ఇంటికి తాళం వేసి పండక్కి ఊరెళ్లే వారికి బిగ్ అలర్ట్.. జాగ్రత్త ఇది మీ ఇంట్లో కూడా జరగొచ్చు

హైదరాబాద్‌లో వరుస దొంగతనాలు జరుగుతున్న నేపథ్యంలో.. ఖాళీగా ఉన్న ఇళ్లను లక్ష్యంగా చేసుకుంటున్న దొంగల పట్ల ప్రజలు అప్రమత్తంగా ఉండాలని పోలీసులు హెచ్చరిస్తున్నారు. దుండిగల్ ప్రాంతంలో జరిగిన తాజా ఘటన ఈ హెచ్చరికలకు బలం చేకూర్చింది. మంగళవారం రాత్రి దుండిగల్‌లోని బౌరంపేట పరిధిలో ఉన్న కీర్తి హోమ్స్ కాలనీలో గుర్తు తెలియని దొంగలు ఒక ఇంట్లో చొరబడి 14 తులాల బంగారు ఆభరణాలు, రూ. 20,000 నగదు దోచుకున్నారు. ఇంటి యజమాని కృష్ణ కుటుంబంతో కలిసి బయటకు వెళ్లిన సమయాన్ని దుండగులు అదునుగా చేసుకున్నారు.

దొంగలు తాళం పగలగొట్టి లోపలికి ప్రవేశించారు. అయితే దోపిడీ జరిగిన సమయంలో కృష్ణ వృద్ధురాలైన తల్లి ఇంట్లోనే నిద్రిస్తున్నప్పటికీ.. దొంగలు ఆమెను ఏమీ చేయకుండానే నేరం చేసి పారిపోయారు. కాలనీలోని సీసీటీవీ ఫుటేజీలో ఇద్దరు ముసుగు ధరించిన వ్యక్తులు ఈ దొంగతనానికి పాల్పడినట్లు రికార్డ్ అయింది. దుండిగల్ పోలీసులు ఈ ఘటనపై కేసు నమోదు చేసి, దర్యాప్తు చేస్తున్నారు.

ఊరెళ్లేవారికి పోలీసుల సూచనలు, భద్రతా చర్యలు..

పండుగలు, సెలవుల నేపథ్యంలో ప్రజలు తమ ఇళ్లకు తాళాలు వేసి షాపింగ్ లకు, ఊళ్లకు వెళ్లడం సర్వసాధారణం. అయితే.. ఇదే సమయాన్ని దొంగలు అవకాశంగా తీసుకుంటున్నారు. ఈ నేపథ్యంలో.. పోలీసులు పౌరులందరూ దొంగతనాల నివారణకు కొన్ని ప్రాథమిక జాగ్రత్తలు పాటించాలని సూచిస్తున్నారు.

వాటిలో ముఖ్యంగా పొరుగువారికి సమాచారం ఇవ్వుడం. ఇంటికి తాళం వేసి బయటకు వెళ్లే ముందు, మీ నమ్మకమైన పొరుగువారికి లేదా బంధువులకు తప్పకుండా తెలియజేయడం ఉత్తమం. వారు మీ ఇంటిని అప్పుడప్పుడు పర్యవేక్షించే అవకాశం ఉంటుంది. ఎక్కువ రోజులు ఊరెళ్లేవారు దగ్గరలోని పోలీస్ స్టేషన్‌లో సమాచారం అందించి.. తమ ఇంటి వివరాలను నమోదు చేయవచ్చు. పోలీసులు ఆ ప్రాంతంలో తరచూ పెట్రోలింగ్ నిర్వహించే అవకాశం ఉంటుంది.

వీలైనంత వరకు సీసీటీవీ కెమెరాలు, అలారం వ్యవస్థలు వంటి భద్రతా పరికరాలను ఏర్పాటు చేసుకోవాలి. సీసీటీవీలను ఇంటి చుట్టూ అమర్చడం వల్ల దొంగలు గుర్తించబడే అవకాశం పెరుగుతుంది. పూట ఆన్ చేసి ఉంచడం, లేదా ఆటోమేటిక్ టైమర్లతో లైట్లను ఆన్/ఆఫ్ అయ్యేలా చేయడం వంటి చర్యల ద్వారా ఇంట్లో ఎవరో ఉన్నారనే భ్రమను కల్పించవచ్చు. విలువైన బంగారు ఆభరణాలు, నగదు వంటి వాటిని ఇంట్లో ఉంచకుండా బ్యాంకు లాకర్లలో భద్రపరచడం అత్యంత శ్రేయస్కరం. ఈ జాగ్రత్తలు తీసుకోవడం ద్వారా దొంగతనాలు జరిగే అవకాశాలను తగ్గించుకోవచ్చని పోలీసులు స్పష్టం చేశారు.