ప్రాణాలు కాపాడుతున్న సోషల్ మీడియా అల్గారిథమ్,,,,4 వారాల్లో 12 మందిని కాపాడిన తెలంగాణ పోలీసులు

ప్రియురాలు తిరస్కరించిందని, భర్త కొట్టాడని, పరీక్షలో ఫెయిల్ అయ్యామని, అనుకున్న పని కాలేదని.. ఇలా అనేక కారణాల వల్ల చాలా మంది ఆత్మహత్యలకు పాల్పడుతున్నారు. ఇటీవల హైదరాబాద్‌లో తల్లిదండ్రులు మందలించడంతో ఓ ఎనిమిదో తరగతి బాలుడు ఆత్మహత్య చేసుకున్నాడు. ఆత్మహత్యలకు పాల్పడుతున్న వారు తమ చావుకు కారణాలను వీడియో రూపంలో సోషల్ మీడియాలో పోస్ట్ చేస్తున్నారు. అయితే ఇలా సోషల్ మీడియాలో తాము చనిపోతున్నట్లు తెలిపిన వారిని.. నిమిషాల్లో అలర్ట్ అయ్యి తెలంగాణ పోలీసులు కాపాడుతున్నారు. నాలుగు వారాల్లో 12 మందిని ఇలాగే కాపాడారు. ఇదంతా సోషల్ మీడియా అల్గారిథమ్ వల్లే సాధ్యమైంది. ఆ వివరాలు..

వనర్తికి చెందిన ఓ పాలిటెక్నిక్ విద్యార్థి.. 30 సబ్జెక్టుల్లో ఫెయిల్ అయ్యాడు. ఈ మేరకు తన తండ్రితో జరిగిన వాగ్వాదం తర్వాత ఆత్మహత్య చేసుకుంటున్నట్లు ఇన్‌స్టాగ్రామ్‌లో వీడియో రికార్డ్ చేశాడు. సదరు విద్యార్థి వీడియో పోస్ట్ చేసిన వెంటనే తెలంగాణ సైబర్ సెక్యూరిటీ బ్యూరో సోషల్ మీడియా విభాగం.. అతడు ఎక్కడున్నాడో నిమిషాల్లో గుర్తించి కాపాడింది. ఒంటరిగా బాధపడుతున్న ఆ విద్యార్థికి కౌన్సెలింగ్ ఇచ్చి సురక్షిత ప్రాంతానికి తరలించారు.

నిజామాబాద్‌కు చెందిన ఓ వ్యక్తి కూడా కుటుంబ కలహాలతో మనస్తాపం చెంది ఆత్మహత్య చేసుకుంటున్నట్లు ఇన్‌స్టాగ్రామ్‌లో వీడియో పోస్ట్ చేశాడు. వెంటనే ఇన్‌స్టాగ్రామ్‌ అల్గారిథమ్ దాన్ని గుర్తించి.. TGSCB పోలీసులను అలర్ట్ చేసింది. వెంటనే వారు స్థానిక పోలీసులకు సమాచారం అందించగా.. వారు రంగంలోకి దిగి ఆ వ్యక్తిని కాపాడారు. ఇలా ఆత్మహత్య ప్రయత్నం చేసిన వారిని నిమిషాల్లో గుర్తించి.. నాలుగు వారాల వ్యవధిలో 12 మంది కాపాడినట్లు పోలీసులు తెలిపారు.

ఇన్‌స్టాగ్రామ్‌ అల్గారిథమ్ ఎలా పనిచేస్తుంది?

సోషల్ మీడియా ప్లాట్‌ఫామ్స్‌లో ఉండే వ్యవస్థలు ఇలాంటి సెల్ఫ్-హార్మ్ (ఆత్మహత్యలు) కంటెంట్‌ను గుర్తించేలా డిజైన్ చేశారు. రెండు మూడు మాత్రలు ఒకేసారి వేసుకోవడం, బ్లేడ్‌తో కట్ చేసుకున్న గాయాలు, ఫినాయిల్ వంటి హానికర కెమికల్స్ తాగడం వంటి వీడియోలతో పాటు.. "ఇదే నా ఆఖరి రోజు" అనే క్యాఫ్షన్లను అల్గారిథమ్ రీడ్ చేస్తుంది. ఈ క్రమంలో వీడియో, ఫొటోలు, టెక్ట్స్ మెసేజ్‌లు, లైవ్ స్ట్రీమింగ్‌ వంటి సెల్ఫ్-హార్మ్ కంటెంట్ ఏదైనా అల్గారిథమ్‌కు దొరికితే.. వాటి గురించి TGCSBకి రియల్ టైమ్ అలర్ట్‌లు ఇస్తుంది. వారు వెంటనే స్థానిక పోలీసులను అప్రమత్తం చేస్తారు. 10 నిమిషాల్లో తమకు అలర్ట్స్ వస్తాయని.. వాటిని తాము స్థానిక పోలీసులకు ఫార్వార్డ్ చేస్తామని TGCSB డైరెక్టర్ జనరల్ శిఖా గోయెల్ తెలిపారు.

ఫేస్‌బుక్ మతృసంస్థ మెటాకు చెందిన సోషల్ మీడియా ప్లాట్‌ఫామ్స్ నుంచి ఇలాంటి అలర్ట్‌లు ఎక్కువగా వస్తాయని పోలీసులు తెలిపారు. కేవలం హైదరాబాద్ మత్రమే కాకుండా సైబరాబాద్, జగిత్యాల, ఖమ్మం, మహబూబ్‌నగర్, నల్గొండ, నిజామాబాద్, సిద్దిపేట, వనపర్తి జిల్లాల్లో కూడా స్థానిక పోలీసులను అలర్ట్ చేసి.. కొందరి ప్రాణాలు కాపాడినట్లు పోలీసులు వెల్లడించారు. అంతేకాకుండా మరో రెండు కేసులు తెలంగాణ వెలుపలి నుంచి కూడా వచ్చినట్లు చెప్పారు.

ఇలాంటి సెల్ఫ్-హార్మ్ గురించి అలర్ట్‌లు అందించేలా పలు మేజర్ సోషల్ మీడియా ప్లాట్‌ఫ్లామ్‌లతో తమకు అవగాహన ఒప్పందాలు ఉన్నాయని శిఖా గోయెల్ తెలిపారు. ఇలాంటి కేసుల్లో బాధితులతో పాటు వారి కుటుంబాలకు కౌన్సెలింగ్ ఇప్పిస్తున్నట్లు తెలిపారు. ఈ మేరకు తాము కొన్ని ఎన్జీవోలతోకూడా భాగస్వామ్యం కుదుర్చుకుంటున్నామని తెలిపారు.