రూ.1.6 కోట్లతో ఆ స్టిక్కర్లు..తెలంగాణ పోలీస్ వాహనాలకు కొత్త లుక్

గతంలో తెలంగాణ సంక్షిప్త పదం ‘TS’ అని ఉండేది. కానీ, కాంగ్రెస్ ప్రభుత్వం దానిని ‘TG’ గా మార్చుతూ గతేడాది మేలో ఉత్తర్వులు జారీ చేసింది. ఈ నేపథ్యంలో ప్రభుత్వ వాహనాలపై ‘టీఎస్’ స్థానే టీజీ స్టిక్కర్లను అతికిస్తున్నారు. తాజాగా, హైదరాబాద్ నగర పోలీస్ కమిషనరేట్‌ పరిధిలోని పోలీస్, పెట్రోల్ వాహనాలపై ఉన్న పాత స్టిక్కర్లను తొలగించి, ‘తెలంగాణ పోలీస్’ స్టిక్కర్లను అమర్చాలని కమిషనర్ సీవీ ఆనంద్ ఆదేశించారు. దీంతో మొత్తం 188 ప్రభుత్వ వాహనాలపై టీఎస్ స్టిక్టర్లను తొలగించి, కొత్తగా టీజీని అమర్చే ప్రక్రియ మొదలైంది..

రాజధాని హైదరాబాద్ కమిషనరేట్ పరిధిలోని అన్ని పోలీస్ వాహనాలకు దాదాపు రూ.1.6 కోట్ల వ్యయంతో ఈ ప్రక్రియ పూర్తిచేశారు. ప్రతి వాహనంపై స్టిక్కర్ల తొలగింపు, తెలంగాణ పోలీస్ స్టిక్కర్లను అతికించడం, మెషిన్ పాలిషింగ్, అవసరమైతే బంపర్లు, డోర్లు, ప్యానెళ్లపై డెంటింగ్, పెయింటింగ్ వంటి చిన్న చిన్న రిపేర్లు కూడా చేయించారు. ఇప్పటి వరకూ 134 వాహనాలకు స్టిక్కరింగ్ పూర్తికాగా.. సీఏఆర్ హెడ్‌క్వార్టర్స్‌‌లో అధికారులు వీటిని పునఃప్రారంభించారు. ఇవి శాంతి భద్రతల పరిరక్షణ, నేరాలను అడ్డుకోవడం, అత్యవసర పరిస్థితుల్లో వేగంగా స్పందించడం సహా తెలంగాణ పోలీస వ్యవస్థ పటిష్ఠతను కొనసాగించడంలో కీలకపాత్ర పోషిస్తాయని పేర్కొన్నారు.

అలాగే, ట్రాఫిక్ ఏసీపీ, ఇన్స్పెక్టర్లు, పైలట్, ఇంటర్‌సెప్టర్ వాహనాలకు కూడా రాబోయే కొన్ని రోజుల్లో స్టిక్కరింగ్‌ ప్రక్రియ పూర్తవుతుందని చెప్పారు. వాటిని కూడా పూర్తిస్థాయిలో సరైన స్థితిలో మారుస్తామని తెలిపారు. ఈ సందర్భంగా ఈ వాహనాలను నడిపే డ్రైవర్లకు వాటి శుభ్రత, నిర్వహణలో స్పష్టమైన మార్గదర్శకాలు అందజేసినట్టు పేర్కొన్నారు.

గతేడాది రాష్ట్ర ప్రభుత్వ ప్రతిపాదన మేరకు తెలంగాణ సంక్షిప్త పదాన్ని టీజీగా మార్చుతూ కేంద్ర ప్రభుత్వం గ్రీన్ సిగ్నల్ ఇచ్చింది. దీంతో అధికారిక సమాచారాల్లోనూ టీజీగా ప్రస్తావిస్తున్నారు. తెలంగాణ ఉద్యమం సమయంలో టీజీని ఉపయోగించారని.. వాహనాలపై కూడా అప్పుడు ఏపీకి బదులు టీజీఅని రాసుకున్నారని గతంలో ప్రభుత్వం పేర్కొంది. గతంలో రిజిస్ట్రేషన్ చేయించుకున్నవారికి మాత్రం మినహాయింపు ఇచ్చింది. ఈ విషయాన్ని వారి ఇష్టానికే ప్రభుత్వం వదిలేసింది.