సద్దుల బతుకమ్మ ఎప్పుడు..? సోమవారమా..? మంగళవారమా..?

తెలంగాణలో అత్యంత ప్రాధాన్యమైన పండుగల్లో బతుకమ్మ ప్రత్యేక స్థానం కలిగి ఉంది. ప్రకృతిని గౌరమ్మగా పూజించే ఈ పండుగకు సద్దుల బతుకమ్మ ముఖ్య ఘట్టంగా పరిగణిస్తారు. ఈసారి సద్దుల బతుకమ్మ ఎప్పుడు జరుపుకోవాలన్న దానిపై అర్చకుల అభిప్రాయాలు భిన్నంగా రావడంతో ప్రజల్లో కొంత గందరగోళం నెలకొంది. ఎప్పుడూ లేని విధంగా ఈ సంవత్సరం సద్దుల బతుకమ్మ విషయంలో కాస్త గందరగోళం నెలకొంది.

దీనిపై వరంగల్ భద్రకాళి గుడి ప్రధానార్చకుడు శేషు శర్మ మాట్లాడుతూ.. “సద్దుల బతుకమ్మను అష్టమి రోజునే జరుపుకోవాలి. ఈ సంవత్సరం సోమవారం అంటే సెప్టెంబర్ 29వ తేదీన మధ్యాహ్నం అష్టమి తిథి మొదలవుతుంది. మంగళవారం ఉదయం కూడా అష్టమి కొనసాగుతుంది. కాబట్టి సూర్యోదయానికి ఏ తిథి ఉంటుందో అదే ముఖ్యమని శాస్త్రం చెబుతోంది. అందువల్ల మంగళవారం.. 30న సద్దుల బతుకమ్మ జరపడం శ్రేష్ఠం” అని వివరించారు.

ఇక వరంగల్ వేయి స్తంభాల గుడి ప్రధానార్చకుడు గంగు ఉపేంద్ర శర్మ మాత్రం భిన్నంగా అభిప్రాయం తెలిపారు. ‘బతుకమ్మ తొమ్మిది రోజుల పండుగ. సెప్టెంబర్ 21న మహాలయ అమావాస్యన ఎంగిలిపూల బతుకమ్మ ప్రారంభమైంది. అందువల్ల తొమ్మిదో రోజు అయిన సోమవారం అంటే సెప్టెంబర్ 29న సద్దుల బతుకమ్మ జరపాలి. సంప్రదాయం ప్రకారం తొమ్మిదో రోజే ప్రధానమైనది’ అని చెప్పారు.

దేవరుప్పలకు చెందిన పురోహితుడు వుప్పల రమేష్ శర్మ మాట్లాడుతూ..‘సోమవారం ఉదయం 11.47 గంటల నుంచి మంగళవారం మధ్యాహ్నం 1.08 గంటల వరకు అష్టమి ఉంటుంది. సాధారణంగా శుభకార్యాలకు సూర్యోదయాన్ని ప్రామాణికంగా పరిగణిస్తాం కానీ సద్దుల బతుకమ్మ విషయంలో తొమ్మిదో రోజు ప్రధానంగా పరిగణించాలి. సోమవారమే సద్దుల బతుకమ్మ నిర్వహించడం శ్రేయస్కరం. పైగా నిమజ్జనం వేళకూ అష్టమి కొనసాగుతుంది’ అని తెలిపారు.

ప్రభుత్వం మాత్రం మంగళవారం 30న రాష్ట్రవ్యాప్తంగా సద్దుల బతుకమ్మ నిర్వహణకు ఏర్పాట్లు చేయాలని ఆదేశాలు జారీ చేసింది. దీనికి ప్రభుత్వం ఏ ప్రాతిపదికను పరిగణలోకి తీసుకుందో తెలియదు. ఈ భిన్న అభిప్రాయాల కారణంగా ప్రజల్లో అయోమయం నెలకొంది. పండుగ సజావుగా జరగాలని అర్చకులు, అధికారులు ఒకే నిర్ణయానికి రావాలని భక్తులు కోరుతున్నారు.

ఇక దసరా పండుగ మాత్రం అక్టోబర్ 2వ తేదీనే జరుపుకోనున్నారు. అయితే ఈ సారి బ్యాడ్ న్యూస్ ఎంటంటే.. అదే రోజు గాంధీ జయంతి రావడంతో.. మద్యం, మాంసం విక్రయాలు నిషేధం. ఈ సారి వాటికి దూరంగా ఉండక తప్పడం లేదు. అయితే దీనిపై కొందరు నిరాశ వ్యక్తం చేస్తుండగా.. ఒక్క రోజు ముందుగానే మందు తెచ్చుకొని పండుగ రోజు తాగుదామనే ప్లాన్ మరికొందరు చేసుకుంటున్నారు.