డీసీసీబీల్లో ఉద్యోగాల భర్తీకి నోటిఫికేషన్ విడుదల

తెలంగాణ రాష్ట్రంలోని సహకార బ్యాంకింగ్ రంగంలో ఉద్యోగావకాశాల కోసం ఎదురుచూస్తున్న అభ్యర్థులకు ఇది ఒక శుభవార్త. తెలంగాణ స్టేట్ కోఆపరేటివ్ అపెక్స్ బ్యాంక్ లిమిటెడ్ (TGCAB), రాష్ట్రంలోని ఆరు ప్రధాన జిల్లాలలోని సహకార బ్యాంకుల్లో (DCCB) 225 స్టాఫ్ అసిస్టెంట్ ఉద్యోగాల భర్తీకి అధికారిక ప్రకటన విడుదల చేసింది.

జిల్లా సహకార బ్యాంకుల్లో ఉద్యోగాలు..

టీజీసీఏబీ ఈ భర్తీ ప్రక్రియను హైదరాబాద్, కరీంనగర్, ఖమ్మం, మహబూబ్‌నగర్, మెదక్, వరంగల్ జిల్లాల్లోని జిల్లా సహకార కేంద్ర బ్యాంకుల్లో చేపట్టనుంది. ఈ నోటిఫికేషన్ ద్వారా 225 స్టాఫ్ అసిస్టెంట్ పోస్టులను భర్తీ చేస్తారు. జిల్లాల వారీగా ఖాళీలు చూసుకుంటే ఇలా ఉన్నాయి. ఖమ్మం జిల్లాలో 99 పోస్టులు, కరీంనగర్ జిల్లాలో 43, హైదరాబాద్ లో 32, మెదక్ జిల్లాలో 21, వరంగల్ జిల్లాలో 21, మహబూబ్‌నగర్ జిల్లాలో 09 పోస్టులు ఖాళీగా ఉన్నాయి.

 ఈ పోస్టులకు దరఖాస్తు చేసుకోవడానికి ఆసక్తిగల అభ్యర్థులు కొన్ని నిర్దిష్ట అర్హతలను కలిగి ఉండాలి. ఏదైనా గుర్తింపు పొందిన విశ్వవిద్యాలయం నుంచి గ్రాడ్యుయేషన్ పూర్తి చేసి ఉండాలి. తెలుగు భాషలో పూర్తి పరిజ్ఞానం కలిగి ఉండాలి. అలాగే.. ఆంగ్లంలో కూడా అవగాహన తప్పనిసరి. దరఖాస్తు చేసేవారు తెలంగాణ రాష్ట్రానికి స్థానికులై ఉండాలి.

వయోపరిమితి , ఎంపిక పద్ధతుల్లో నిబంధనల ప్రకారం సడలింపులు వర్తిస్తాయి. 2025 అక్టోబరు 1వ తేదీ నాటికి 18 నుంచి 30 ఏళ్ల మధ్య వయస్సు కలిగి ఉండాలని నోటిఫికేషన్ లో పేర్కొన్నారు. వీటిలో ఎస్సీ, ఎస్టీ, బీసీ, ఈడబ్ల్యూఎస్ వర్గాల అభ్యర్థులకు ఐదేళ్లు, దివ్యాంగులకు వారి కేటగిరీని బట్టి పది నుంచి పదిహేను సంవత్సరాల వరకు వయస్సులో మినహాయింపు ఉంటుంది.

ఈ పోస్టుకు ఎంపికైన వారికి నెలకు రూ. 24,050 నుంచి రూ. 64,480 వరకు వేతనం ఉంటుంది. దీనికి ఇతర భత్యాలు కూడా అదనంగా చేరతాయి. ఆన్‌లైన్ ద్వారా నిర్వహించే రాత పరీక్ష, ధ్రువపత్రాల పరిశీలన ఆధారంగా ఉద్యోగార్థులను ఎంపిక చేస్తారు. దరఖాస్తులు ఆన్‌లైన్ పద్ధతిలో నవంబర్ 6, 2025 వరకు స్వీకరిస్తారు. దరఖాస్తు రుసుము జనరల్, బీసీ, ఈడబ్ల్యూఎస్ అభ్యర్థులకు రూ. 750 కాగా, ఎస్సీ, ఎస్టీ, దివ్యాంగులకు రూ. 250గా నిర్ణయించారు. ఎంపికైన అభ్యర్థులకు నెలకు జీతం రూ.24,050 నుంచి రూ.64,480 మధ్య ఉంటుంది. వీటితో పాటు.. ఇతర అలవెన్సులు కూడా ఉంటాయి. నోటిఫికేషన్ కొరకు డైరెక్ట్ గా ఇక్కడ క్లిక్ చేయండి. ఆన్ లైన్ దరఖాస్తుల కొరకు ఇక్కడ క్లిక్ చేసి పూర్తి చేయవచ్చు.