సర్పంచ్ ఎన్నికలో హామీ.. రూ.30 లక్షల విలువ చేసే ఎకరం భూమి విరాళం

సాధారణంగా ఎన్నికల సమయంలో అభ్యర్థులు ఓట్ల కోసం ఆకాశమంత హామీలు ఇస్తుంటారు. అయితే గెలిచిన తర్వాత వాటిని పట్టించుకునే వారు చాలా తక్కువ మంది ఉంటారు. కానీ తెలంగాణలో కొత్తగా బాధ్యతలు చేపట్టిన కొందరు సర్పంచ్‌లు మాత్రం ఇందుకు భిన్నంగా వ్యవహరిస్తున్నారు. పదవిలోకి వచ్చిన వెంటనే ఇచ్చిన మాటను నిలబెట్టుకుంటూ తమ నిజాయితీని చాటుకుంటున్నారు. ప్రజలకు ఇచ్చిన వాగ్దానాలను నెరవేరుస్తూ గ్రామాల్లో సరికొత్త రాజకీయ సంస్కృతికి నాంది పలుకుతున్నారు.

హనుమకొండ జిల్లా భీమదేవరపల్లి మండలం రంగయ్యపల్లి గ్రామంలో ఒక అద్భుతమైన సంఘటన చోటుచేసుకుంది. గ్రామ సర్పంచ్ ఎన్నికల సమయంలో మండలం రజిని అనే మహిళా అభ్యర్థిని బరిలో నిలిపిన గ్రామస్తులకు.. స్థానిక ప్రముఖులు లక్కిరెడ్డి తిరుపతిరెడ్డి ఒక గొప్ప హామీ ఇచ్చారు. ఆమెను గెలిపిస్తే గ్రామంలోని మహిళల కోసం విలువైన స్థలాన్ని కేటాయిస్తానని మాట ఇచ్చాడు.

ఆమె విజయం సాధించిన వెంటనే తిరుపతిరెడ్డి తన మాటను నిలబెట్టుకున్నారు. సుమారు 30 లక్షల రూపాయల విలువ చేసే తన సొంత ఎకరం భూమిని బతుకమ్మ ఆడుకోవడానికి విరాళంగా అందజేశారు. అంతటితో ఆగకుండా.. ఆ స్థలంలో బతుకమ్మ బండ అభివృద్ధి కోసం మరో 10 లక్షల రూపాయలను కూడా ఇస్తానని ప్రకటించారు. ఆదివారం గ్రామస్తుల సమక్షంలో ఈ స్థలానికి భూమిపూజ నిర్వహించడం విశేషం. ఒక గ్రామం కోసం ఇంతటి భారీ విరాళం ప్రకటించడం రాష్ట్రవ్యాప్తంగా చర్చనీయాంశమైంది.

ఇటీవల కరీంనగర్ జిల్లాలో కూడా ఒక సర్పంచ్ తన ప్రత్యేకతను చాటుకున్నారు. గ్రామస్తులు ఎదుర్కొంటున్న అతిపెద్ద సమస్య అయిన కోతుల బెడదను పరిష్కరిస్తానని ఎన్నికల ప్రచారంలో ఆమె వాగ్దానం చేశారు. ఎన్నికలో గెలిచిన తర్వాత రోజే కార్యాచరణ ప్రారంభించారు. సూర్యాపేట నుంచి ప్రత్యేకంగా కోతులను పట్టే బృందాలను పిలిపించి.. ఊర్లోని కోతులను సురక్షితంగా పట్టుకుని అటవీ ప్రాంతంలో వదిలేయించారు. కేవలం మాటలకే పరిమితం కాకుండా.. ప్రజల ఇబ్బందులను గమనించి తక్షణమే స్పందించిన తీరుకు గ్రామస్తులు నీరాజనాలు పలుకుతున్నారు.

గ్రామ పంచాయతీలు కేవలం ప్రభుత్వ నిధులపైనే ఆధారపడకుండా.. ఇలాంటి దాతల సహకారం, సర్పంచ్‌ల చొరవతో అభివృద్ధి చెందుతాయి. రంగయ్యపల్లి వంటి గ్రామాల్లో వ్యక్తిగత ఆస్తులను సామాజిక ప్రయోజనాల కోసం దానం చేయడం గొప్ప విషయం. ఇది మిగతా గ్రామాలకు కూడా స్ఫూర్తినిస్తుంది.