తెలంగాణ రైతులకు భారీ శుభవార్త.. ఏకంగా 100 శాతం రాయితీ

తెలంగాణ రాష్ట్రంలో ఆయిల్ పామ్ సాకును ప్రోత్సహించడం ద్వారా రైతుల ఆదాయాన్ని గణనీయంగా పెంచాలని ప్రభుత్వం లక్ష్యంగా పెట్టుకుంది. ఈ క్రమంలో భాగంగా.. మెదక్ జిల్లా రేగోడ్ మండల వ్యవసాయ అధికారి రాంప్రసాద్ కీలక వ్యాఖ్యలు చేశారు. ఆయిల్ పామ్ సాగుతో రైతులు అధిక ఆదాయం పొందవచ్చని సూచించారు. జగిత్యాల శివారులోని నాగారం ధన్ రాజ్ ఆయిల్ పామ్ తోటను పరిశీలించిన అనంతరం అతడు రైతులను ఉద్దేశించి మాట్లాడారు.

సాధారణంగా పత్తి.. వరి వంటి సాంప్రదాయ పంటలతో పోలిస్తే.. ఆయిల్ పామ్ దీర్ఘకాలికంగా.. స్థిరంగా అధిక లాభాలను అందిస్తుంది. నీటి సౌకర్యం ఉన్న రైతులు తమ పంటలకు ప్రత్యామ్నాయంగా ఆయిల్ పామ్‌ను సాగు చేయాలని రాంప్రసాద్ సూచించారు. ఒక్కసారి మొక్కలు నాటితే.. ఈ తోటలు సుమారు 25 నుంచి 30 సంవత్సరాల వరకు దిగుబడిని అందిస్తాయి. రైతులు పండించిన ఆయిల్ పామ్ గెలలను ఎలాంటి మధ్యవర్తిత్వం లేకుండా.. నేరుగా కంపెనీ ప్రతినిధులే కొనుగోలు చేస్తారు. దీనివల్ల రైతులకు మార్కెటింగ్ సమస్యలు ఉండవు. సరైన ధర లభిస్తుంది.

ఆయిల్ పామ్ సాగును ప్రోత్సహించడానికి ప్రభుత్వం రైతులకు అనేక రాయితీలు అందిస్తోంది. ఎకరాకు సుమారు 57 మొక్కలు నాటుకోవచ్చు. ఒక్కొక్క మొక్కను ప్రభుత్వం రాయితీపై కేవలం రూ. 20కే అందిస్తోంది. ఇక దీంతో పాటు.. నీటి సామర్థ్యాన్ని పెంచడానికి కీలకమైన బిందు సేద్యం పరికరాలపై కూడా ప్రభుత్వం భారీగా రాయితీలు అందిస్తోంది. ఎస్సీ, ఎస్టీ రైతులకు 100 శాతం రాయితీ ఇస్తారు. అంటే.. ఒక పరికరం రూ.లక్ష ఖర్చు చేసి కొనుగోలు చేస్తే.. అంతే మొత్తంలో అతడికి సబ్సిడీ రూపంలో ప్రభుత్వం అందిస్తుంది. ఇక బీసీ రైతులకు 90 శాతం, మిగిలిన రైతులకు 80 శాతం రాయితీతో ఈ పరికరాలను కొనుగోలు చేయవచ్చు.

ఆయిల్ పామ్ సాగుకు తగినంత నీటి లభ్యత ఉండటం చాలా ముఖ్యం. బిందు సేద్యం వల్ల నీటి వినియోగం తగ్గుతుంది. నాటిన మూడు నుంచి నాలుగు సంవత్సరాల తర్వాత ఆయిల్ పామ్ దిగుబడికి వస్తుంది. తొలి సంవత్సరాల్లో అంతర పంటలను సాగు చేసుకోవడం ద్వారా రైతులకు అదనపు ఆదాయం పొందవచ్చు. ఈ కార్యక్రమంలో వ్యవసాయ విస్తరణ అధికారి మహేష్, లీవ్ పామ్ కంపెనీ అసిస్టెంట్ మేనేజర్ జాన్సన్ తదితరులు పాల్గొన్నారు. ప్రభుత్వం అందిస్తున్న రాయితీలను, కంపెనీల కొనుగోలు హామీని రైతులు సద్వినియోగం చేసుకొని ఆర్థికంగా బలోపేతం కావాలని అధికారులు కోరారు.