చి వంద సంవత్సరాలు పూర్తయ్యే 2047 నాటికి తెలంగాణను 3 ట్రిలియన్ డాలర్ల ఆర్థిక వ్యవస్థగా తీర్చిదిద్దడమే తన లక్ష్యమని సీఎం రేవంత్ రెడ్డి తెలిపారు. ఈ కార్యక్రమానికి సీఎం కార్యాలయం ప్రిన్సిపల్ సెక్రటరీ శ్రీనివాస రాజు, కవులు, సాహితీ ప్రముఖులు హాజరయ్యారు.