రాష్ట్రవ్యాప్తంగా బంద్ పిలుపు.. ఆక్టోబర్ 14 ప్రధాన సమస్య ఏంటి?

తెలంగాణలో స్థానిక సంస్థల ఎన్నికల సందర్భంగా బీసీ రిజర్వేషన్లపై హైకోర్టు స్టే విధించడంతో రాష్ట్ర రాజకీయాలు ఒక్కసారిగా వేడెక్కాయి. ముఖ్యమంత్రి రేవంత్ రెడ్డి ప్రభుత్వం పట్ల బీసీ సంఘాలు తీవ్ర అసంతృప్తి వ్యక్తం చేస్తున్నాయి.తమపై తీవ్రమైన అన్యాయం జరిగిందని ఆరోపిస్తూ, రిజర్వేషన్ల సాధన కోసం ఈ నెల 14వ తేదీన రాష్ట్రవ్యాప్తంగా తెలంగాణ బంద్‌కు బీసీ సంఘాలు పిలుపునిచ్చాయి. ఈ బంద్ కారణంగా ఆ రోజు స్కూళ్లు, కాలేజీలు మూసివేసే అవకాశం ఉండడంతో విద్యార్థులకు అదనపు సెలవు లభించే సూచనలు కనిపిస్తున్నాయి.హైదరాబాద్‌లోని బషీర్‌బాగ్ ప్రెస్‌క్లబ్‌లో శుక్రవారం జరిగిన బీసీ సంఘాల సమావేశంలో బీసీ సంక్షేమ సంఘం వ్యవస్థాపకుడు ఆర్. కృష్ణయ్య కీలక వ్యాఖ్యలు చేశారు. ఆయన కాంగ్రెస్ ప్రభుత్వం, ముఖ్యంగా సీఎం రేవంత్ రెడ్డి విధానాలపై తీవ్రస్థాయిలో విమర్శలు గుప్పించారు.ఎన్నికల షెడ్యూల్ విడుదలైన తర్వాత ఎన్నికల ప్రక్రియను నిలిపివేయడం సుప్రీంకోర్టు మార్గదర్శకాలకు విరుద్ధమని ఆయన అభిప్రాయపడ్డారు. ఈ నిర్ణయం దురదృష్టకరమని, రాష్ట్రంలోని 56 శాతం బీసీ ప్రజల హక్కులను ఇది దెబ్బతీసిందని కృష్ణయ్య పేర్కొన్నారు.“బీసీల ఆత్మగౌరవాన్ని రేవంత్ రెడ్డి దెబ్బతీశారు. మా నోటికాడి అన్నం ముద్దను లాక్కున్నట్లుంది,” అని ఆయన మండిపడ్డారు. హైకోర్టు ఇచ్చిన స్టే ఆదేశాలపై రాష్ట్ర ప్రభుత్వం వెంటనే రివ్యూ పిటిషన్ దాఖలు చేయాలని ఆయన విజ్ఞప్తి చేశారు.బీసీ రిజర్వేషన్లను అమలు చేయడంలో ప్రభుత్వం విఫలమైతే, రేవంత్ రెడ్డి దాని మూల్యం చెల్లించుకోవాల్సి వస్తుందని ఆయన హెచ్చరించారు. ఈ పోరాటాన్ని మండల్ కమిషన్ ఉద్యమం తరహాలో ఉద్ధృతం చేస్తామని వెల్లడించారు.బీసీలలో ఇప్పుడు చైతన్యం వెల్లివిరుస్తోందని, ఊరూరా నిరసనలు, ధర్నాలు, రాస్తా రోకోలు నిర్వహిస్తామని తెలిపారు. అన్ని బీసీ సంఘాల ఆధ్వర్యంలో అక్టోబర్ 14న మిలియన్ మార్చ్ తరహా తెలంగాణ బంద్ నిర్వహించనున్నట్లు ప్రకటించారు.ఈ బంద్‌కు మద్దతు ఇవ్వాలని ఎంపీలు, ఎమ్మెల్యేలు, ప్రజా ప్రతినిధులను ఆయన ఆహ్వానించారు. “ఈ బంద్ రాష్ట్రాన్నే కాకుండా దేశాన్ని కదిలించేలా ఉంటుంది. బీసీల శక్తి ఏంటో చూపించే సమయం వచ్చింది,” అని ఆర్. కృష్ణయ్య స్పష్టం చేశారు.బీసీ రిజర్వేషన్ల సాధన కోసం రేపటి నుంచే ఉద్యమాలు ప్రారంభమవుతాయని ఆయన హెచ్చరించారు. అక్టోబర్ 14న జరగబోయే బంద్ తెలంగాణలో తీవ్ర ప్రభావం చూపే అవకాశం ఉంది.