హైడ్రా కమిషనర్ గన్‌మెన్ ఆత్మహత్యాయత్నం

హైడ్రా కమిషనర్ ఏవీ రంగనాథ్ గన్‌మెన్, కానిస్టేబుల్ కృష్ణ చైతన్య ఆత్మహత్యాయత్నం ఘటన తెలుగు రాష్ట్రాల్లో తీవ్ర కలకలం రేపింది. అత్యంత కీలకమైన విభాగంలో పనిచేస్తున్న ఒక పోలీసు అధికారి గన్‌మెన్ ఆత్మహత్యాయత్నానికి పాల్పడటం వెనుక ఉన్న కారణాలు సామాన్య ప్రజలనే కాకుండా, పోలీసు యంత్రాంగాన్ని కూడా విస్మయానికి గురిచేస్తున్నాయి. ఇవాళ ఉదయం తన నివాసంలో కృష్ణ చైతన్య సర్వీస్ తుపాకీతో కాల్చుకొని ఆత్మహత్యకు ప్రయత్నించగా.. కుటుంబ సభ్యులు వెంటనే ఆయనను ఎల్బీనగర్‌లోని కామినేని ఆసుపత్రికి తరలించారు. ఈ విషయం తెలిసిన వెంటనే హైడ్రా కమిషనర్ రంగనాథ్ స్వయంగా ఆసుపత్రికి చేరుకున్నారు. ఐసీయూలో చికిత్స పొందుతున్న చైతన్యను పరామర్శించి, అతని ఆరోగ్య పరిస్థితిపై వైద్యులతో చర్చించారు.

అనంతరం మీడియాతో మాట్లాడిన రంగనాథ్.. కృష్ణ చైతన్య పరిస్థితి ప్రస్తుతం అత్యంత విషమంగా ఉందని, అతను ప్రాణాలతో బయటపడే అవకాశాలు చాలా తక్కువగా ఉన్నాయని వైద్యులు తెలిపినట్లు ఆవేదన వ్యక్తం చేశారు. ఈ ఆత్మహత్యాయత్నానికి గల కారణాలను రంగనాథ్ మీడియాకు వివరించారు. కృష్ణ చైతన్య కొంతకాలంగా తీవ్రమైన ఆర్థిక ఇబ్బందులతో సతమతమవుతున్నట్లు వెల్లడించారు. సుమారు రెండేళ్ల క్రితం ఆన్‌లైన్ బెట్టింగ్, గేమింగ్ యాప్‌ల బారిన పడటంతో అతను భారీగా నష్టపోయినట్లు సమాచారం.

 ఈ ఆర్థిక సమస్యల ప్రభావం అతని వ్యక్తిగత జీవితంపై కూడా పడింది. మూడు నెలల క్రితం కుటుంబంలో గొడవలు జరగడంతో చైతన్య ఇల్లు విడిచి వెళ్లిపోయారని, అప్పటి నుండి అతను మానసిక ఒత్తిడి, నాడీ సంబంధిత సమస్యలతో బాధపడుతున్నట్లు కమిషనర్ పేర్కొన్నారు. ఒక మంచి వ్యక్తిగా గుర్తింపు పొందిన చైతన్య ఇలాంటి నిర్ణయం తీసుకోవడం అతని సహచరులను కలిచివేస్తోంది. ప్రస్తుతం కృష్ణ చైతన్యకు వైద్యులు వెంటిలేటర్‌పై ఉంచి అత్యవసర చికిత్స అందిస్తున్నారు. ఒక ఉన్నతాధికారి గన్‌మెన్ ఆత్మహత్యాయత్నం చేయడంతో పోలీసులు హయత్‌నగర్ పోలీస్ స్టేషన్‌లో కేసు నమోదు చేసి దర్యాప్తు చేస్తున్నారు.

కాగా, అవగాహన, రక్షణ కల్పించాల్సిన పోలీసులే ఆన్‌లైన్ బెట్టింగ్ యాప్‌లకు బానిసలై ప్రాణాలు తీసుకోవడం ఆందోళన కలిగిస్తోంది. క్రమశిక్షణకు మారుపేరుగా ఉండే పోలీస్ విభాగంలో ఇలాంటి ఘటనలు పునరావృతం కావడం పట్ల ఉన్నతాధికారులు దృష్టి సారించాల్సిన అవసరం ఉంది. ఆన్‌లైన్ జూదం వల్ల కలిగే నష్టాలపై అవగాహన కల్పించాల్సిన బాధ్యత సమాజంపై ఎంతైనా ఉంది. బెట్టింగ్ యాప్‌ల మాయలో పడి విలువైన ప్రాణాలను పణంగా పెట్టవద్దని అధికారులు కూడా హెచ్చరిస్తున్నారు.