మహిళలకు దసరా కానుక.. సెప్టెంబర్ 15వ తేదీ లోపే

బతుకమ్మ పండుగకు ముందుగానే తెలంగాణ ప్రభుత్వం మహిళలకు శుభవార్త అందించింది. రాష్ట్రవ్యాప్తంగా ఇందిరా మహిళా శక్తి పథకం కింద ‘అక్క-చెల్లెళ్లకు మీ రేవంతన్న కానుక’ పేరుతో చేనేత చీరల పంపిణీని చేపట్టనుంది. గతంలో ఒక్కొక్కరికీ ఒకటే చీర ఇచ్చినప్పటికీ.. ఈసారి ప్రతి మహిళకు రెండేసి చీరలు అందజేయాలని నిర్ణయించింది. ముఖ్యంగా ఈసారి రూ.200 విలువైన చీరలు కాకుండా.. ఒక్కోటి రూ.800 ఖర్చుతో కూడిన చీరలను అందజేయడం విశేషం. అంటే ఒక్కొక్క మహిళకు రూ.1600 విలువైన కానుక దక్కనుంది. బతుకమ్మ పండుగ ఈ నెల 21వ తేదీ నుంచి ప్రారంభం కానుండగా, ప్రభుత్వం ముందుగానే ఈ పంపిణీని పూర్తి చేయాలని నిర్ణయించింది.

ఉమ్మడి మహబూబ్ నగర్ విషయానికి వస్తే.. నగరపాలక సంస్థ, 19 పురపాలక సంఘాల పరిధిలోని 1,13,670 మంది స్వయం సహాయక సంఘాల సభ్యులకు 2,27,340 చీరలు అవసరం అవుతాయి. ఇక మహబూబ్‌నగర్‌, జోగులాంబ గద్వాల, వనపర్తి, నారాయణపేట, నాగర్‌కర్నూల్‌ జిల్లాల్లో 3,39,110 మంది మహిళలకు 6,78,220 చీరలు కావాలి. మొత్తం 4,52,780 మందికి 9,05,560 చీరలు పంపిణీ చేయాలని ప్లాన్ చేశారు.

ఈ చీరలను చేనేత సహకార సంఘాల ద్వారా తయారు చేసి సరఫరా చేస్తున్నారు. దీని వలన చేనేత కార్మికుల కు ఉపాధి లభించడం మాత్రమే కాకుండా.. రాష్ట్రంలో స్థానిక హ్యాండ్‌లూమ్ పరిశ్రమకు ఊతం లభిస్తోంది. మరోవైపు.. పండుగ సమయంలో ప్రతి ఇంటిలో మహిళలు సంతోషంగా పాల్గొనడానికి ఈ కార్యక్రమం తోడ్పడనుంది. అధికారులు ఇప్పటికే డీఆర్డీవో ద్వారా గ్రామీణ ప్రాంతాల్లోని సభ్యుల వివరాలు, మెప్మా ద్వారా నగర ప్రాంతాల సభ్యుల వివరాలు సేకరించాలని సూచనలు ఇచ్చారు.

సెప్టెంబర్‌ 15వ తేదీ నాటికి జిల్లాకు చీరల సరఫరా పూర్తవుతుందని అధికారులు తెలిపారు. అయితే ఒకేసారి అన్ని చీరలు అందుతాయా? లేక కొంత భాగాన్ని ముందుగా పంపిణీ చేసి, మిగతావి దసరా నాటికి చేరుతాయా అనేది ఆసక్తిగా మారింది. ఈ పథకం ద్వారా పండుగలో మహిళలకు గౌరవం చాటడమే కాకుండా.. పల్లె నుంచి పట్టణం దాకా ఒకే విధమైన ఆనంద వాతావరణం సృష్టించడమే లక్ష్యం. బతుకమ్మ పండుగను తెలంగాణ ఆత్మగౌరవం ప్రతీకగా భావించే నేపథ్యంలో.. ఈసారి చీరల పంపిణీ మహిళల మనసుల్లో మరింత స్థానం సంపాదించే అవకాశముంది.