హైదరాబాద్‌లోని ఆ మెట్రో స్టేషన్ వద్ద బుల్లెట్ కలకలం

హైదరాబాద్ నగరంలో మరోసారి భద్రతా వ్యవస్థలను అప్రమత్తం చేసిన సంఘటన చోటుచేసుకుంది. శనివారం రాత్రి మూసాపేట మెట్రో స్టేషన్‌లో రొటీన్ స్కానింగ్ సందర్భంగా ఓ ప్రయాణికుడి వద్ద బుల్లెట్ లభించడం కలకలం రేపింది. వివరాల ప్రకారం.. బీహార్‌కు చెందిన మహమ్మద్ అనే యువకుడు ప్రస్తుతం మూసాపేట ప్రగతినగర్‌లో నివసిస్తూ ఫ్యాబ్రికేషన్ పనులు చేస్తుంటాడు. సాధారణంగా ఇతర ప్రయాణికుల మాదిరిగానే మెట్రోలో ప్రయాణించేందుకు వచ్చాడు. అయితే.. తన దగ్గర ఉన్న బ్యాగ్‌ను స్కానర్‌లో ఉంచినప్పుడు అలారం మోగడంతో భద్రతా సిబ్బంది అప్రమత్తమయ్యారు.

దీంతో వారు యువకుడిని క్షుణ్ణంగా తనిఖీ చేయగా అతడి వద్ద 9 మిల్లీమీటర్ల బుల్లెట్ బయటపడింది. ఈ సంఘటనతో భద్రతా సిబ్బంది వెంటనే కూకట్‌పల్లి పోలీసులకు సమాచారం అందించారు. పోలీసులు అక్కడికి చేరుకుని మహమ్మద్‌ను విచారణకు తీసుకున్నారు. అతడు బుల్లెట్ ఎలా తన దగ్గరికి వచ్చిందన్న దానిపై స్పష్టమైన సమాధానం ఇవ్వలేకపోవడంతో పోలీసులు మరింత లోతుగా దర్యాప్తు చేస్తున్నారు. ఈ బుల్లెట్ ఏదైనా అక్రమ ఆయుధ వ్యాపారానికి సంబంధించినదా.. లేక మరేవిధంగానైనా అతడ దగ్గరికి వచ్చిందా అనే కోణంలో విచారణ కొనసాగుతోంది.

ఇలాంటి ఘటనలు మెట్రో స్టేషన్ల భద్రతపై మరోసారి ప్రశ్నలు లేవనెత్తాయి. ప్రతి రోజూ వేలాది మంది ప్రయాణించే మెట్రోలో ఇలాంటి వస్తువులు బయటపడటం భద్రతా వ్యవస్థ మరింత కట్టుదిట్టం కావాల్సిన అవసరాన్ని స్పష్టం చేస్తోంది. భవిష్యత్తులో ఇలాంటి సంఘటనలు జరగకుండా సెక్యూరిటీ తనిఖీలను మరింత బలోపేతం చేయాలని అధికారులు నిర్ణయించారు.

ప్రయాణికుడి వద్ద బుల్లెట్ దొరకడం అనేది మెట్రో భద్రతకు సంబంధించిన సున్నితమైన విషయం. అతని వద్ద బుల్లెట్ ఎందుకు ఉంది, అది ఎక్కడి నుంచి వచ్చింది, ఏ ఉద్దేశంతో తీసుకువస్తున్నాడు అనే విషయాలను పోలీసులు లోతుగా తనిఖీ చేస్తున్నారు. ఈ సంఘటన నగరంలో శాంతిభద్రతల పరిస్థితిని మరొక్కసారి చర్చనీయాంశం చేసింది. బుల్లెట్‌కు సంబంధించి మహమ్మద్ సరైన వివరణ ఇవ్వలేకపోతే.. అతనిపై చట్టపరమైన చర్యలు తీసుకునే అవకాశం ఉంది. వివిధ ప్రాంతాల నుంచి హైదరాబాద్‌కు వచ్చి నివసిస్తున్న వారందరి నేపథ్యాన్ని పరిశీలించాల్సిన అవసరం ఉందని భద్రతా నిపుణులు అభిప్రాయపడుతున్నారు.