హైదరాబాద్ పోలీసులకు సాయి తేజ్ రూ. 5 లక్షల విరాళం
Telangana Telugu | Suryaa Desk | Published : Fri, Sep 19, 2025, 06:05 AM_5513.jpg)
తాను ప్రాణాలతో బయటపడటానికి హెల్మెట్టే కారణమని, అది తనకు పునర్జన్మ లాంటిదని మెగా హీరో సాయి దుర్గా తేజ్ అన్నారు. హైదరాబాద్లో జరిగిన ‘ట్రాఫిక్, రోడ్ సేఫ్టీ సమ్మిట్ 2025’ కార్యక్రమంలో పాల్గొన్న ఆయన, తన పాత ప్రమాదాన్ని గుర్తుచేసుకుంటూ భావోద్వేగానికి గురయ్యారు. ఈ సందర్భంగా నగర పోలీసు శాఖకు రోడ్డు భద్రతా చర్యల కోసం రూ.5 లక్షల విరాళం అందజేశారు.2021 సెప్టెంబర్లో జరిగిన ఘోర రోడ్డు ప్రమాదం గురించి మాట్లాడుతూ, "నేను దాదాపు రెండు వారాల పాటు కోమాలో ఉన్నాను. నాకు ఇది పునర్జన్మ లాంటిది. నేను సానుభూతి కోసం ఈ విషయం చెప్పడం లేదు. ఆ రోజు నేను హెల్మెట్ పెట్టుకోవడం వల్లే ఈ రోజు మీ ముందు ఇలా నిలబడగలిగాను. దయచేసి బైక్ నడిపే ప్రతీ ఒక్కరూ తప్పనిసరిగా హెల్మెట్ ధరించండి" అని ఆయన విజ్ఞప్తి చేశారు.ఈ కార్యక్రమానికి అతిథిగా హాజరైన సాయి దుర్గా తేజ్, పోలీసు ఉన్నతాధికారులకు రూ.5 లక్షల చెక్కును అందజేశారు. బైక్ నడిపేటప్పుడు తీసుకోవాల్సిన జాగ్రత్తల గురించి తన మామయ్య, ఆంధ్రప్రదేశ్ ఉప ముఖ్యమంత్రి పవన్ కల్యాణ్ ఎప్పుడూ చెబుతుండేవారని ఈ సందర్భంగా గుర్తుచేసుకున్నారు.సాయి దుర్గా తేజ్ అందించిన విరాళాన్ని నగరంలో రోడ్డు భద్రతను మెరుగుపరిచే కార్యక్రమాలకు వినియోగిస్తామని హైదరాబాద్ పోలీస్ డిపార్ట్మెంట్ అధికారులు తెలిపారు. తన వ్యక్తిగత అనుభవాన్ని పంచుకుంటూ ఆయన చేసిన ప్రసంగం సదస్సుకు హాజరైన వారిని కదిలించింది.
|
|