మాజీ మంత్రి కేటీఆర్‌కు రిలీఫ్.. ఆ కేసులు కొట్టివేసిన హైకోర్టు

మాజీ మంత్రి, బీఆర్ఎస్ కార్యనిర్వాహక అధ్యక్షుడు కల్వకుంట్ల తారక రామారావు ( కేటీఆర్)కు తెలంగాణ హైకోర్టులో రిలీఫ్ లభించింది. కేటీఆర్‌కు ఊరట కలిగిస్తూ తెలంగాణ హైకోర్టు నిర్ణయం తీసుకుంది. కేటీఆర్ మీద నల్గొండలో నమోదైన మూడు కేసులను కొట్టివేస్తున్నట్లు హైకోర్టు తీర్పు ఇచ్చింది. నల్గొండలో వేర్వేరు చోట్ల కేటీఆర్ మీద మూడు కేసులు నమోదయ్యాయి. అయితే ఈ మూడు కేసులను కొట్టివేస్తూ తెలంగాణ హైకోర్టు తాజాగా ఉత్తర్వులు జారీ చేసింది. తెలంగాణ 2024 పదో తరగతి పరీక్షల ప్రశ్నాపత్రాల లీక్‌ గురించి అప్పట్లో మాజీ మంత్రి కేటీఆర్ ట్వీట్ చేశారు. అయితే కేటీఆర్ ట్వీట్ మీద అభ్యంతరం వ్యక్తం చేస్తూ పలువురు కాంగ్రెస్ నేతలు నల్గొండ పోలీసులకు ఫిర్యాదు చేశారు. మూడు చోట్ల కేటీఆర్ మీద పోలీసులకు ఫిర్యాదు చేయగా.. కాంగ్రెస్ నేతల ఫిర్యాదు ఆధారంగా పోలీసులు కేటీఆర్ మీద కేసులు నమోదు చేశారు.

అయితే నల్గొండలో తనపై నమోదైన కేసులను కొట్టివేయాలంటూ కేటీఆర్ గతంలో హైకోర్టును ఆశ్రయించారు. కేటీఆర్ పిటిషన్ విచారణకు స్వీకరించిన హైకోర్టు.. రెండు పక్షాల వాదనలు విన్నది. తమకు సంబంధం లేకున్నా తమ పేర్లు ప్రస్తావించారంటూ కాంగ్రెస్ నేతల తరఫు న్యాయవాదులు వాదనలు వినిపించగా.. రాజకీయ కక్షతోనే ఈ కేసులు పెట్టారంటూ కేటీఆర్ తరుఫు న్యాయవాది వాదించారు. ఇరుపక్షాల వాదనలు విన్న హైకోర్టు.. కేటీఆర్‌పై నల్గొండలో నమోదైన మూడు కేసులను కొట్టివేస్తూ మంగళవారం ఉత్తర్వులు జారీ చేసింది.

మరోవైపు పార్టీ ఫిరాయించిన ఎమ్మెల్యేలపై కేటీఆర్ కీలక వ్యాఖ్యలు చేశారు. వారిపై కచ్చితంగా చర్యలు తీసుకోవాల్సిందేనని డిమాండ్‌ చేశారు. జడ్చర్లలో విలేకర్లతో మాట్లాడిన కేటీఆర్.. ఈ మేరకు ఈ వ్యాఖ్యలు చేశారు. కాంగ్రెస్‌లో 10 మంది ఎమ్మెల్యేలు చేరారని.. ఆ పార్టీ రాష్ట్ర అధ్యక్షుడు మహేష్ కుమార్‌ గౌడ్‌ చెప్పారన్న కేటీఆర్.. పార్టీ మారిన ఎమ్మెల్యేలపై అసెంబ్లీ స్పీకర్ ఎందుకు చర్యలు తీసుకోవటం లేదని ప్రశ్నించారు. కాంగ్రెస్‌లో చేరిన పదిమంది ఎమ్మెల్యేలు కూడా ఏ పార్టీలో ఉన్నామో చెప్పుకోలేని పరిస్థితి ఉందని ఎద్దేవా చేశారు. అవసరమైతే టీపీసీసీ అధ్యక్షుడి హోదాలో మహేష్ కుమార్ గౌడ్ ఇచ్చిన స్టేట్‌మెంట్‌ను సుప్రీం కోర్టు ఎదుట ఉంచుతామని కేటీఆర్ స్పష్ఠం చేశారు.