దసరా బంపర్ ఆఫర్.. టీజీఎస్ఆర్టీసీ ప్రయాణికులకు 5.50 లక్షల లక్కీ డ్రా!

దసరా పండుగ సందర్భంగా ప్రయాణికులకు తీపి కబురు అందించింది టీజీఎస్ఆర్టీసీ. పండుగ వేళ తమ బస్సుల్లో ప్రయాణించే వారి కోసం అదిరిపోయే లక్కీ డ్రాను ప్రకటించింది. మొత్తం 33 మంది అదృష్టవంతులకు రూ.5.50 లక్షల విలువైన బహుమతులను అందజేయనున్నట్లు సంస్థ వెల్లడించింది. ప్రతి రీజియన్‌కు ముగ్గురు విజేతలను ఎంపిక చేసి, వారికి ప్రథమ బహుమతిగా రూ.25 వేలు, ద్వితీయ బహుమతిగా రూ.15 వేలు, తృతీయ బహుమతిగా రూ.10 వేలు నగదు బహుమతులు అందించనున్నారు. దసరా పండుగను దృష్టిలో ఉంచుకొని ప్రయాణికుల రాకపోకలకు ఎలాంటి ఇబ్బందులు కలగకుండా పకడ్బందీ ఏర్పాట్లు చేసిన టీజీఎస్ఆర్టీసీ, 7754 ప్రత్యేక బస్సులను కూడా నడుపుతోంది.
ఈ లక్కీ డ్రాలో పాల్గొనడానికి కొన్ని అర్హతలు ఉన్నాయి. ఈ నెల 27 నుంచి అక్టోబర్ 6వ తేదీ వరకు టీజీఎస్ఆర్టీసీకి చెందిన హైఎండ్ బస్సులైన సెమీ డీలక్స్, మెట్రో డీలక్స్, డీలక్స్, సూపర్ లగ్జరీ, లహారి నాన్ ఏసీతో పాటు అన్ని రకాల ఏసీ బస్సుల్లో ప్రయాణించిన వారే ఈ డ్రాకు అర్హులు. ప్రయాణం పూర్తయిన తర్వాత తమ టికెట్‌పై పూర్తి పేరు, ఫోన్ నంబరు రాసి బస్ స్టేషన్‌లలో ఏర్పాటు చేసిన డ్రాప్ బాక్స్‌లలో వేయాల్సి ఉంటుంది. ముందస్తు రిజర్వేషన్ చేసుకున్న ప్రయాణికులు కూడా ఈ లక్కీ డ్రాలో పాల్గొనవచ్చని సంస్థ స్పష్టం చేసింది.
లక్కీ డ్రా అనంతరం, డ్రాప్ బాక్స్‌లను సంబంధిత ఆర్ఎం కార్యాలయాలకు చేర్చి, ప్రతి రీజియన్ పరిధిలో లక్కీ డ్రాను నిర్వహిస్తారు. అక్టోబర్ 8న విజేతలను ఎంపిక చేస్తారు. ఈ విజేతలకు సంస్థ ఘనంగా సన్మానించి నగదు బహుమతులు అందజేస్తుంది. ఈ అద్భుతమైన అవకాశాన్ని సద్వినియోగం చేసుకొని పెద్ద ఎత్తున లక్కీ డ్రాలో పాల్గొనాలని టీజీఎస్ఆర్టీసీ ఎండీ వీసీ సజ్జనర్ ప్రయాణికులను కోరారు.
లక్కీ డ్రాకు సంబంధించిన పూర్తి వివరాల కోసం టీఎస్‌ఆర్టీసీ కాల్‌ సెంటర్‌ నంబర్లు 040-69440000, 040-23450033 లను సంప్రదించవచ్చు లేదా స్థానిక డిపో మేనేజర్లను సంప్రదించాలని ఆయన సూచించారు. ప్రయాణికుల రద్దీని బట్టి మరిన్ని ప్రత్యేక బస్సులను నడపాలని అధికారులకు ఆదేశాలు జారీ చేసినట్లు టీజీఎస్ఆర్టీసీ తెలిపింది. ఈ దసరాకు సొంతూళ్లకు వెళ్లే ప్రయాణికులకు సురక్షితమైన, సౌకర్యవంతమైన ప్రయాణాన్ని అందించడమే కాకుండా, అదృష్టాన్ని కూడా పంచుతోంది టీజీఎస్ఆర్టీసీ.