తెలంగాణలో భారీ నుంచి అతి భారీ వర్షాలు: ఐఎండీ

బంగాళాఖాతంలో ఉపరితల ఆవర్తనం ప్రభావంతో అల్పపీడనం ఏర్పడినట్టు హైదరాబాద్ వాతావరణ కేంద్రం (ఐఎండీ) తెలిపింది. అల్పపీడనం ప్రభావంతో తెలంగాణ రాష్ట్రంలోని పలు జిల్లాల్లో రెండు రోజుల పాటు భారీ నుంచి అతిభారీ వర్షాలు కురిసే అవకాశం ఉందని అంచనా వేసింది. సెప్టెంబరు 12, 13 తేదీల్లో(శుక్ర, శనివారాలు) హైదరాబాద్‌ నగరంతో సహా చుట్టుపక్కల ప్రాంతాలు, జిల్లాల్లో ఉరుములు, మెరుపులు, ఈదురుగాలులతో కూడిన వర్షాలు కురిసే ఛాన్స్ ఉందని తెలిపింది. ఆదివారం కూడా పలు జిల్లాల్లో అక్కడక్కడ వర్షాలు పడే అవకాశాలు ఉన్నాయని హైదరాబాద్ వాతావరణ కేంద్రం పేర్కొంది.

శుక్రవారం నాడు ఆదిలాబాద్, కుమురం భీం ఆసిఫాబాద్, మహబూబాబాద్‌, భద్రాద్రి కొత్తగూడెం, సూర్యాపేట, ఖమ్మం జిల్లాల్లో అతిభారీ వర్షాలు కురిసే అవకాశం ఉందని ఈ జిల్లాలకు ఆరెంజ్‌ అలర్ట్ జారీ చేసింది. సెప్టెంబరు 13న శనివారం నిర్మల్, నిజామాబాద్, కామారెడ్డి, మెదక్, సంగారెడ్డి జిల్లాల్లో భారీ నుంచి అతి భారీ వర్షాలు కురిసే అవకాశముందని అంచనా వేసింది. హైదరాబాద్ సహా పలు జిల్లాల్లో వర్షాల ప్రభావంతో గంటకు 30-40 కిలోమీటర్ల వేగంతో ఈదురుగాలులు వీచే ఛాన్స్ ఉందని పేర్కొంది. లోతట్టు ప్రాంతాలు, రహదారులపై భారీగా వర్షపు నీరు నిలిచిపోయి.. ట్రాఫిక్‌కు అంతరాయం ఏర్పడే అవకాశం కూడా ఉందని, దీనిపై సంబంధిత అధికారులు.. తగిన సూచనలు జారీచేయాలని పేర్కొంది.

ఇక, గురువారం సాయంత్రం నుంచి రాత్రి వరకూ హైదరాబాద్‌లో కురిసిన వర్షానికి నగరం స్తంభించిపోయింది. కుండపోత వానతో రహదారులపై భారీగా నీరు నిలిచిపోయి.. వాహనదారులు తీవ్ర ఇబ్బందులు పడ్డారు. ఎల్బీనగర్, హయత్‌నగర్‌లో ఆకాశానికి చిల్లుపడినట్టు కురిసిన వర్షానికి విజయవాడ జాతీయ రహదారిపై మోకాలు లోతు నీరు చేరింది. దీంతో వాహనాలు కిలోమీటర్ల మేర బారులుతీరాయి. హయత్‌నగర్‌ వరకు రోడ్డుపై వరద చేరడంతో 2 కి.మీ దూరానికి గంటకుపైగా సమయం పట్టింది.

మెదక్ పట్టణంలో గురువారం కొద్ది నిమిషాల్లోనే భారీవాన కురిసింది. రహదారులు, కాలనీలు జలదిగ్బంధంలో చిక్కుకున్నాయి. రెండు, మూడు గంటల్లోనే వరుణుడు బీభత్సం సృష్టించాడు. చాలా ఏళ్ల తర్వాత మెదక్‌లో ఈ స్థాయిలో వర్షం కురిసిందని స్థానికులు పేర్కొన్నారు. లోతట్టు ప్రాంతాలు జలమయం కాగా, కాలనీల్లోకి వరద పోటెత్తింది. పలు ఇళ్లు, దుకాణాలు నీటమునిగాయి.