గచ్చిబౌలిలో 600 గజాల స్థలాన్ని కాపాడిన హైడ్రా
Telangana Telugu | Suryaa Desk | Published : Wed, Sep 10, 2025, 12:15 PM
రంగారెడ్డి జిల్లా శేరిలింగంపల్లి మండలం గచ్చిబౌలిలో 600 గజాల స్థలాన్ని హైడ్రా కాపాడింది. దీని విలువ దాదాపు రూ. 11 కోట్ల వరకూ ఉంటుందని అంచనా. తెలంగాణ సెక్రటేరియట్ మ్యూచ్యువల్ ఎయిడెడ్ కోపరేటివ్ సొసైటీకి చెందిన 24 ఎకరాల లే ఔట్లో రెండు పార్కులను హైడ్రా మంగళవారం కాపాడి.. చుట్టూ ఫెన్సింగ్ వేసింది. హెచ్ ఎండీఏ అనుమతి పొందిన ఈ లే ఔట్లో పార్కులు, ప్రజావసరాలకు ఉద్దేశించిన స్థలాలను సొసైటీ నిర్వాహకులు అమ్మినట్టు ఫిర్యాదులు అందిన నేపథ్యంలో హైడ్రా క్షేత్ర స్థాయిలో పరిశీలించింది. పార్కుల స్థలాలుగా నిర్ధారించుకున్న తర్వాత ఆక్రమణలను తొలగించి చుట్టూ ఫెన్సింగ్ వేసింది. ఈ మేరకు హైడ్రా పరిరక్షించిన పార్కు స్థలంగా పేర్కొంటూ హెచ్చరికల బోర్డులు కూడా పెట్టింది. ఇల్లీగల్గా అమ్మకాలు, కొనుగోళ్లు జరిగిన తీరుపై పూర్తి స్థాయిలో విచారిస్తోంది. ఎవరు అమ్మారు.. ఎలా అమ్మారు.. ఎలా కొన్నారు అనే విషయాలతో పాటు.. వీటి వెనుక ఎవరెవరు ఉన్నారనేదానిపై పూర్తి స్థాయిలో విచారించి చర్యలు తీసుకుంటామని హైడ్రా ప్రకటించింది. ఇలా ఇంకా ఎన్ని స్థలాలు అమ్మారు అనేది పరిశీలించి అక్రమ లావాదేవీలు నిర్వహించిన వారిపై కేసులు కూడా పెడుతున్నట్టు హైడ్రా ప్రకటించింది.
|
|