హైదరాబాద్ నగరవాసులు.. అలా చేస్తే 8 రోజుల జైలు శిక్ష

హైదరాబాద్ నగరంలో పారిశుద్ధ్యాన్ని మెరుగుపరిచేందుకు జీహెచ్ఎంసీ, పోలీసులు కీలక నిర్ణయం తీసుకున్నారు. రోడ్లపై చెత్త వేసే వారిపై కఠిన చర్యలు తీసుకోవాలని ఆదేశాలు జారీ చేశారు. ' స్పెషల్ డ్రైవ్' పేరుతో నిర్వహిస్తున్న ఈ ప్రత్యేక తనిఖీల్లో భాగంగా.. రోడ్డు మీద చెత్త వేస్తే చట్టంలోని సెక్షన్ల ప్రకారం 8 రోజుల జైలు శిక్ష పడే అవకాశం ఉందని పోలీసులు హెచ్చరిస్తున్నారు.

స్పెషల్ డ్రైవ్‌లో భాగంగా బోరబండ పోలీసులు గత రెండు రోజుల్లో రోడ్లపై చెత్త వేసిన ఐదుగురిని అదుపులోకి తీసుకున్నారు. వారిపై ఛార్జిషీటు దాఖలు చేసి న్యాయమూర్తి ముందు హాజరుపరచగా.. న్యాయమూర్తి వారికి రూ.1000 చొప్పున జరిమానా విధించారు. ఈ కేసు ఒక హెచ్చరికగా ఉంటుందని.. ఇకపై చెత్త వేసే వారిపై మరింత కఠినంగా వ్యవహరిస్తామని పోలీసులు తెలిపారు.

హైదరాబాద్ నగరంలో చెత్త సమస్య తీవ్రంగా ఉంది. రోడ్లపై, నాలాల్లో చెత్త వేయడం వల్ల పర్యావరణ సమస్యలు, డెంగ్యూ వంటి ఆరోగ్య సమస్యలు తలెత్తుతున్నాయి. వర్షాకాలంలో మురుగునీరు నిలిచిపోయి దోమలు వృద్ధి చెందుతున్నాయి. ఈ సమస్యను ఎదుర్కోవడానికి పోలీసులు, జీహెచ్‌ఎంసీ సంయుక్తంగా ఈ డ్రైవ్‌ను నిర్వహిస్తున్నారు. ప్రస్తుతం ఉన్న జరిమానాలు తక్కువగా ఉన్నాయనే అభిప్రాయాలు వ్యక్తమవుతున్నాయి. భవిష్యత్తులో జరిమానాను పెంచే అవకాశం ఉందని మొదటిసారి పట్టుబడిన వారికి జరిమానా, రెండోసారి అదే తప్పు చేస్తే జైలు శిక్ష విధించవచ్చని అధికారులు తెలిపారు.

కేవలం పోలీసు చర్యలు మాత్రమే కాకుండా.. ఈ సమస్య పరిష్కారానికి ప్రజల భాగస్వామ్యం అత్యంత అవసరం. ప్రతి ఒక్కరూ తమ ఇంటి చెత్తను రోడ్లపై వేయకుండా, చెత్త బుట్టలలో వేయాలని, తడి, పొడి చెత్తను వేరు చేసి జీహెచ్‌ఎంసీ వాహనాలకు అప్పగించాలని అధికారులు కోరుతున్నారు. ప్లాస్టిక్ వాడకాన్ని తగ్గించడం, రీ సైక్లింగ్ ప్రక్రియను ప్రోత్సహించడం వంటి చర్యలు కూడా తీసుకోవాలని అంటున్నారు. పోలీసులు, జీహెచ్‌ఎంసీ చేపట్టిన ఈ ప్రత్యేక డ్రైవ్ వల్ల నగరంలో పరిశుభ్రత పెరుగుతుందని, ప్రజలు బాధ్యతగా వ్యవహరిస్తారని ఆశిస్తున్నారు.