ఛత్తీస్‌గఢ్‌లో మావోయిస్టులకు భారీ ఎదురుదెబ్బ!

ఛత్తీస్‌గఢ్‌లో మావోయిస్టులకు గట్టి ఎదురుదెబ్బ – ఎన్‌కౌంటర్‌లో 10 మంది మృతి ఛత్తీస్‌గఢ్ రాష్ట్రంలోని గరియాబంద్ జిల్లాలో మావోయిస్టులకు గట్టి ఎదురుదెబ్బ తగిలింది. గురువారం ఉదయం, భద్రతా బలగాలు మరియు నక్సలైట్ల మధ్య జరిగిన ఘోర ఎన్‌కౌంటర్‌లో మొత్తం పది మంది మావోయిస్టులు మృతి చెందారు. వీరిలో ఒకరు కేంద్ర కమిటీకి చెందిన కీలక నేత కావడం గమనార్హం.మృతుల్లో మనోజ్ అలియాస్ మోడెం బాలకృష్ణ అనే కేంద్ర కమిటీ సభ్యుడు ఉన్నట్టు గరియాబంద్ ఎస్పీ నిఖిల్ రాఖేచా ధృవీకరించారు. అంతేకాకుండా, ఒడిశా రాష్ట్ర కమిటీకి చెందిన ప్రమోద్ అనే మరొక ప్రముఖ మావోయిస్టు నాయకుడూ హతమైనట్లు తెలిపారు.భద్రతా దళాలు మావోయిస్టు వ్యతిరేక ఆపరేషన్‌లో భాగంగా అటవీ ప్రాంతాల్లో గస్తీ నిర్వహిస్తుండగా, మావోయిస్టులు ఎదురయ్యారు. తక్కువ సమయంలోనే ఇరు పక్షాల మధ్య తీవ్ర కాల్పులు ప్రారంభమయ్యాయి.ఈ ఆపరేషన్‌లో స్పెషల్ టాస్క్ ఫోర్స్ (STF), CRPF, అలాగే కోబ్రా బెటాలియన్ (Commando Battalion for Resolute Action) యూనిట్లు పాల్గొన్నాయి. ఇతర రాష్ట్రాల పోలీస్ విభాగాల మద్దతుతో ఈ ఆపరేషన్ మరింత సమర్థవంతంగా సాగిందని అధికారులు తెలిపారు.రాయ్‌పూర్ రేంజ్ ఐజీపీ అమ్రేష్ మిశ్రా మాట్లాడుతూ, ఆపరేషన్ ప్రారంభ సమయంలో కనీసం ఎనిమిది మంది మావోయిస్టులు హతమయ్యారని చెప్పారు. అయితే ఆపరేషన్ పూర్తవుతున్న కొద్దీ మృతుల సంఖ్య పదికి చేరిందని ఎస్పీ నిఖిల్ రాఖేచా వెల్లడించారు.అటవీ ప్రాంతంలో ఇంకా కాల్పులు కొనసాగుతున్నాయి. పూర్తి వివరాలు ఆపరేషన్ పూర్తైన తర్వాత అధికారుల ద్వారా వెల్లడి కానున్నట్టు సమాచారం.