హైదరాబాద్‌లో రూ.1.40 కోట్లతో కొత్త రోడ్లకు శంకుస్థాపన

ఖైరతాబాద్ నియోజకవర్గ అభివృద్ధిపై ఎమ్మెల్యే దానం నాగేందర్ ప్రత్యేక దృష్టి సారించారు. నియోజకవర్గ పరిధిలోని ముఖ్య ప్రాంతాలైన హిమాయత్‌నగర్, నారాయణగూడలలో మౌలిక సదుపాయాలను మెరుగుపరచడానికి రూ. 1.40 కోట్ల విలువైన అభివృద్ధి పనులకు ఆయన ఇటీవల శంకుస్థాపన చేశారు. స్థానిక ప్రజలు ఎదుర్కొంటున్న ప్రధాన సమస్యలైన పారిశుధ్యం, రవాణా ఇబ్బందులను తొలగించడమే లక్ష్యంగా ఈ పనులు చేపట్టారు.

డ్రైనేజీ, రోడ్ల పనులతో మెరుగైన మౌలిక సదుపాయాలు..

వర్షాకాలంలో హిమాయత్‌నగర్, నారాయణగూడ వంటి ప్రాంతాల్లో మురుగునీరు రోడ్లపైకి చేరి, ప్రజలు తీవ్ర ఇబ్బందులు పడుతున్నారు. ఈ సమస్యను శాశ్వతంగా పరిష్కరించేందుకు.. ఈ నిధులను ప్రధానంగా డ్రైనేజీ వ్యవస్థ ఆధునీకరణ, కొత్త రోడ్ల నిర్మాణానికి వినియోగించనున్నారు. రూ. 1.40 కోట్ల నిధులతో కొత్తగా రోడ్లు వేయడం, పాత డ్రైనేజీ వ్యవస్థ స్థానంలో మరింత సామర్థ్యం ఉన్న కొత్త పైప్‌లైన్లను ఏర్పాటు చేయడం జరుగుతుంది. ఈ పనుల ద్వారా ప్రజల ఆరోగ్య ప్రమాణాలు మెరుగుపడటంతో పాటు.. రోడ్లు మెరుగవడం వల్ల ట్రాఫిక్ ఇబ్బందులు కూడా తగ్గుతాయని ఎమ్మెల్యే దానం నాగేందర్ తెలిపారు. ప్రజలకు ఇచ్చిన హామీల అమలుకు తాను కట్టుబడి ఉన్నానని స్పష్టం చేశారు.

ఈ సందర్భంగా ఎమ్మెల్యే దానం నాగేందర్ మాట్లాడుతూ.. నియోజకవర్గ ప్రజలకు సేవ చేయడమే తన ప్రథమ కర్తవ్యమని ఉద్ఘాటించారు. రాజకీయ అంశాల గురించి మాట్లాడుతూ.. ఎమ్మెల్యే పదవికి రాజీనామా చేసే అంశంపై ముఖ్యమంత్రి రేవంత్ రెడ్డి  ఆదేశిస్తే.. తాను సిద్ధంగా ఉన్నానని పరోక్షంగా తెలిపారు. తనకు ఎన్నికల పోరాటం కొత్త కాదని, గతంలో 11 సార్లు తాను ఎన్నికల్లో పోటీ చేసిన అనుభవం ఉందని గుర్తు చేశారు. ప్రస్తుతం తన పూర్తి దృష్టి నియోజకవర్గ అభివృద్ధిపైనే ఉందని.. ప్రజల సమస్యలను పరిష్కరించడానికే ప్రాధాన్యత ఇస్తున్నానని ఆయన స్పష్టం చేశారు. ప్రజలకు మెరుగైన జీవన ప్రమాణాలను అందించడమే తన ధ్యేయమన్నారు.