తెలంగాణలో దాగి ఉన్న స్వర్గం: బాహుబలి వాటర్ ఫాల్స్

తెలుగు రాష్ట్రాల ప్రజలు వాటర్ ఫాల్స్ అనగానే ఎక్కువగా కేరళ, తమిళనాడు, కర్ణాటకలోని ప్రసిద్ధ జలపాతాలను సందర్శించాలనుకుంటారు. కానీ మన తెలంగాణలోనే ఓ అద్భుతమైన ప్రకృతి రమణీయతతో నిండిన వాటర్ ఫాల్ ఉందని మీకు తెలుసా?అదే కొమురం భీమ్ ఆసిఫాబాద్ జిల్లాలోని గుండాల జలపాతం, ప్రజల్లో ప్రసిద్ధిగా పిలువబడే 'బాహుబలి వాటర్ ఫాల్స్'. ఇది తిర్యాని మండల పరిధిలోని సుమారు 7 కిలోమీటర్ల దూరంలో గల దట్టమైన అడవిలో వెలసిన ప్రకృతి అద్భుతం.ఈ జలపాతం నిత్యం వందల మంది పర్యాటకులను ఆకర్షిస్తోంది. ముఖ్యంగా వర్షాకాలంలో భారీగా నీరు వచ్చి, జలపాతం ఉప్పొంగి ప్రవహిస్తుంది. బాహుబలి సినిమాలో కనిపించిన జలపాతం లాగా ఉండటంతో దీనికి అదే పేరుపడింది. ఇక్కడి నీటి ప్రవాహం, పచ్చని ప్రకృతి చుట్టూ ఉన్న పరిసరాలు పర్యాటకులను మంత్రముగ్ధులను చేస్తాయి.ప్రస్తుతం వర్షాకాలం కావడంతో రాష్ట్రం అంతటా నదులు ఉప్పొంగిపోతున్నాయి. ఈ నేపథ్యంలో బాహుబలి వాటర్ ఫాల్స్ కూడా ఉద్ధృతంగా ప్రవహిస్తూ, మరింత అందంగా మారింది. ఆదిలాబాద్, నిర్మల్, హైదరాబాద్, మహారాష్ట్ర తదితర ప్రాంతాల నుంచి పెద్ద సంఖ్యలో పర్యాటకులు ఇక్కడకు రావడం ప్రారంభించారు.ఈ జలపాతం 125 అడుగుల ఎత్తు నుండి పరవళ్లు తొక్కుతూ కిందికి జాలువారుతుంది. పచ్చదనంతో నిండిన కొండలు, లోయలు, వాగులు మద్యలో ఇది ఒక లాలిత్యభరితమైన ప్రకృతి కళాఖండంలా కనిపిస్తుంది.ఇక్కడికి చేరుకోవడానికి రెండు మార్గాలు ఉన్నాయి. ఒకటి — కొమురం భీమ్ ఆసిఫాబాద్ జిల్లా కేంద్రం నుండి తిర్యాని మండల పరిధిలోని రొంపల్లి రాళ్ల దారిలో కాలినడకన గుండాల గ్రామం చేరవచ్చు. మరో మార్గం — దండేపల్లి మండలంలోని ఉట్ల గ్రామం నుండి కొండలు, వాగులు దాటి గుండాల గ్రామానికి చేరుకోవచ్చు. హైదరాబాద్‌ సహా ఇతర పట్టణాల నుండి బస్సులు కూడా అందుబాటులో ఉన్నాయి.