ఇన్ఫోసిస్ సమీపంలో గుంతలు తవ్వుతున్న మాయగాళ్లు

ఈజీ మనీ కోసం అర్రులు చాచే వారి సంఖ్య రోజు రోజుకు పెరుగుతోంది. కూర్చున్న చోటు నుంచి కదలకుండా.. ఏమాత్రం కష్టపడకుండా డబ్బులు రావాలి.. అందుకోసం కుదిరితే అమాయకులను మోసం చేయాలి అనుకునే వారు కోకొల్లలు. సైబర్ నేరాలు, గుప్త నిధులు ఇలా రకరకాల పేర్లు చెప్పి జనాలను మోసం చేస్తుంటారు కేటుగాళ్లు. ఇక కొందరేమో.. కష్టపడకుండా డబ్బులు సాధించాలనే ఉద్దేశంతో గుప్త నిధులు, లంకెబిందల కోసం అన్వేషిస్తుంటారు. తాజాగా హైదరాబాద్‌లోని ఇన్ఫోసిస్ సమీపంలో గుప్తనిధుల కోసం తవ్వకాలు జరిపారు. ఆ వివరాలు..

పోచారం ఇన్ఫోసిస్ ఆఫీసు సమీపంలో కొందరు వ్యక్తులు గుప్త నిధుల కోసం తవ్వకాలు జరిపారు. ఈ విషయం తెలుసుకున్న పోలీసులు ఘటనా స్థలానికి చేరుకుని.. తవ్వకాలు జరిపిన 8 మందిని అరెస్ట్ చేశారు. నిందితులందరిని కీసర మండలం, రాంపల్లి గ్రామానికి చెందిన వారిగా గుర్తించారు. వీరంతా పోచారం ఇన్ఫోసిస్ దగ్గర గుప్త నిధుల కోసం తవ్వకాలు జరుపుతుండగా.. స్థానికులు వీరిని గమనించారు. వెంటనే పోచారం పోలీసులకు ఫోన్ చేసి.. ఇన్ఫోసిస్ సమీపంలో ఎవరో గుంతలు తవ్వుతున్నారని సమాచారం అందించారు.

 ఈ సమాచారంతో అక్కడకు చేరుకున్న పోలీసులు.. తవ్వకాలు జరుపుతున్న 8 మందిని అదుపులోకి తీసుకున్నారు. పోలీసులు వచ్చే సమయానికి వీరంతా ఇక్కడ కొబ్బరి కాయలు కొట్టి.. నిమ్మకాయలు పెట్టి గడ్డపారలు, పారలతో అక్కడ గుంతలు తవ్వుతూ కనిపించారు. పోలీసుల వీరిని అదుపులోకి తీసుకుని ప్రశ్నించారు. ముందు ఎంత అడిగినా సరిగా సమాధానం చెప్పలేదు. చివరకు గుప్త నిధుల కోసం తవ్వకాలు జరుపుతున్నట్లు వెల్లడించారు. పోలీసులు ఈ 8 మందిని అదుపులోకి తీసుకుని.. వారి వద్ద నుంచి ఒక కారు, రెండు బైక్‌లు, గవ్వలు, పూజ సామగ్రి, 8 సెల్ ఫోన్లను స్వాధీనం చేసుకున్నారు.

ఇదిలా ఉంటే కొన్ని రోజుల క్రితం వరంగల్ జిల్లాలో కూడా గుప్త నిధుల వార్త ఒకటి వెలుగులోకి వచ్చింది. ములుగు జిల్లాలో బంగారం నిధి దొరికిందంటూ జోరుగా ప్రచారం సాగింది. ములుగు జిల్లా, మంగపేట ప్రాంతానికి చెందిన ఆటో డ్రైవర్ తనతో పాటు మరికొందరిని కలుపుకుని.. మహారాష్ట్రలోని ఓ ప్రాంతంలో గుప్త నిధులు కోసం తవ్వకాలు జరిపాడు. వారికి రాగి బిందె దొరికింది. దీనిలో బంగారు నాణేలు ఉన్నట్లు గుర్తించారు. అయితే, వీటి పంపకాల విషయంలో తలెత్తిన వివాదంతో పోలీసులకు సమాచారం అందింది. దీంతో పోలీసులు వీరిని అరెస్ట్ చేసిన సంగతి తెలిసిందే.