ఏకలవ్య మోడల్ రెసిడెన్షియల్ స్కూల్స్‌లో భారీగా ఉద్యోగాలు

గిరిజన వ్యవహారాల మంత్రిత్వ శాఖ ఆధ్వర్యంలో పనిచేస్తున్న ఏకలవ్య మోడల్ రెసిడెన్షియల్ స్కూల్స్ 2025–26 విద్యా సంవత్సరానికి సంబంధించి భారీ స్థాయిలో టీచింగ్ అండ్ నాన్ టీచింగ్ నియామకాలకు నోటిఫికేషన్ విడుదల చేసింది. ఈ నియామకాల ద్వారా ప్రిన్సిపాల్, PGT, TGT, హాస్టల్ వార్డెన్, అకౌంటెంట్, క్లర్క్, ల్యాబ్ అటెండెంట్, లైబ్రేరియన్ వంటి విభిన్న విభాగాల్లో మొత్తం 7,267 ఖాళీలు భర్తీ చేయనున్నారు. గిరిజన విద్యార్థుల నాణ్యమైన విద్యా అభ్యున్నతికి వీటి ద్వారా కొత్త అవకాశాలు లభించనున్నాయి.

ప్రిన్సిపాల్ పదవికి దరఖాస్తు చేసుకునే అభ్యర్థులు గుర్తింపు పొందిన విశ్వవిద్యాలయం నుంచి కనీసం 50 శాతం మార్కులతో మాస్టర్స్ డిగ్రీ, బి.ఎడ్ చేసి ఉండాలి. అలాగే సంబంధిత రంగంలో అనుభవం కలిగి ఉండాలి. PGT, TGT పోస్టులకు పోస్ట్‌గ్రాడ్యుయేషన్‌తో పాటు B.Ed ఉత్తీర్ణత అవసరం. నాన్-టీచింగ్ పోస్టులకు కనీసం గ్రాడ్యుయేషన్ లేదా B.Ed తో పాటు 50 శాతం మార్కులు ఉండాలి. లైబ్రేరియన్ పోస్టులకు దరఖాస్తు చేసే వారు బీఎల్ఐసీ పూర్తి చేసి ఉండాలన్నారు. వివిధ రాకల పోస్టులకు దరఖాస్తు చేసే అభ్యర్థుల కనీస వయసు 18 సంవత్సరాలు కాగా.. గరిష్ట వయోపరిమితి పోస్టు ఆధారంగా 55 సంవత్సరాల వరకు ఉంటుంది.

ఎంపిక ప్రక్రియ మరియు జీతభత్యాలు..

టైర్–1, టైర్–2 పరీక్షలు, ఇంటర్వ్యూల ఆధారంగా అభ్యర్థులను ఎంపిక చేస్తారు. ప్రిన్సిపాల్‌లకు నెలకు రూ.78,800 – రూ.2,09,200, PGTలకు రూ.47,600 – రూ.1,51,100, TGTలకు రూ.44,900 – రూ.1,42,400 వరకు జీతం లభిస్తుంది.

దరఖాస్తు విధానం..

ఆసక్తి ఉన్న వారు nests.tribal.gov.in వెబ్‌సైట్‌లో హోమ్‌పేజీలోని ఈఎస్ఎస్ఈ అనే ఆప్షన్ కనిపిస్తుంది. దీనిపై క్లిక్ చేస్తే.. నోటిఫికేషన్ ఆప్షన్ కనిపిస్తుంది.. దీని తర్వాత అప్లికేషన్ ఆన్‌లైన్ అనే ఆప్షన్ కనిపిస్తుంది. ఇలా మీ దరఖాస్తులను నింపవచ్చు. ఇక్కడ మీ రిజిస్ట్రేషన్ పూర్తి చేసి, అవసరమైన పత్రాలు అప్‌లోడ్ చేసి.. ఫీజు చెల్లించి, సమర్పణకు ముందు అన్ని వివరాలు సరిచూసి ప్రింట్ అవుట్ తీసుకోవాలి. ఇప్పటికే సెప్టెంబర్ 19 నుంచి దరఖాస్తుల ప్రక్రియ ప్రారంభం కాగా.. అక్టోబర్ 23 చివరి తేదీగా పేర్కొన్నారు.