స్కూల్ బస్సు దుర్ఘటన.. నల్గొండలో చిన్నారి మృతి, పాఠశాల సీజ్

నల్గొండ జిల్లా కేంద్రంలోని దేవరకొండ రోడ్డులో గల మాస్టర్ మైండ్ పాఠశాలకు చెందిన విద్యార్థిని జస్మిత (5) స్కూల్ బస్సు కింద పడి దుర్మరణం చెందింది. కనగల్లు మండలం తొరగల్లు గ్రామానికి చెందిన చింతపల్లి రాధిక-సైదులు దంపతుల కుమార్తె అయిన జస్మిత, ఎల్‌కేజీ చదువుతూ, గురువారం ఉదయం స్కూల్ బస్సులో పాఠశాలకు వెళ్లింది. బస్సు నుంచి దిగి తరగతి గది వైపు వెళ్తుండగా, డ్రైవర్ అజాగ్రత్తగా బస్సును కదిలించడంతో ఈ దుర్ఘటన జరిగింది.
జస్మిత బస్సు ఎడమ చక్రం కింద పడి తీవ్రంగా గాయపడింది. వెంటనే పాఠశాల సిబ్బంది ఆమెను నల్గొండ ప్రభుత్వ ఆసుపత్రికి తరలించగా, అప్పటికే మృతి చెందినట్లు వైద్యులు నిర్ధారించారు. ఈ ఘటనతో తల్లిదండ్రులు, బంధువులు కన్నీరు మున్నీరయ్యారు. బస్సు డ్రైవర్ నిర్లక్ష్యం వల్లే ఈ ప్రమాదం జరిగిందని జస్మిత తల్లి రాధిక ఆరోపించారు. ప్రైవేటు పాఠశాలలు శిక్షణ లేని డ్రైవర్లను నియమించడం, బస్సులో సహాయకులను ఏర్పాటు చేయకపోవడంపై స్థానికులు ఆగ్రహం వ్యక్తం చేశారు.
ఈ ఘటనపై నల్గొండ వన్‌టౌన్ పోలీసులు కేసు నమోదు చేసి, బస్సు డ్రైవర్ విజయ్‌ను అదుపులోకి తీసుకుని విచారణ జరుపుతున్నారు. విద్యార్థి సంఘాలు ఈ ఘటనను నిరసిస్తూ పాఠశాల ఎదుట ధర్నా చేశాయి, న్యాయం చేయాలని డిమాండ్ చేశాయి. ఈ దుర్ఘటన స్థానికంగా తీవ్ర కలకలం రేపింది, పాఠశాల యాజమాన్యం నిర్లక్ష్యంపై విమర్శలు వెల్లువెత్తాయి.
జిల్లా కలెక్టర్ ఇలా త్రిపాఠి ఆదేశాల మేరకు, జిల్లా విద్యాశాఖ అధికారి బొల్లారం బిక్షపతి ఘటనపై విచారణ జరిపి, మాస్టర్ మైండ్ పాఠశాలను సీజ్ చేశారు. విచారణ పూర్తయ్యే వరకు పాఠశాల మూసివేయాలని ఆదేశించారు, తదుపరి చర్యలు తీసుకుంటామని అధికారులు తెలిపారు. ఈ ఘటన పాఠశాల బస్సుల భద్రతా ప్రమాణాలపై మరోసారి ప్రశ్నలు లేవనెత్తింది.