ఐబొమ్మ పూర్తి పేరు ఏంటో తెలుసా.. రివీల్ చేసిన ఇమ్మడి రవి

ఐబొమ్మ, బప్పం వంటి ప్రముఖ సినీ పైరసీ వెబ్‌సైట్ల నిర్వాహకుడు ఇమ్మడి రవి రెండో విడత కస్టడీ విచారణ పూర్తయింది. మూడు రోజుల పాటు జరిగిన ఈ విచారణలో.. సైబరాబాద్ సైబర్ క్రైమ్ పోలీసులు అనేక కీలక సమాచారాన్ని, సాంకేతిక వివరాలను సేకరించారు. రవి నుంచి సేకరించిన డాటా ఆధారంగా.. పోలీసులు ఈ పైరసీ నెట్‌వర్క్‌ను కూకటివేళ్లతో సహా ఛేదించేందుకు సిద్ధమవుతున్నారు. పోలీసుల విచారణలో రవి అందించిన వివరాలు.. పైరసీ నెట్‌వర్క్ నిర్వహణపై స్పష్టతను ఇచ్చాయి. రవి మెయిల్స్‌లో దాచిపెట్టిన స్పామ్, హైడ్ ఫైల్స్‌ లోనే పైరసీకి సంబంధించిన డాటా మొత్తం భద్రపరిచినట్లు సీసీఎస్ పోలీసులు గుర్తించారు.

ఐబొమ్మ, బప్పం వెబ్‌సైట్‌లలో మొత్తం 21 వేలకు పైగా సినిమాలు అప్‌లోడ్ అయినట్లు పోలీసులు నిర్ధారించారు. పైరసీకి సంబంధించిన అడ్వాన్స్‌డ్ టెక్నాలజీ గురించి పోలీసులకు వివరంగా చెప్పినట్లు తెలుస్తోంది. ఓటీటీ ప్లాట్‌ఫామ్‌లలో వచ్చే కంటెంట్‌ను సైతం రికార్డింగ్ చేయగలిగామని అతడు వెల్లడించాడు. రికార్డింగ్ చేసిన సినిమా ఆడియో, వీడియో క్వాలిటీని పెంచడం కోసం కరేబియన్ దీవుల్లో ఉన్న ఔట్‌సోర్సింగ్ సంస్థలతో ఒప్పందం చేసుకున్నట్లు తెలిపాడు. రవి వెబ్‌సైట్ల పేర్ల వెనుక ఉన్న ఆసక్తికర విషయాలను కూడా పోలీసులకు వివరించాడు. విశాఖపట్నంలో సినిమాను "బొమ్మ" అని పిలవడం అలవాటు. ఇంటర్నెట్‌లో బొమ్మను చూపిస్తుందనే ఉద్దేశంతో "ఇంటర్నెట్ బొమ్మ"  అని పేరు పెట్టినట్లు తెలిపాడు. మొదట్లో ఈ సైట్‌కు "బలపం" అని పేరు పెట్టాలని అనుకున్నా.. డొమైన్ నేమ్‌లో 'L' అనే అక్షరంతో సాంకేతిక సమస్యలు రావడంతో "బప్పం" అని పేరు నిర్ణయించినట్లు వెల్లడించాడు.

రెండో విడత కస్టడీ మొదటి రోజు విచారణలో.. ఎన్‌జీల నెట్‌వర్క్, వారి ఆర్థిక వ్యవహారాలపై పోలీసులు కీలక లీడ్‌ను సంపాదించారు. ఈ నెట్‌వర్క్‌ను నడుపుతున్న మిగతా ముఠా సభ్యుల వివరాలు.. ఐపీ మాస్క్ చేసి అనధికారిక వెబ్‌సైట్‌లను నిర్వహిస్తున్న తీరుపై పోలీసులు లోతుగా ఆరా తీశారు. ప్రహ్లాద్ అనే వ్యక్తి గురించి రవి సమాచారం ఇవ్వగా.. తాము కేవలం ఆన్‌లైన్ లింకుల ద్వారానే కనెక్ట్ అయ్యామని తెలిపాడు.

రవి ఆ లింకులను పోలీసులకు చూపించబోగా.. అంతలోనే ఆ లింకులు రివోక్ అయ్యాయి. వీటిపై పోలీసులు సాంకేతిక పరిశోధన చేస్తున్నారు. మూడు రోజుల కస్టడీ పూర్తవడంతో రవిని నాంపల్లి కోర్టుకు హాజరుపరిచి.. అక్కడి నుంచి చంచల్‌గూడ జైలుకు తరలించారు. సినీ పైరసీ కేసులో ఐపీ మాస్క్ లింక్స్ పై, ఈ నెట్‌వర్క్‌పై పోలీసులు త్వరలోనే కీలక ప్రకటన చేసే అవకాశం ఉంది.