సర్పంచ్ ఎన్నికలో మాజీ మహిళా నక్సలైట్ పోటీ.. నామినేషన్ దాఖలు

రాజకీయాల్లో అనూహ్య మార్పులకు నిదర్శనంగా.. ఒకప్పుడు సాయుధ పోరాటంలో కీలక పాత్ర పోషించిన మాజీ మహిళా నక్సలైట్ నేరళ్ల జ్యోతి అలియాస్ జ్యోతక్క తన స్వగ్రామమైన శివంగాలపల్లి (కోనరావుపేట మండలం) సర్పంచ్ ఎన్నికల బరిలో నిలిచారు. విప్లవ పోరాటం నుంచి ప్రజాస్వామ్య మార్గానికి మారిన ఆమె.. స్థానిక పాలనలో భాగస్వామ్యం కావాలని నిర్ణయించుకున్నారు.

నేరళ్ల జ్యోతి చిన్నతనంలోనే తన ప్రాంతంలోని భూస్వామ్య వ్యవస్థ కారణంగా ఎదురైన అసమానతలు, అన్యాయాలను చూసి చలించిపోయారు. అప్పటి విప్లవ ఉద్యమం, విప్లవ గేయాలకు ఆకర్షితురాలై.. తన స్వగ్రామాన్ని వీడి అజ్ఞాతంలోకి వెళ్లారు. ఆమె దాదాపు రెండు దశాబ్దాల సుదీర్ఘ కాలం పాటు మావోయిస్టు పార్టీలో చురుగ్గా కొనసాగారు. తన పోరాట పటిమ, నాయకత్వ లక్షణాల కారణంగా ఆమె కేంద్ర కమిటీ సభ్యురాలుగా ఎదిగారు.

2023లో జరిగిన రాష్ట్ర అసెంబ్లీ ఎన్నికలకు కొద్ది రోజుల ముందు.. జ్యోతక్క శాంతియుత జీవనం గడపాలని నిర్ణయించుకొని పోలీసులకు లొంగిపోయారు. ఆ తర్వాత.. ఆమె రాష్ట్ర రాజకీయాల్లో చురుగ్గా ఉన్న బీఆర్ఎస్ పార్టీలో చేరి.. ప్రజా జీవితంలో కొత్త అధ్యాయాన్ని ప్రారంభించారు. ప్రజా సేవ చేయడమే తన జీవిత లక్ష్యమని ప్రకటించిన జ్యోతక్క.. సర్పంచ్ ఎన్నికల నోటిఫికేషన్ విడుదల కావడంతో.. తన సొంత గ్రామం శివంగాలపల్లి సర్పంచ్ పదవికి పోటీ చేయాలని నిర్ణయించుకున్నారు. దీంతో ఆమె సర్పంచ్ పదవికి నామినేషన్ దాఖలు చేశారు.

గ్రామ స్వరాజ్యం, స్థానిక ప్రజల సమస్యలను పరిష్కరించడమే తన ప్రధాన ఎజెండాగా ఆమె ప్రచారం చేస్తున్నారు. జ్యోతక్క ఎన్నికల బరిలో నిలబడటం స్థానికంగానే కాక.. కరీంనగర్ జిల్లావ్యాప్తంగా రాజకీయ చర్చనీయాంశంగా మారింది. మాజీ నక్సలైట్ నాయకురాలు ప్రజాస్వామ్యబద్ధంగా ఎన్నికల్లో పాల్గొనడం అనేది.. హింసను వీడి నిర్మాణాత్మక పరిష్కారాల దిశగా సామాజిక మార్పు జరుగుతోందని తెలియజేస్తుంది. జ్యోతక్క విజయం సాధిస్తే.. గ్రామాభివృద్ధిలో ఆమె నాయకత్వం కీలక పాత్ర పోషించే అవకాశం ఉంది. ప్రజల కష్టాలు తెలిసిన ఆమెకు గ్రామంలోని సమస్యల పరిష్కారానికి పాటుపడుతుందని స్థానికులు భావిస్తున్నారు.