ఏ అర్హతతో వేశారంటూ ఆగ్రహం..బీసీ రిజర్వేషన్ల పిటిషన్‌ను కొట్టేసిన హైకోర్టు

తెలంగాణలో బీసీలకు రిజర్వేషన్ల అంశం మరోసారి చర్చనీయాంశమైంది. స్థానిక సంస్థల ఎన్నికల్లో బీసీలకు 42 శాతం రిజర్వేషన్లు కల్పించాలన్న ప్రభుత్వ నిర్ణయాన్ని సవాలు చేస్తూ మేడ్చల్‌ మల్కాజిగిరి జిల్లా మూడుచింతలపల్లి మండలానికి చెందిన బుట్టెంగారి మాధవరెడ్డి, సిద్దిపేట జిల్లా చిన్నకోడూరుకు చెందిన జలపల్లి మల్లవ్వలు హైకోర్టులో రిట్‌ పిటిషన్‌ దాఖలు చేశారు. వీరు పంచాయతీరాజ్‌ చట్టంలోని సెక్షన్‌ 285ఏ ప్రకారం ఈ రిజర్వేషన్లు అమలు చేయాలని.. అదే సమయంలో పంచాయతీ ఎన్నికల నోటిఫికేషన్‌ ఇవ్వడాన్ని రాజ్యాంగ విరుద్ధంగా పరిగణించాలని కోరారు.

పిటిషనర్ల వాదన ప్రకారం.. 42 శాతం రిజర్వేషన్ల వల్ల మొత్తం రిజర్వేషన్లు 50 శాతం దాటుతున్నాయి. ఇది రాజ్యాంగ విరుద్ధమని.. అలాగే ప్రభుత్వం ఎన్నికల ప్రక్రియను వక్రీకరించే విధంగా ప్రవర్తిస్తోందని పేర్కొన్నారు. అందువల్ల పాత విధానంలోనే ఎన్నికలు జరగాలని డిమాండ్ చేశారు.

ఈ పిటిషన్‌పై సెప్టెంబర్‌ 24న తెలంగాణ హైకోర్టు విచారణ చేపట్టింది. విచారణలో పిటిషనర్లను హైకోర్టు నిలదీసింది. “ప్రభుత్వం నుంచి ఏదైనా కాపీ మీకు అందిందా? కేవలం పత్రికా వార్తల ఆధారంగా ఎలా పిటిషన్ వేస్తారు..? ఈ పిటిషన్ వేయడానికి ఎలాంటి అర్హత ఉంది అంటూ ప్రశ్నించింది. పత్రికల్లో వచ్చిన వార్తా కథనాలు లేదా క్లిప్పింగ్‌లు కోర్టులో ఆధారాలుగా పరిగణలోకి రావు అని స్పష్టం చేసింది. సుప్రీంకోర్టు గైడ్‌లైన్స్ ప్రకారం మీడియా రిపోర్ట్‌ల ఆధారంగా పిటిషన్ వేయడం సరికాదు అని హెచ్చరించింది. అందువల్ల పిటిషన్లను కొట్టివేస్తూ స్పష్టమైన తీర్పు ఇచ్చింది.

ఈ నిర్ణయం రాజకీయ వర్గాల్లో, న్యాయవర్గాల్లో చర్చకు దారితీసింది. ఒకవైపు ప్రభుత్వం తీసుకున్న రిజర్వేషన్‌ విధానంపై భవిష్యత్‌లో మరోసారి న్యాయపరమైన సవాళ్లు ఎదురయ్యే అవకాశం ఉందని నిపుణులు చెబుతున్నారు. మరోవైపు హైకోర్టు చేసిన వ్యాఖ్యలు పిటిషనర్లకు గట్టి సందేశాన్ని ఇచ్చాయి. చట్టపరమైన ఆధారాలు లేకుండా కేవలం పత్రికా కథనాలపై ఆధారపడి దాఖలు చేసే పిటిషన్లను భవిష్యత్తులో కూడా కోర్టు పట్టించుకోదని ఈ తీర్పు సూచిస్తోంది. ఈ తీర్పుతో ప్రభుత్వానికి ఊరట లభించినట్లు అయింది. ఇప్పుడు ప్రభుత్వం బీసీ రిజర్వేషన్లను ఖరారు చేసే ప్రక్రియను వేగవంతం చేసే అవకాశం ఉంది. ఈ నిర్ణయం స్థానిక సంస్థల ఎన్నికలకు మార్గం సుగమం చేస్తుందని రాజకీయ వర్గాల్లో చర్చ జరుగుతోంది.