దసరా పండక్కి స్పెషల్ ట్రైన్.. ఈ స్టేషన్లలో హాల్టింగ్

రెండు తెలుగు రాష్ట్రాల్లో దసరా పండగ హడావుడి మెుదలైంది. అప్పుడే బస్సులు, ట్రైన్లలో ముందస్తు రిజర్వేషన్లు ప్రారంభమయ్యాయి. సొంతూళ్లకు వెళ్లే చాలా మంది అడ్వాన్స్ రిజర్వేషన్లు చేసుకుంటున్నారు. ఇక పండుగ సీజన్‌ సమీపిస్తుండటంతో ట్రైన్లలో ప్రయాణికుల రద్దీ భారీగా పెరిగింది. టికెట్లు దొరక్క, రైళ్ల కోసం గంటల తరబడి ఎదురుచూసే వలస కార్మికుల ఇబ్బందులను దృష్టిలో ఉంచుకుని మధ్య రైల్వే ఒక శుభవార్త చెప్పింది. మహారాష్ట్రలోని ముంబయి, బీవండి ప్రాంతాల్లో జీవనోపాధి కోసం వెళ్లిన వేలాది మంది వలస కార్మికులకు ప్రయోజనం కలిగేలా ముంబయి-కరీంనగర్ మధ్య ప్రత్యేక రైలును నడపనుంది. ఈ రైలు ఈ నెల 30 నుంచి నవంబరు 25 వరకు ప్రతి మంగళవారం అందుబాటులో ఉంటుంది.

రైలు నంబరు 01153 ముంబయి నుంచి కరీంనగర్‌కు ప్రతి మంగళవారం మధ్యాహ్నం 3.30 గంటలకు ముంబయిలోని లోక్‌మాన్య తిలక్ టెర్మినల్ నుంచి బయలుదేరి మరుసటి రోజు ఉదయం 8.30 గంటలకు కరీంనగర్‌కు చేరుకుంటుంది. కరీంనగర్ నుంచి ముంబయికి బుధవారం సాయంత్రం 5.30 గంటలకు బయలుదేరి గురువారం మధ్యాహ్నం 1.40 గంటలకు ముంబయి చేరుకుంటుంది. ఈ రైలు మార్గమధ్యలో కోరుట్ల, మెట్‌పల్లి పట్టణాల్లో ఆగుతుంది. ఈ ట్రైన్ కేవలం పండుగ రద్దీని తగ్గించడమే కాకుండా, బాసర, నాసిక్, షిర్డీ వంటి పుణ్యక్షేత్రాలకు వెళ్లే భక్తులకు కూడా అనుకూలంగా ఉంటుంది.

ప్రస్తుతానికి ఈ రైలు కరీంనగర్ వరకు మాత్రమే నడుస్తున్నప్పటికీ దీన్ని కాగజ్‌నగర్ వరకు పొడిగిస్తే ఉత్తర తెలంగాణ జిల్లాలైన ఆసిఫాబాద్, మంచిర్యాల, పెద్దపల్లి ప్రయాణికులకు కూడా మహారాష్ట్ర నుంచి కనెక్టివిటీ లభిస్తుంది. కరీంనగర్‌లో ఈ రైలు 9 గంటల పాటు నిలిచి ఉంటుంది. ఈ సమయాన్ని సద్వినియోగం చేసుకుని కాగజ్‌నగర్ వరకు రైలును నడిపితే అదనంగా 4 నుంచి 5 గంటల సమయం పడుతుంది. కాగజ్‌నగర్‌లో వాటరింగ్ వంటి సదుపాయాలు కూడా అందుబాటులో ఉండటం దీనికి సానుకూలం. అలాగే ప్రధాన పట్టణమైన జగిత్యాలలో కూడా రైలుకు హాల్టింగ్‌ కల్పిస్తే ఈ ప్రత్యేక రైలు ప్రయోజనం మరింత నెరవేరుతుందని ప్రయాణికులు కోరుతున్నారు. గ్రామీణ ప్రాంతాల నుంచి పండుగలకు స్వగ్రామాలకు వచ్చే వారికి, తిరిగి పని ప్రదేశాలకు వెళ్లే వారికి ఈ ప్రత్యేక రైలు చాలా ఉపశమనం కలిగిస్తుందని రైల్వే అధికారులు తెలిపారు. ఈ నిర్ణయంతో వేలాది మంది ప్రయాణికుల పండుగ ప్రయాణం సుఖమయం కానుంది.