"నందిగామలో వినాయకుడి అలంకరణకు రూ.3.10 కోట్లు ఖర్చు"
Telangana Telugu | Suryaa Desk | Published : Wed, Sep 03, 2025, 11:57 PM
నందిగామ పట్టణంలోని వాసవి మార్కెట్లో ప్రతిష్టించిన గణపతి విగ్రహం భక్తులను ప్రత్యేకంగా ఆకర్షిస్తోంది. ఇక్కడ వినాయకుడిని రూ.3.10 కోట్ల విలువైన కరెన్సీ నోట్లతో అద్భుతంగా అలంకరించారు.వాసవి మార్కెట్ గణపతి కమిటీ 43వ వార్షికోత్సవాలను పురస్కరించుకుని ఈ వినూత్న అలంకరణను చేపట్టింది. మండపం, విగ్రహాన్ని వివిధ నోట్లు ఉపయోగించి శోభాయమానంగా తీర్చిదిద్దడంతో భక్తులు, సందర్శకులు గణపతిని దర్శించేందుకు భారీగా తరలివస్తున్నారు. కరెన్సీ నోట్లతో అలంకరించిన గణపతిని చూసి భక్తులు ప్రత్యేక పూజలు నిర్వహించి తీర్థప్రసాదాలు స్వీకరిస్తున్నారు.ప్రతి సంవత్సరం వినాయక చవితి సందర్భంగా ఏదో ఒక ప్రత్యేకతతో మండపం ఏర్పాటు చేయడం తమ సంప్రదాయమని కమిటీ సభ్యులు తెలిపారు. ఈసారి కరెన్సీ నోట్ల అలంకరణతో ఆ సంప్రదాయాన్ని కొనసాగించినట్టు వారు చెప్పారు. అంతేకాకుండా, ఉపయోగించిన నోట్ల భద్రత కోసం అన్ని జాగ్రత్తలు తీసుకున్నామని స్పష్టం చేశారు. ఈ ప్రత్యేక గణపతి దర్శనం కోసం పరిసర ప్రాంతాల నుండి కూడా భక్తులు తరలివస్తున్నారు.
|
|