రైలులో బైక్ ఎలా పార్సిల్ చేయాలో తెలుసా.. ఇదిగో ప్రాసెస్

రైలులో బైక్‌ను రవాణా చేయడానికి ప్రధానంగా రెండు మార్గాలు ఉన్నాయి. లగేజ్ అండ్ పార్సిల్. లగేజ్ అంటే మీరు ప్రయాణిస్తున్న అదే రైలులో బైక్‌ను పంపడం. పార్సిల్ అంటే మీ ప్రయాణంతో సంబంధం లేకుండా.. ఖాళీ ఉన్న ఏదైనా రైలులో బైక్‌ను పంపడం . మీ బైక్ ను ట్రైన్ లో పార్సిల్ చేయాలని అనుకుంటే.. ముందుగా.. బైక్‌ను సిద్ధం చేయాలి. అంటే.. రైలులో పార్సిల్ చేసే ముందు.. బైక్ ట్యాంక్‌లో పెట్రోల్ పూర్తిగా ఖాళీ చేయాలి. ఇది రైల్వే నిబంధన. ట్యాంక్‌లో ఇంధనం ఉంటే పార్సిల్‌ను తిరస్కరిస్తారు.

రవాణా సమయంలో నష్టం జరగకుండా.. బైక్‌ను పటిష్టంగా ప్యాక్ చేయించాలి. ముఖ్యంగా హ్యాండిల్, హెడ్‌లైట్, అద్దాలు వంటి సున్నితమైన భాగాలను బబుల్ ర్యాప్, మందపాటి బట్టలు లేదా గోనె సంచులతో చుట్టాలి. అవసరమైన పత్రాలు సిద్ధం చేసుకోవాలి. పార్సిల్ కార్యాలయంలో బైక్‌ను అప్పగించే ముందు వాహనం రిజిస్ట్రేషన్ సర్టిఫికేట్ (RC) అసలు కాపీ, దాని జిరాక్స్.. వాహనం బీమా పత్రం జిరాక్స్, ఆధార్ కార్డు లేదా డ్రైవింగ్ లైసెన్స్ (ఐడీ ప్రూఫ్) జిరాక్స్ లను సిద్ధం చేసుకోవాలి.

అసలు పత్రాలను రైల్వే అధికారికి చూపించి.. జిరాక్సులను జత చేయాల్సి ఉంటుంది. రైలు బయలుదేరే సమయానికి కనీసం 24 గంటల ముందు స్టేషన్‌లోని పార్సిల్ కార్యాలయానికి చేరుకోవాలి. పార్సిల్ అప్లికేషన్ ఫారం (దరఖాస్తు పత్రం)ను పూర్తి చేసి.. బైక్‌కు సంబంధించిన వివరాలు, గమ్యస్థానాన్ని స్పష్టంగా నమోదు చేయాలి. పార్సిల్ కార్యాలయ సిబ్బంది పెట్రోల్ ట్యాంక్ ఖాళీగా ఉందో లేదో తనిఖీ చేస్తారు. బైక్ బరువు , ప్రయాణించాల్సిన దూరం ఆధారంగా చార్జీలు నిర్ణయించబడతాయి. ఈ చార్జీలు చెల్లించిన తర్వాత.. రైల్వే అధికారులు మీకు ఒక రసీదు (ఎండార్స్‌మెంట్) ఇస్తారు. దీనిని చాలా జాగ్రత్తగా భద్రపరచుకోవాలి.

మీ బైక్‌కు ఏదైనా నష్టం జరిగితే నష్టపరిహారం పొందడానికి.. బుకింగ్ సమయంలో పార్సిల్ భీమా (ఇన్సూరెన్స్) తీసుకోవడం చాలా మంచిది. దీనికి స్వల్పంగా అదనపు రుసుము చెల్లించాల్సి ఉంటుంది. బైక్ విలువను డిక్లేర్ చేయడం ద్వారా పూర్తి భద్రత లభిస్తుంది. బైక్ గమ్యస్థానం చేరుకున్న తర్వాత.. మీరు ఆ స్టేషన్‌లోని పార్సిల్ కార్యాలయాన్ని సంప్రదించాల్సి ఉంటుంది. మీ వద్ద ఉన్న రసీదు అసలు పత్రాన్ని అక్కడ చూపించి బైక్‌ను కలెక్ట్ చేసుకోవచ్చు. బైక్ స్టేషన్‌కు చేరిన తర్వాత.. వెంటనే తీసుకుంటే ఆలస్యం రుసుము లేకుండా ఉంటుంది. ఆలస్యమైతే అదనపు రుసుము చెల్లించాల్సి వస్తుంది. రైల్వే పార్సిల్ విధానం చాలా సింపుల్ కానీ.. సరైన పత్రాలు, ప్యాకింగ్‌తో వెళితే ప్రక్రియ త్వరగా పూర్తవుతుంది.