రిజిస్ట్రేషన్ తర్వాత బుద్ధి చూపెట్టాడు

వృద్ధాప్యంలో మనవడిపై పెట్టుకున్న ఆశలు అడియాశలయ్యాయి. తనపై ప్రేమతో ఇంటిని బహుమతిగా రాసిచ్చిన 91 ఏళ్ల విశ్రాంత ఉపాధ్యాయుడిని ఆ మనవడు నిర్దాక్షిణ్యంగా ఇంట్లోంచి గెంటేశాడు. దీంతో అతడు న్యాయస్థానాలను ఆశ్రయించి.. ఇంటి బహుమతి పత్రాన్ని (గిఫ్ట్ డీడ్) రద్దు చేయించుకోగలిగారు. మానవ సంబంధాల విలువలను తెలియజేస్తూ.. వృద్ధుల హక్కులకు బలం చేకూర్చే ఈ సంఘటన తాజాగా వెలుగులోకి వచ్చింది. పూర్తి వివరాల్లోకి వెళ్తే..

సి. రాములు అనే విశ్రాంత ఉపాధ్యాయుడు తన పదవీ విరమణ డబ్బుతో, ఇతర ఆదాయంతో కీసర మండలం కొత్తపేటలో ఒక సొంత ఇంటిని కొనుగోలు చేసుకున్నారు. ఎనిమిదేళ్ల క్రితం కుమారుడు మరణించడంతో.. ఒంటరిగా ఉన్న రాములు పెద్ద మనవడు శ్రీనివాస్‌పై ప్రేమతో.. తనను చూసుకుంటాడనే ఆశతో.. 2018లో ఆ ఇంటిని గిఫ్ట్ డీడ్‌గా రాసిచ్చారు.

అయితే.. ఆ ఇంటిని బహుమతిగా పొందిన కొద్ది నెలలకే మనవడు శ్రీనివాస్ అసలు స్వరూపం బయటపడింది. ఏ మాత్రం కనికరం లేకుండా శ్రీనివాస్ తన తాత రాములును, అలాగే తన తల్లి.. సోదరుడిని కూడా ఆ ఇంట్లోంచి గెంటేశాడు. ఆస్తి కోసం ప్రేమను నటించిన మనవడి చర్యతో రాములు పూర్తిగా కుంగిపోయారు.

న్యాయం కోసం పోరాడాలని నిర్ణయించుకున్న రాములు, వృద్ధుల సంక్షేమ చట్టం-2007 ప్రకారం 2021లో మేడ్చల్ జిల్లా కలెక్టరేట్‌లో ఫిర్యాదు చేశారు. ఈ చట్టం ప్రకారం.. వృద్ధులు తమ సంరక్షణ కోసం ఎవరికైనా ఆస్తిని బదిలీ చేసిన తర్వాత.. ఆ లబ్ధిదారులు వారిని నిర్లక్ష్యం చేస్తే, ఆస్తి బదిలీని రద్దు చేసే అధికారం కలెక్టర్‌కు ఉంటుంది.

పలుమార్లు విచారణ జరిపిన అనంతరం.. మేడ్చల్ జిల్లా కలెక్టర్ ఆ గిఫ్ట్ డీడ్‌ను రద్దు చేస్తూ ఆదేశాలు జారీ చేశారు. కలెక్టర్ ఆదేశాలపై మనవడు శ్రీనివాస్ సంతృప్తి చెందక తెలంగాణ హైకోర్టును ఆశ్రయించాడు. తన తాత ఇంటిని బహుమతిగా రాసిచ్చిన పత్రాల్లో ఎక్కడా ‘తాతను పోషించాలి’ అనే నిబంధన లేదని.. కాబట్టి గిఫ్ట్ డీడ్‌ను రద్దు చేయడం సరికాదని వాదించాడు.

సుమారు నాలుగేళ్లపాటు ఈ కేసు విచారణ కొనసాగింది. విచారణ సందర్భంగా జస్టిస్ పుల్లా కార్తీక్ ఇరువర్గాల వాదనలు విన్నారు. సుప్రీంకోర్టు తాజా తీర్పులను ఉటంకిస్తూ.. బహుమతి పత్రంలో అలాంటి నిబంధన లేకపోయినా కూడా.. ఆస్తిని తీసుకున్న వ్యక్తి వృద్ధులను ఉద్దేశపూర్వకంగా నిర్లక్ష్యం చేస్తే.. ఆ బహుమతి పత్రాన్ని రద్దు చేయడానికి ఆ కారణం సరిపోతుందని కొద్దిరోజుల క్రితం చారిత్రాత్మక తీర్పు ప్రకటించారు. ఈ తీర్పుతో కలెక్టర్ తీసుకున్న గిఫ్ట్ డీడ్ రద్దు నిర్ణయం సబబేనని హైకోర్టు ధృవీకరించింది. తాజా తీర్పు నేపథ్యంలో.. తన ఇంటిని ఖాళీ చేయించి ఇప్పించాలని కోరుతూ రాములు ప్రస్తుతం మేడ్చల్ జిల్లా కలెక్టర్‌ను అభ్యర్థించారు. వృద్ధులకు న్యాయం దక్కేలా ఈ చట్టం, కోర్టు తీర్పులు ఒక ముందడుగుగా నిలిచాయి.