డిసెంబర్ 29 నుండి జనవరి 31 వరకు,,,జీహెచ్ఎంసీ మెగా శానిటేషన్ డ్రైవ్

హైదరాబాద్ నగరాన్ని ప్రపంచ స్థాయి నగరంగా తీర్చిదిద్దడంలో గ్రేటర్ హైదరాబాద్ మున్సిపల్ కార్పొరేషన్ (జీహెచ్ఎంసీ) కృషి మరువలేనిది. నిత్యం రద్దీగా ఉండే రహదారుల నిర్వహణ నుంచి పారిశుధ్యం వరకు అధికారులు, సిబ్బంది చూపుతున్న చొరవ అభినందనీయం. ముఖ్యంగా పెరుగుతున్న జనాభాకు అనుగుణంగా నగరాన్ని ఎప్పటికప్పుడు అందంగా మార్చేందుకు కొత్త ప్రణాళికలతో జీహెచ్ఎంసీ ముందుంటోంది. ఇప్పుడు మరోసారి భాగ్యనగర వాసుల కోసం ఒక భారీ పారిశుధ్య కార్యక్రమాన్ని చేపడుతోంది.

నగరాన్ని మరింత శుభ్రంగా.. ఆరోగ్యకరంగా ఉంచేందుకు డిసెంబర్ 29 నుంచి జనవరి 31 వరకు ఈ మెగా శానిటేషన్ డ్రైవ్ నిర్వహించనున్నారు. వార్డుల పునర్విభజన తర్వాత జరుగుతున్న అతిపెద్ద కార్యక్రమం ఇది. ప్రతిరోజూ దాదాపు 300 వార్డుల్లో పారిశుధ్య పనులను ముమ్మరంగా చేపడతారు. నగరంలో ఎక్కడైనా నిలిచిపోయిన పాత చెత్తను పూర్తిగా తొలగిస్తారు. అలాగే ఇళ్ల కూల్చివేతల వల్ల వచ్చే వ్యర్థాలను కూడా క్లియర్ చేస్తారు. కేవలం రోడ్లే కాకుండా. వర్షాకాలంలో ఇబ్బంది కలగకుండా నాలాలను, ప్రజలు సేదతీరే పార్కులను, ఫుట్‌పాత్‌లను ఈ నెల రోజుల్లో ప్రత్యేకంగా శుభ్రం చేయనున్నారు.

ఈ కార్యక్రమం చెత్తను ఎత్తేయడమే కాకుండా.. నగరాన్ని అందంగా మార్చడంపై కూడా దృష్టి పెడుతోంది. ప్రజలు తరచుగా చెత్త వేసే ప్రదేశాలను గుర్తించి, వాటిని పూర్తిగా శుభ్రం చేస్తారు. ఆ ప్రదేశాల్లో మళ్లీ చెత్త వేయకుండా ఉండేందుకు అక్కడ మొక్కలు నాటడం, గోడలకు రంగులు వేయడం, సెల్ఫీ పాయింట్లుగా మార్చడం వంటి వినూత్న పనులు చేయనున్నారు.

పరిశుభ్రత అనేది కేవలం ప్రభుత్వ బాధ్యతే కాదు, ప్రతి పౌరుడి బాధ్యత కూడా. ఈ మెగా డ్రైవ్ విజయవంతం కావాలంటే ప్రజల సహకారం ఎంతో అవసరం. పరిసరాలు శుభ్రంగా ఉంటే దోమల వ్యాప్తి తగ్గి, డెంగ్యూ, మలేరియా వంటి రోగాలు రాకుండా ఉంటాయి. తడి చెత్త, పొడి చెత్తను వేరు చేసి మున్సిపల్ వాహనాలకే ఇవ్వాలని అధికారులు కోరుతున్నారు. ఈ డ్రైవ్ ద్వారా భవిష్యత్తులో హైదరాబాద్ ఒక 'జీరో వేస్ట్' సిటీగా ఎదగాలని జీహెచ్ఎంసీ లక్ష్యంగా పెట్టుకుంది. ఈ భారీ కార్యక్రమంలో భాగంగా ఫ్లైఓవర్లు, మెట్రో పిల్లర్ల వద్ద కూడా క్లీనింగ్ పనులు జరగనున్నాయి. నగరం మనది.. దీనిని శుభ్రంగా ఉంచుకోవడం మన అందరి కర్తవ్యం.