సికింద్రాబాద్ రైల్వే స్టేషన్ అందుబాటులోకి వచ్చేది అప్పుడే

ప్రస్తుతం సికింద్రాబాద్ రైల్వే స్టేషన్‌కు వెళ్లాలంటే ప్రయాణికులు తీవ్ర అసహనానికి గురవుతున్నారు. స్టేషన్ ఆధునికీకరణ పనులు వేగంగా జరుగుతున్న నేపథ్యంలో.. ఆ ప్రాంతంలో ట్రాఫిక్ రద్దీ అధికంగా ఉంటోంది. అంతేకాకుండా.. వాహనాలను పార్కింగ్ చేయడంలోనూ ప్రయాణికులు ఇబ్బందులు పడుతున్నారు. దీనికి తోడు నిర్మాణ పనుల కారణంగా పెరిగిన కాలుష్యం (పొల్యూషన్) వారి ఆరోగ్యంపై ప్రభావం చూపుతోంది. ఇలా పలు రకాల సమస్యల కారణంగా రైలు ఎక్కేందుకు సికింద్రాబాద్ రైల్వే స్టేషన్‌కు వెళ్లాలంటే చాలా ఇబ్బందికరంగా భావిస్తున్నారు. ఈ సమస్యపై కేంద్ర మంత్రి కిషన్ రెడ్డి ప్రయాణికులకు శుభవార్త చెప్పారు. దీనికి సంబంధించి పూర్తి వివరాల్లోకి వెళ్తే..

వచ్చే ఏడాది నాటికి దక్షిణ మధ్య రైల్వే ప్రయాణికులకు మెరుగైన ప్రయాణ అనుభూతిని అందించే లక్ష్యంతో.. హైదరాబాద్‌లోని కీలక రైల్వే స్టేషన్ల ఆధునికీకరణ పనులు వేగవంతమయ్యాయి. కేంద్ర మంత్రి కిషన్ రెడ్డి శుక్రవారం నాడు హైటెక్ సిటీ రైల్వే స్టేషన్‌ను అధికారులతో కలిసి పరిశీలించిన అనంతరం ఈ విషయాలను వెల్లడించారు. కేంద్ర మంత్రి కిషన్ రెడ్డి మాట్లాడుతూ.. సికింద్రాబాద్ రైల్వే స్టేషన్ సుందరీకరణ పనులు వచ్చే ఏడాదిలోగా పూర్తి స్థాయిలో పూర్తయి.. ప్రయాణికులకు అందుబాటులోకి వస్తుందని పేర్కొన్నారు. సికింద్రాబాద్‌కు సమానంగా.. హైటెక్ సిటీ రైల్వే స్టేషన్‌ను కూడా అత్యంత ఆధునిక సౌకర్యాలతో అభివృద్ధి చేస్తున్నామని తెలిపారు.

హైటెక్ సిటీ రైల్వే స్టేషన్ ఆధునికీకరణ కోసం మొత్తం రూ. 35 కోట్లు కేటాయించారు. ఈ పనులు రెండు విడతలుగా కొనసాగుతున్నాయి. మొదటి విడత పనులు వచ్చే ఫిబ్రవరి నెలలోపు పూర్తవుతాయని మంత్రి వెల్లడించారు. ఈ ఆధునికీకరణలో భాగంగా అత్యాధునిక వెయిటింగ్ హాల్స్, మెరుగైన ప్లాట్‌ఫారమ్‌లు, ప్రయాణికుల కోసం అనుకూలమైన మార్గాలు, మెరుగైన భద్రతా ఏర్పాట్లు వంటి సదుపాయాలు ఏర్పాటు చేస్తున్నారు. రానున్న సంవత్సరంలో దక్షిణ మధ్య రైల్వే పరిధిలో ప్రయాణికులకు మరింత మెరుగైన.. ఆధునిక రైల్వే సదుపాయాలు అందుబాటులోకి వస్తాయని కిషన్ రెడ్డి హామీ ఇచ్చారు.

ప్రయాణికుల రద్దీని దృష్టిలో ఉంచుకుని.. ముఖ్యంగా పండుగల సమయంలో ప్రయాణ సౌలభ్యాన్ని పెంచడానికి ప్రత్యేక ఏర్పాట్లు చేస్తున్నట్లు మంత్రి తెలిపారు. సంక్రాంతి పండుగ సందర్భంగా 16 ప్రత్యేక రైళ్లు హైటెక్ సిటీ రైల్వే స్టేషన్‌లో ఆగేలా ఏర్పాట్లు చేస్తున్నారు. ఇది ఆయా ప్రాంతాలకు వెళ్లే వేలాది మంది ప్రయాణికులకు.. ముఖ్యంగా ద్విచక్ర వాహనదారులకు భారీ ఉపశమనం అందించనుంది. రైల్వే స్టేషన్ల ఆధునికీకరణ.. ప్రయాణికులకు మెరుగైన సేవలు అందించడంలో ప్రభుత్వం నిబద్ధతను తెలియజేస్తుంది. ఈ ప్రాజెక్టులు పూర్తి అయితే.. హైదరాబాద్ నగరం దేశంలోనే అత్యుత్తమ రైల్వే మౌలిక వసతులు కలిగిన నగరాల్లో ఒకటిగా నిలవనుంది.