తొలి విడత సర్పంచ్ అభ్యర్థులకు గుర్తులు కేటాయింపు

తెలంగాణ గ్రామాల్లో సర్పంచ్ ఎన్నికల సందడి నెలకొంది. ఓటర్లను ప్రసన్నం చేసుకోవడాని, ఏకగ్రీవాల కోసం అభ్యర్థులు నానా ప్రయత్నాలు చేస్తున్నారు. కాగా, పార్టీలతో సంబంధం లేకుండా నిర్వహించే గ్రామ పంచాయతీ ఎన్నికల తొలి విడత నామినేషన్ల ప్రక్రియ, పరిశీలన విజయవంతంగా పూర్తయ్యాయి. తాజాగా సర్పంచ్ బరిలో ఉండే అభ్యర్థుల తుది జాబితా ఖరారు చేసింది ఎన్నికల సంఘం. షెడ్యూల్ ప్రకారం మొదటి విడతలో నామినేషన్లు వేసిన అభ్యర్థులు.. డిసెంబరు 3వ తేదీ మధ్యాహ్నం 3 గంటల వరకు తమ నామినేషన్లను ఉపసంహరించుకోవడానికి అవకాశం ఉంది. అయితే ఈ గడువు ముగియడంతో.. పోటీలో మిగిలిన అభ్యర్థులకు గుర్తుల కేటాయింపు ప్రక్రియ ప్రారంభం అయింది.

మూడు విడతలుగా జరగనున్న గ్రామ పంచాయితీ ఎన్నికల్లో ఇప్పటికే రెండు దశల నామినేషన్ల ప్రక్రియ పూర్తైంది. తొలి విడతలో డిసెంబర్ 11న జరిగే పోలింగ్‌కు అభ్యర్థులకు గుర్తులు కేటాయించింది ఎన్నికల సంఘం. దీంతో సర్పంచ్ అభ్యర్థులు వారి గుర్తులను ప్రచారం చేసుకుంనేందుకు, తమ గుర్తుకే ఓటు వేయాలని ఓటర్లను కోరేందుకు రెడీ అవుతున్నారు. కాగా, మూడో ఎన్నికలకు బుధవారం నుంచి నామినేషన్ల ప్రక్రియ ప్రారంభమైంది. ఎన్నికల షెడ్యూల్ ప్రకారం రెండో విడత పోలింగ్ డిసెంబర్ 14న, మూడో విడత పోలింగ్ డిసెంబర 17న జరగనుంది.

గ్రామ పంచాయతీ ఎన్నికల్లో సర్పంచ్‌గా పోటీచేసే అభ్యర్థులకు.. గుర్తులను పూర్తిగా తెలుగు అక్షర క్రమం ఆధారంగా కేటాయిస్తారు. అభ్యర్థులు నామినేషన్ పత్రాల్లో తమ పేరును ఎలా పేర్కొంటే.. దాని ఆధారంగా కేటాయింపు ఉంటుంది. పేరులోని మొదటి అక్షరం ఆధారంగానే గుర్తులను కేటాయిస్తారు. ఉదాహరణకు, 'అరవింద్' అనే పేరుతో నామినేషన్ వేసిన వారికి.. 'వాణి' అనే పేరుతో నామినేషన్ వేసిన వారి కంటే ముందుగా గుర్తును ఇస్తారు. అంటే పేరుకు ముందు భాగంలో ఉన్న అక్షరం ప్రకారమే గుర్తుల కేటాయింపు జరుగుతుంది. అయితే బ్యాలెట్లలో తమ పేరు టాప్‌లో కనిపించాలని అభ్యర్థులు కొందరు తమ ఇంటిపేరును ముందుగా.. తర్వాత తమ పేరను నమోదు చేసుకుంటారు.

మరోవైపు, సర్పంచ్ ఎన్నికల నిర్వహణ కోసం 30 ప్రత్యేక గుర్తులను కేటాయించింది ఎన్నికల సంఘం. ఈ గుర్తుల్లో ప్రాధాన్యత క్రమంలో ఉంగరం, కత్తెర, బ్యాటు, ఫుట్‌బాల్, లేడీ పర్సు, టీవీ రిమోట్, టూత్‌పేస్టు, స్పానర్ (పానా), చెత్తడబ్బా, నల్లబోర్డు, బెండకాయ, కొబ్బరితోట, వజ్రం, బకెట్, డోర్‌హ్యాండిల్, టీ జల్లెడ, మంచం, టేబుల్, బ్యాటరీ లైట్, బిస్కెట్, వేణువు, చెప్పులు, గాలి బుడగ, క్రికెట్ స్టంప్స్ వంటి నిత్యజీవితంలో ఉపయోగించే వస్తువులకు సంబంధించిన గుర్తులు కేటాయించింది. సర్పంచ్ అభ్యర్థులకు సంబంధించిన గుర్తులను గులాబీ రంగు బ్యాలెట్ పేపర్‌పై ముద్రిస్తారు.