తెలంగాణలోని ఆ రెండు జిల్లాల్లో..,టీ-హబ్ తరహాలో ఇంక్యూబేషన్ కేంద్రాలు

తెలంగాణ రాష్ట్రాన్ని ఇన్నోవేషన్ హబ్‌గా మార్చాలనేది తమ ప్రభుత్వ ముఖ్య సంకల్పమని రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్ బాబు స్పష్టం చేశారు. కేవలం హైదరాబాద్‌కే పరిమితం కాకుండా.. రాష్ట్రంలోని ఇతర ముఖ్య నగరాలకు కూడా ఆవిష్కరణల కేంద్రాన్ని విస్తరించేందుకు ముఖ్య ప్రణాళికలు సిద్ధం చేస్తున్నట్లు ఆయన వెల్లడించారు.

టీ-హబ్ తరహాలో ..

హైదరాబాద్‌లో విజయవంతంగా నడుస్తున్న టీ-హబ్ తరహాలోనే వరంగల్, నల్గొండ నగరాలలోనూ ఇంక్యూబేషన్ కేంద్రాలను ఏర్పాటు చేయబోతున్నట్లు శ్రీధర్ బాబు ప్రకటించారు. ఈ కేంద్రాల స్థాపన కోసం త్వరలోనే కాకతీయ విశ్వవిద్యాలయం (KU), మహాత్మా గాంధీ విశ్వవిద్యాలయం లతో అవగాహన ఒప్పందాలు కుదుర్చుకోనున్నట్లు ఆయన వివరించారు.

ఈ కేంద్రాల ఏర్పాటు ద్వారా స్థానిక యువతలో ఔత్సాహిక పారిశ్రామికవేత్తలను ప్రోత్సహించి, వారికి తగిన వాతావరణాన్ని, మద్దతును అందించాలని ప్రభుత్వం లక్ష్యంగా పెట్టుకుంది. నాంపల్లి ఎగ్జిబిషన్ గ్రౌండ్‌లో జరిగిన ‘ కాకతీయ యూనివర్సిటీ ఫార్మా అలుమ్ని ’ గోల్డెన్ జూబ్లీ వేడుకలను మంత్రి కోమటిరెడ్డి వెంకటరెడ్డితో కలిసి ఆయన లాంఛనంగా ప్రారంభించారు. మంత్రి శ్రీధర్ బాబు తెలంగాణ విజన్‌ను వివరిస్తూ.. రాష్ట్రాన్ని కేవలం గ్లోబల్ ఫార్మా, లైఫ్ సైన్సెస్ హబ్‌గా మాత్రమే కాకుండా.. ‘ఫార్మసీ ఆఫ్ పర్పస్’గా మార్చాలనేదే ప్రభుత్వ ధ్యేయమన్నారు.

సైన్స్‌కు మానవత్వాన్ని జోడించినప్పుడే ప్రతి ఆవిష్కరణ సమాజ హితానికి బాటలు వేస్తుందని ఆయన అభిప్రాయపడ్డారు. రోగాలను యంత్రాలు త్వరగా నిర్ధారించినా, రోగి బాధను అనుభూతి చెందే మనసును ఏ యంత్రం కూడా భర్తీ చేయలేదని మానవత్వం ప్రాధాన్యతను చెప్పారు. రాష్ట్రంలో రీసెర్చ్‌ను మార్కెట్‌కు, పాలసీని రోగికి అనుసంధానించే సమగ్రమైన 360 డిగ్రీల ఎకోసిస్టమ్‌ను అభివృద్ధి చేస్తున్నామని.. గత 18 నెలల్లోనే లైఫ్ సైన్సెస్ రంగంలో రూ. 54 వేల కోట్లకు పైగా కొత్త పెట్టుబడులు తీసుకురాగలిగామని తెలిపారు. ఎలీ లిల్లీ వంటి అంతర్జాతీయ ఫార్మా దిగ్గజాలను రాష్ట్రానికి రప్పించి, ఉద్యోగాలు కల్పించేందుకు ప్రభుత్వం చిత్తశుద్ధితో పనిచేస్తోందని తెలిపారు.

విదేశాలలో స్థిరపడిన ప్రవాసీ భారతీయ నిపుణులు తమ అపారమైన అనుభవాన్ని కేవలం పెట్టుబడి రూపంలోనే కాకుండా.. ‘నాలెడ్జ్ ఇన్వెస్ట్‌మెంట్’ రూపంలో దేశానికి అందించడానికి ముందుకు రావాలని మంత్రి శ్రీధర్ బాబు విజ్ఞప్తి చేశారు. యువ ఆవిష్కర్తలకు దిశానిర్దేశం చేస్తూ.. పేటెంట్ల గురించి కాకుండా, తమ ఆవిష్కరణ వల్ల ఎంతమందికి మేలు జరిగిందనేదే చరిత్ర గుర్తుంచుకుంటుందని వారికి ప్రోత్సాహం అందించారు.