యువ చిత్రనిర్మాతలను ప్రోత్సహానికి,,,వినూత్న ప్రయత్నం

తెలంగాణ యువతలో సృజనాత్మకతను వెలికితీసి.. వారిలోని ప్రతిభను వెలుగులోకి తేవడానికి తెలంగాణ ఫిల్మ్ డెవలప్‌మెంట్ కార్పొరేషన్‌ ఒక వినూత్న ప్రయత్నానికి శ్రీకారం చుట్టింది. “బతుకమ్మ యంగ్ ఫిల్మ్ మేకర్స్ ఛాలెంజ్ – 2025” పేరుతో షార్ట్ ఫిలిమ్స్, పాటల పోటీలను నిర్వహించనున్నట్లు కార్పొరేషన్ చైర్మన్ దిల్ రాజు ప్రకటించారు. మంగళవారం ఆయన ఈ కార్యక్రమానికి సంబంధించిన పోస్టర్‌ను విడుదల చేశారు.

ఈ పోటీలలో రెండు విభాగాలు ఉంటాయి. 3 నిమిషాల నిడివి గల షార్ట్ ఫిలిమ్స్, అలాగే గరిష్టంగా 5 నిమిషాల లోపు పాటలు. ముఖ్యమంత్రి రేవంత్ రెడ్డి ఆధ్వర్యంలో ప్రజా ప్రభుత్వం అమలు చేస్తున్న సంక్షేమ పథకాలు, తెలంగాణ చరిత్ర, సంస్కృతి, పండగలు, కళారూపాలు వంటి అంశాలపై మాత్రమే కంటెంట్ రూపొందించాలి. ఉచిత బస్సు ప్రయాణం, గృహజ్యోతి, ఇందిరమ్మ ఇండ్లు, మహాలక్ష్మి పథకం, యంగ్ ఇండియా స్పోర్ట్స్ యూనివర్సిటీ, రెసిడెన్షియల్ స్కూల్స్ వంటి పథకాలు ప్రత్యేక ప్రాధాన్యతగా తీసుకోవాలని ఆయన సూచించారు.

ఎంట్రీలు సెప్టెంబర్ 30లోపు youngfilmmakerschallenge@gmail.com

మెయిల్‌ ఐడీకి లేదా 8125834009 వాట్సాప్ నంబర్‌కి పంపాలి. 40 ఏళ్ల లోపు వయసు కలిగిన వారికే ఈ పోటీల్లో పాల్గొనే అవకాశం ఉంటుంది. సమర్పించే వీడియోలు 4K రిజల్యూషన్లో ఉండాలి. అంతకుముందు ఎక్కడా ప్రదర్శించబడని ఒరిజినల్ కంటెంట్‌ మాత్రమే పరిగణనలోకి తీసుకుంటారు. పోటీలో విజేతలకు గణనీయమైన బహుమతులు అందజేయనున్నారు. మొదటి బహుమతి రూ.3 లక్షలు, రెండో బహుమతి రూ.2 లక్షలు, మూడో బహుమతి రూ.1 లక్ష. అదనంగా మరో ఐదుగురికి రూ.20 వేల రూపాయల చొప్పున కన్సొలేషన్ బహుమతులు ఇవ్వనున్నారు. విజేతలకు నగదు బహుమతులతో పాటు ప్రశంసా పత్రాలు, జ్ఞాపికలు కూడా ప్రదానం చేస్తారు. నిపుణులతో కూడిన జ్యూరీ తుది నిర్ణయం తీసుకోనుంది.

దీనిపై దిల్ రాజు మాట్లాడుతూ.. ఈ పోటీలు యువతకు భవిష్యత్తులో సినీ రంగంలో అవకాశాలను సృష్టిస్తాయని, సృజనాత్మక కంటెంట్‌కు వేదికగా నిలుస్తాయని తెలిపారు. తెలంగాణ సంప్రదాయాలు, సంస్కృతి, పండగలు, ప్రభుత్వం చేపడుతున్న సంక్షేమ కార్యక్రమాలు జాతీయ స్థాయిలో ప్రాచుర్యం పొందేందుకు ఈ పోటీలు దోహదం చేస్తాయని ఆయన అభిప్రాయపడ్డారు. “బతుకమ్మ యంగ్ ఫిల్మ్ మేకర్స్ ఛాలెంజ్” ద్వారా కళాప్రతిభ కలిగిన కొత్త తరాన్ని ప్రోత్సహించడం, వారి ప్రతిభను గుర్తించి సమాజానికి పరిచయం చేయడం టీఎఫ్‌డీసీ ముఖ్య ఉద్దేశ్యం. ఇది తెలంగాణ యువత సృజనాత్మకతకు ఒక సాంస్కృతిక వేదికగానూ నిలవనుంది.