సాధారణ ప్రయాణికుడిలా.. టికెట్ తీసుకొని ఆర్టీసీ బస్సెక్కిన సజ్జనార్

తెలంగాణ రాష్ట్రంలోని టీజీఎస్ఆర్టీసీ సంస్థకు ఎండీగా పనిచేసిన వీసీ సజ్జనార్ బదిలీ అయ్యారు. ఆయనను హైదరాబాద్ నగర పోలీస్ కమిషనర్ (సీపీ)గా నియమిస్తూ రాష్ట్ర ప్రభుత్వం ఉత్తర్వులు జారీ చేసిన విషయం తెలిసిందే. తన కొత్త బాధ్యతలు స్వీకరించే ముందు.. ఆర్టీసీ ఎండీగా చివరి రోజున సజ్జనార్ సాధారణ ప్రయాణికుడి మాదిరిగా ఆర్టీసీ బస్సులో ప్రయాణించి.. సంస్థతో తనకున్న అనుబంధాన్ని చాటుకున్నారు.

ఆర్టీసీ ఎండీగా సజ్జనార్ సేవలు..

లక్డీకాపూల్ టెలిఫోన్ భవన్ బస్ స్టాండ్ నుంచి బస్ భవన్ వరకు 113I/M రూట్ బస్సులో సజ్జనార్ ప్రయాణించారు. ఈ సందర్భంగా ఆయన కండక్టర్‌కు యూపీఐ ద్వారా టికెట్ డబ్బులు చెల్లించి.. సాధారణ ప్రయాణికులతో ముచ్చటించారు. ముఖ్యంగా మహాలక్ష్మి స్కీమ్ (మహిళలకు ఉచిత బస్సు ప్రయాణ పథకం) అమలు, దాని వల్ల మహిళలకు కలుగుతున్న ప్రయోజనాలను అడిగి తెలుసుకున్నారు.

ఆర్టీసీ ఎండీగా సజ్జనార్ పదవీకాలం సంస్థకు ఒక నూతన శకాన్ని తీసుకొచ్చింది. ఆయన పదవీ బాధ్యతలు చేపట్టిన తర్వాత ఆర్టీసీ బ్రాండ్‌ను పునరుద్ధరించడానికి, ప్రయాణికులను ఆకర్షించడానికి అనేక వినూత్న కార్యక్రమాలు చేపట్టారు. ఇందులో ముఖ్యంగా.. ‘మన ఆర్టీసీ’. ప్రజల్లో ఆర్టీసీపై సానుకూల దృక్పథం పెంచడానికి, సంస్థను లాభాల బాట పట్టించడానికి ఈ నినాదాన్ని బలంగా ప్రచారం చేశారు.

టికెట్ బుకింగ్ పద్ధతులను సులభతరం చేసి.. ఆన్‌లైన్ సేవలను మెరుగుపరచడం వంటి చర్యలు తీసుకున్నారు. సరుకు రవాణా సేవలను విస్తరించి.. ఆర్టీసీ ఆదాయ వనరులను పెంచడంలో కీలక పాత్ర పోషించారు. దీని కోసం కార్గో సేవలను ప్రారంభించారు. తెలంగాణలో కాంగ్రెస్ ప్రభుత్వం ఈ పథకాన్ని ప్రవేశపెట్టిన తర్వాత.. దీనిని సమర్థవంతంగా అమలు చేయడంలో సజ్జనార్ విశేష కృషి చేశారు. ఇక రాష్ట్ర ప్రభుత్వం 23 మంది ఐపీఎస్ అధికారులను బదిలీ చేస్తూ ఉత్తర్వులు జారీ చేయగా.. అప్పటివరకు నగర సీపీగా ఉన్న సీవీ ఆనంద్‌కు హోంశాఖ ప్రధాన కార్యదర్శిగా పదోన్నతి కల్పించగా.. ఆయన స్థానంలో వీసీ సజ్జనార్‌ను హైదరాబాద్ సీపీగా నియమించారు.