హైదరాబాద్‌ వాసులకు అదిరిపోయే వార్త.. ముచ్చర్లలో త్వరలో 'నైట్ సఫారీ' పార్క్

హైదరాబాద్ నగరవాసుల కోసం తెలంగాణ ప్రభుత్వం ఓ సరికొత్త ప్రాజెక్ట్‌ను ప్రారంభించనుంది. ముచ్చర్లలో దాదాపు 203.83 ఎకరాల విస్తీర్ణంలో నైట్ సఫారీ పార్కును ఏర్పాటు చేయనున్నారు. ప్రపంచ స్థాయి ప్రమాణాలతో నిర్మించనున్న ఈ పార్క్, ప్రకృతి ప్రేమికులకు, సాహసం కోరుకునే వారికి, అలాగే కుటుంబంతో సరదాగా గడపాలనుకునే వారికి ఒక అద్భుతమైన గమ్యస్థానంగా మారనుంది. ఇప్పటికే దీనికి సంబంధించిన ప్రణాళికలు పూర్తయ్యాయి. ఫ్యూచర్ సిటీలో భాగంగా ఈ ప్రాజెక్ట్‌ను రెండు దశల్లో పూర్తి చేయనున్నారు.
ఈ పార్క్ ప్రాజెక్ట్ ప్రత్యేకత ఏమిటంటే, ఇది కేవలం ఒక జూలా కాకుండా, వినోదం, విజ్ఞానం, సాహసం... ఇలా అన్నింటినీ ఒకేచోట అందిస్తుంది. సాధారణంగా జూ పార్కులు కేవలం పగటిపూట మాత్రమే తెరిచి ఉంటాయి, కానీ ఈ నైట్ సఫారీ రాత్రిపూట కూడా అందుబాటులో ఉంటుంది. రాత్రిపూట అటవీ జంతువుల సహజ ప్రవర్తనను దగ్గరగా చూసే అవకాశం కలుగుతుంది. అంతేకాకుండా, భారతదేశంలో లేని అరుదైన, విదేశీ జంతువులను కూడా ఇక్కడ ప్రదర్శించనున్నారు. జిరాఫీ, జీబ్రా, యాంటిలోప్, ఎలాండ్ వంటి జంతువులను కూడా తీసుకురావడానికి అధికారులు ప్రణాళికలు చేస్తున్నారు.
పిల్లలను ఆకట్టుకునేందుకు ఈ పార్కులో డైనోసార్ పార్కు, వర్చువల్ రియాలిటీ (VR) పార్కు వంటివి ప్రత్యేక ఆకర్షణలుగా నిలవనున్నాయి. ఇక్కడ ప్రాచీన, మధ్య యుగాల నాటి చారిత్రక కట్టడాల నమూనాలను, డైనోసార్ బొమ్మలను కూడా ఏర్పాటు చేయనున్నారు. యువత కోసం అడ్వెంచర్ పార్కును కూడా నిర్మించనున్నారు. ఇది అడవుల్లో సాహసోపేతమైన కార్యకలాపాలను అనుభూతి చెందేలా రూపొందించబడుతోంది. కుటుంబం మొత్తం కలిసి ఆనందించేందుకు టికెట్ కౌంటర్లు, విశాలమైన పార్కింగ్ ప్రాంతం, ఫుడ్ కోర్టులు వంటి సదుపాయాలు కూడా అందుబాటులో ఉంటాయి.
ఈ ప్రాజెక్ట్‌ను ప్రభుత్వం- ప్రైవేట్ భాగస్వామ్యంతో ఫారెస్ట్ డెవలప్‌మెంట్ కార్పొరేషన్ (FDC) చేపట్టనుంది. దీని కోసం తెలంగాణ స్టేట్ ఇండస్ట్రియల్ అండ్ ఇన్‌ఫ్రాస్ట్రక్చర్ కార్పొరేషన్ (TGIIC) ఇప్పటికే 203.80 ఎకరాల భూమిని కేటాయించేందుకు ఆమోదం తెలిపింది. ఈ పార్క్ పూర్తయితే, హైదరాబాద్‌కు వినోద, పర్యాటక రంగంలో ఒక కొత్త ఆకర్షణ చేరినట్టే.