పట్టా పాస్ బుక్స్ ఉన్నా.. వీరికి శాశ్వతంగా రైతుబంధు కట్

నల్గొండ జిల్లాలోని తిరుమలగిరి (సాగర్) మండలంలో జరిగిన భారీ భూ కుంభకోణం ప్రస్తుతం చర్చనీయాంశంగా మారింది. ప్రభుత్వం నుంచి కానీ, వారసత్వంగా కానీ, కొనుగోలు ద్వారా కానీ భూములు పొందని వేల మందికి అక్రమంగా పట్టా పుస్తకాలు మంజూరైనట్లు ఇటీవల జరిగిన సర్వేలో తేలింది. ఈ అక్రమాల వెనుక రెవెన్యూ అధికారుల ప్రమేయం ఉన్నట్లు అనుమానాలు వ్యక్తమవుతున్నాయి. నకిలీ పట్టా పుస్తకాలు పొందిన వారికి ఇకపై రైతుబంధు పథకం నిధులు నిలిపివేస్తున్నామని అధికారులు స్పష్టం చేశారు.

కుంభకోణం ఎలా జరిగింది?

2017లో నాటి ప్రభుత్వం చేపట్టిన భూ దస్త్రాల ప్రక్షాళన కార్యక్రమం (LRUP)‌ను కొందరు అక్రమార్కులు అవకాశంగా వాడుకున్నారు. అప్పటివరకు రెవెన్యూ రికార్డుల్లో ఎలాంటి సమాచారం లేని 3,069 మంది వ్యక్తులు ఏకంగా 2,936 ఎకరాలకు పైగా భూమికి యజమానులుగా మారిపోయారు. ఈ అక్రమాలు ప్రధానంగా తిరుమలగిరి మండలంలోని చింతపాలెం, నెల్లికల్, తిమ్మాయిపాలెం వంటి గ్రామాలకు సరిహద్దుల్లో ఉన్న ప్రభుత్వ, అటవీ భూముల్లో జరిగాయి.

ఆశ్చర్యకరంగా.. వీరి పేర్లు ధరణి పోర్టల్‌లో కూడా నమోదయ్యాయి. 2019లో వారికి పట్టా పాస్‌పుస్తకాలు కూడా జారీ అయ్యాయి. అప్పటి ప్రభుత్వం అమలు చేసిన రైతుబంధు పథకం కింద ప్రతి ఎకరానికి ఏడాదికి రూ. 10,000, కేంద్రం నుంచి పెట్టుబడి సాయం కింద రూ. 6,000 వీరు పొందారు. ఈ అక్రమ పట్టాల ద్వారా వారు కోట్లలో ప్రభుత్వ సాయాన్ని కాజేశారు.

ప్రస్తుత ప్రభుత్వ చర్యలు..

ప్రస్తుత ప్రభుత్వం తిరుమలగిరి మండలంలో ప్రయోగాత్మకంగా సర్వే చేయగా ఈ అక్రమాలు వెలుగులోకి వచ్చాయి. వెంటనే చర్యలు చేపట్టి, అక్రమ పట్టాలను గుర్తించి వాటికి రైతు భరోసా నిధులు ఇవ్వడాన్ని నిలిపివేసింది. ఈ భూములపై ప్రభుత్వం త్వరలో మరిన్ని కఠిన చర్యలు తీసుకునే అవకాశం ఉంది.

అనుమానాలు, దర్యాప్తు..

భూమి యాజమాన్య హక్కులు కల్పించాలంటే, ఆ భూమి ఎలా సంక్రమించిందో తెలిపే లింక్ డాక్యుమెంట్ తప్పనిసరి. కానీ, ఈ అక్రమ పట్టాల విషయంలో అలాంటి ఆధారాలు లేవు. అప్పట్లో పని చేసిన రెవెన్యూ అధికారులు రికార్డులను సరిగా పరిశీలించకుండానే ఈ పట్టాలను ఎలా మంజూరు చేశారనేది ఒక పెద్ద ప్రశ్న. పహాణీ, 1బి వంటి ముఖ్యమైన రికార్డులు చూడకుండానే యాజమాన్య హక్కులు కల్పించడం వెనుక పెద్ద కుట్ర ఉండి ఉండవచ్చని అనుమానాలు వ్యక్తమవుతున్నాయి.

ధరణి పోర్టల్‌లో సమాచారం ఉంటే, క్షేత్ర స్థాయిలో పరిశీలన లేకుండానే భూమిని సులభంగా విక్రయించుకునే అవకాశం ఉంది. ఈ అక్రమ పట్టాల ద్వారా ఎవరైనా భూములను విక్రయించారా, లేదా వాటిపై రుణాలు తీసుకున్నారా అనే దానిపై సమగ్ర విచారణ జరిగితే మరిన్ని వాస్తవాలు బయటపడతాయని నిపుణులు అభిప్రాయపడుతున్నారు. ఈ కుంభకోణం భూ రికార్డుల నిర్వహణలో ఉన్న లోపాలను మరోసారి వెలుగులోకి తెచ్చింది.